ބާލިން (މެއި 18) - ޖަރުމަނު ލީގުގެ ފަހު މެޗުގައި، އޮއުސްބާގް އަތުން 2-1 އިން މޮޅުވެ، ބަޔާ ލެވަކޫސަނުން ބަލިނުވެ، ލީގު ޗެމްޕިއަންކަން ހޯދައި، ޖަރުމަނު ފުޓްބޯޅައިގެ ތާރީހުން ޖާގަ ހޯދައިފި އެވެ.
ލެވަކޫސަނުން އެ ކްލަބްގެ ތާރީހުގައި ފުރަތަމަ ފަހަރަށް ލީގު ޗެމްޕިއަންކަން ހޯދިއިރު، އެ ކާމިޔާބީ ހާއްސަވަނީ މިއީ ޖަރުމަނު ލީގުގެ ޗެމްޕިއަންކަން މެޗަކުން ބަލިނުވެ ޓީމަކުން ހޯދި ފުރަތަމަ ފަހަރެވެ.
ލެވަކޫސަނުން ލީގު ޗެމްޕިއަންކަން ޔަގީންކުރީ ބާކީ ފަސް މެޗު އޮއްވަ އެވެ.
ޔޫރަޕްގެ ވަރުގަދަ ފަސް ލީގަށް ބަލާއިރު، ލެވަކޫސަނަކީ ބަލިނުވެ، ލީގު ޗެމްޕިއަންކަން ހޯދި ތިން ވަނަ ޓީމެވެ. މީގެ ކުރިން އެކަން ހާސިލްކުރީ، 2003-2004 ވަނަ ސީޒަނުގައި އިނގިރޭސި ޕްރިމިއާ ލީގު ކާމިޔާބުކުރި އާސެނަލާއި، 2011-2012 ވަނަ އަަހަރުގެ އިޓާލިއަން ލީގުގެ ޗެމްޕިއަންކަން ހޯދި ޔުވެންޓަސް އެވެ.
ޒަބީ އަލޮންސޯގެ ކޯޗުކަމުގައި ކުޅޭ ލެވަކޫސަނުން މި ވަނީ ބަލިނުވެ، ސީޒަނުގެ ހުރިހާ މުބާރާތެއްގައި 51 މެޗު ހަމަކޮށްފަ އެވެ. އެ ޓީމަށް އަދި ޖަރުމަނު ކަޕާއި ޔުއެފާ ޔޫރޮޕާ ލީގުގެ ޗެމްޕިއަންކަން ހޯދުމުގެ ފުރުސަތު އެބައޮތެވެ.
ޖަރުމަނު ލީގުގެ އެއް ވަނައިގައި ލެވަކޫސަން އޮތީ 34 މެޗުން، 90 ޕޮއިންޓާ އެކު އެވެ. ދެ ވަނައިގައި އޮތީ މިރޭ ބޮރޫޝިއާ މުންޗެންގްލަޑްބެކް 4-0 އިން ބަލިކުރި ސްޓުޓްގާޓް އެވެ. އެ ޓީމަށް ވަނީ 34 މެޗުން 73 ޕޮއިންޓް ލިބިފަ އެވެ.
އެންމެ ފަހުން 11 ފަހަރު ޗެމްޕިއަންކަން ހޯދި ބަޔާން މިއުނިކް މި ސީޒަން ނިންމާލަން ޖެހުނީ ތިން ވަަނައިގަ އެވެ. އެ ޓީމު މިރޭ ވަނީ ހޮފެންހައިމް އަތުން 4-2 އިން ބަލިވެފަ އެވެ. ބަޔާނަށް 34 މެޗުން ލިބިފައިވަނީ 72 ޕޮއިންޓެވެ.
ލީގުގައި މިރޭ، އައިންޓްރަކްޓް ފްރޭންކްފާޓާ 2-2 އިން އެއްވަރުކޮށް، ލިބުނު ޕޮއިންޓާ އެކު، ލައިޕްޒިގަށް ވަނީ ލީގުގެ ހަތަރު ވަނަ ލިބިފަ އެވެ. އެއީ، 34 މެޗުން 65 ޕޮއިންޓާ އެކު އެވެ. މާކޯ ރެއުސް، ޑޯޓްމަންޑް ދަނޑުގައި ކުޅުނު ފަހު މެޗުގައި، ޑަމްސްޓަޑް އަތުން ބޮރޫޝިއާ ޑޯޓްމަންޑް މޮޅުވީ، 4-0 އިންނެވެ. ޑޯޓްމަންޑް، ފަސް ވަނައިގައި އޮތީ، 34 މެޗުން 63 ޕޮއިންޓް ހޯދައިގެންނެވެ.
