މެޑްރިޑް (މެއި 20) - ސްޕެނިޝް ލީގުގައި ރޭ އަލެކްސަންޑަ ސޯލޯތު ޖެހި ހަތަރު ގޯލާ އެކު، ވިޔަރެއާލުން 4-4 އިން ރެއާލް މެޑްރިޑާ އެއްވަރުކޮށްފި އެވެ.
ލީގު ޗެމްޕިއަންކަން ޔަގީންކޮށްފައިވާ ރެއާލުން ވިޔަރެއާލް ދަނޑުގައި ރޭގެ މެޗުގެ ފުރަތަމަ ހާފު ނިންމާލިއިރު އޮތީ 4-1 އިން ކުރީގަ އެވެ. އެކަމަކު، ދެ ވަނަ ހާފުގައި، އަށް މިނިޓް ތެރޭގައި، ސޯލޯތު ހެޓްރިކެއް ހަދައި، ވިޔަރެއާލަށް އެއްވަރުކޮށްދިނީ އެވެ.
ރެއާލަށް ރޭގެ މެޗުގައި ލީޑުނަގައިިދިނީ އާޑާ ގުލެއާ އެވެ. ހޮސޭލޫ ރެއާލަށް ދެ ވަނަ ލަނޑެއް ޖަހައިދީފައިވަނިކޮށް، ސޯލޯތު ވަނީ ވިޔަރެއާލްގެ ފުރަތަމަ ލަނޑު ޖަހައިފަ އެވެ. އެކަމަކު، ފުރަތަމަ ހާފު ނިމުމުގެ ކުރިން، ގުލެއާ އާއި ލޫކަޒް ވަސްކޭޒް ޖެހި ލަނޑުތަކުން ރެއާލް ރަނގަޅު ލީޑަކާ އެކު ފުރަތަމަ ހާފު ނިންމާލި އެވެ.
އެހެން ނަމަވެސް، ދެ ވަނަ ހާފު ފަށައިގެން ފުރަތަމަ 11 މިނިޓް ތެރޭ، ސޯލޯތު ވަނީ ތިން ލަނޑު ޖަހައި ވިޔަރެއާލަށް އެއްވަރުކޮށްދީފަ އެވެ. މި ލަނޑުތަކާ އެކު، ސޯލޯތު ވަނީ ލީގުގައި 23 ލަނޑު ހަމަކޮށް، އެންމެ ގިނަ ލަނޑު ޖެހި ކުޅުންތެރިންގެ ލިސްޓުގެ ކުރިއަށް ޖެހިލައިފަ އެވެ.
ލީގުގައި ރޭ ރަޔޯ ވަޔެކާނޯ އަތުން ބާސެލޯނާ ވަނީ 3-0 އިން މޮޅުވެފަ އެވެ. އެ ޓީމުގެ ލަނޑުތައް ޖެހީ ޕެޑްރީ ދެ ގޯލުގެ އިތުރުން، ރޮބަޓް ލެވަންޑޯސްކީ އެވެ. އެތުލެޓިކޯ މެޑްރިޑް، ދަނޑުގައި އޮސަސޫނާ ވަނީ 4-1 އިން މޮޅުވެފަ އެވެ.
ސްޕެނިޝް ލީގުގައި ކޮންމެ ޓީމަކަށް ބާކީ އެއް މެޗު އޮތްއިރު، ރެއާލް، އެއް ވަނައިގައި އޮތީ 94 ޕޮއިންޓާ އެކު އެވެ. ދެ ވަނައިގައި އޮތް ބާސެލޯނާ އަށް 82 ޕޮއިންޓް ލިބިފައިވާއިރު، ތިނެއްގައި އޮތް ޖިރޯނާ އަށް ވަނީ 78 ޕޮއިންޓް ލިބިފަ އެވެ. އަދި ހަތަރެއްގައި އެތުލެޓިކޯ އޮތީ 73 ޕޮއިންޓާ އެކު އެވެ.
