ލިވަޕޫލް (މެއި 21) - ލިވަޕޫލަކީ ކޯޗިން ކެރިއަރުގައި ކުރެވުނު ފަހު މަސައްކަތަށް ވެދާނެ ކަމަށް މި ސީޒަނަށްފަހު އެ ޓީމުގެ ކޯޗުކަމުން ވަކިވި ޖަރުމަންގެ ޔާގަން ކްލޮޕް ބުނެފި އެވެ.
މި ސީޒަންގެ އިނގިރޭސި ޕްރިމިއާ ލީގުގައި ލިވަޕޫލް ކުޅުނު ފަހު މެޗުގައި އާދިއްތަ ދުވަހުގެ ރޭ ވުލްވްސް އަތުން އަމިއްލަ ދަނޑުގައި މޮޅުވިއިރު، މިއީ ކްލޮޕްގެ ވަދާއީ މެޗެވެ. މިއީ ލިވަޕޫލްގެ ކޯޗެއްގެ ގޮތުގައި ކްލޮޕް ހުރި 491 ވަނަ މެޗެވެ.
ލިވަޕޫލްގެ ކޯޗުކަމާ 2015 ވަނަ އަހަރު ހަވާލުވެ، ކްލޮޕް ވަނީ ޔޫރަޕްގެ ގަދަ ޓީމަކަށް އެ ޓީމުން އަލުން ހަދައިފަ އެވެ. ލިވަޕޫލް 30 އަހަރުގެ ތެރޭގައި ފުރަތަމަ ފަހަރަށް ޕްރިމިއާ ލީގުގެ ޗެމްޕިއަންކަން 2020 ވަނަ އަހަރު ހޯދީ ކްލޮޕްގެ އިރުޝާދުގެ ދަށުންނެވެ. އަދި 2019 ވަނަ އަހަރު ޗެމްޕިއަންސް ލީގު ވެސް ކާމިޔާބުކުރިއެވެ. މި ސީޒަންގައި ލިވަޕޫލް ލީގު ކަޕް ކާމިޔާބުކުރިއެވެ.
ލިވަޕޫލްގެ ކޯޗުކަމުގައި ކުޅުނު ފަހު މެޗަށްފަހު ކްލޮޕް، 56، ބުނީ ލިވަޕޫލްގެ ކޯޗުކަމުގަިއ ހޭދަކުރި އަހަރުތަކަށްފަހު މިހާރު އޭނާ ހުރީ "ހުސްވެފައި" ކަމަށެވެ. އަދި ފަހަރެއްގައި މިއީ ކޯޗިން ކެރިއަރުގައި ކުރެވުނު ފަހު މަސައްކަތް ތަކަށް ވެސް ވެދާނެ ކަމަށެެވެ.
"އަހަރެން މީހުން ކައިރީގައި އެބަ ބުނަން ފަހަރެއްގައި މިއީ އަހަރެންގެ ކޯޗިން ކެރިއަރުގެ ފަހު މަސައްކަތޭ. އެކަމަކު ގިނަ މީހުން އެ ވާހަކަ ގަބޫލެއްނުކުރޭ. އެކަމަކު އަހަންނަށް އެނގޭ އެއީ ކީއްވެކަން. ބައެއް ކޯޗުން އެބަ މަސައްކަތްކުރޭ އުމުރުން 70 އަހަރުގައިވެސް،" ކްލޮޕް ބުންޏެވެ.
"އަަހަރެން ދެން އެހެން ކްލަބަކާ ހަވާލުވާނީ އެ ހަކަތަ އެނބުރި އައީމަ. އެކަމަކު, އަހަންނަށް އަބަދު ވެސް އެނގޭ އަހަރެން އެހާ ދުވަހު މިކަން ނުކުރާނެކަން."
ކްލޮޕް ބުނީ ކޯޗިން ކެރިއަރާމެދު މި ވަގުތު ނުވިސްނާ އޭނާ ބޭނުންވަނީ އަރާމުކުރަން ކަމަށެވެ. އަދި ފަހަރެއްގައި މީގެ "އަހަރެއްހާ ދުވަސް ފަހުން" އެކަމާމެދު ވިސްނަފާނެ ކަމަށެވެ.
"އަހަރެން ދެން މި ފަށަނީ އަރާމުކުރަން. މި ވަގުތު ބޭނުމެއް ނޫން (ކްލަބަކާ ހަވާލުވުމާމެދު) ވިސްނާކަށް،" ކްލޮޮޕް ބުންޏެވެ.
ކްލޮޕް ބުނީ ލިވަޕޫލްގެ ކޯޗުކަމުން ވަކިވިޔަސް އޭނާ ދެމިހުންނާނީ އެ ޓީމުގެ ސަޕޯޓަރެއްގެ ގޮތުގައި ކަމަށާއި ސަޕޯޓަރެއްގެ ގޮތުގައި ލިވަޕޫލްގެ ދަނޑަށް އެނބުރި އަންނާނެ ކަމަށެވެ.
ކްލޮޕްގެ ބަދަލުގައި ލިވަޕޫލްގެ ކޯޗަކަށް ހަމަޖައްސާފައިވަނީ ނެދަލޭންޑްސްގެ އާނޭ ސްލޮޓް އެވެ.
