ބެންގަލޫރު (މެއި 13) - އިންޑިއަން ޕްރިމިއާ ލީގު (އައިޕީއެލް)ގައި ރޭ ދެއްލީ ކެޕިޓަލްސް އަތުން 74 ލަނޑުން މޮޅުވެ، ރޯޔަލް ޗެލެންޖާސް ބެންގަލޫރު އިން ޕްލޭއޮފްގެ އުންމީދު ދަމަހައްޓައިފި އެވެ.
މި އަހަރުގެ އައީޕީއެލް ސީޒަންގައި ބެންގަލޫރުގެ ފެށުން ދަށްވިޔަސް، ފަހުން ކުޅުނު މެޗުތަކުގައި އެ ޓީމުން ވަނީ ނަތީޖާތައް ރަނގަޅުކޮށްފައެވެ. ރޭ ކެޕިޓަލްސް އަތުން މޮޅުވެ، ބެންގަލޫރު ވަނީ ޖެހިޖެހިގެން ފަސް މޮޅު ހަމަކޮށްފައެވެ.
މެޗުގައި ފުރަތަމަ ބެޓްކުރަން އަރައި، 20 އޯވަރުގެ ތެރޭގައި ނުވަ ވިކެޓަށް ބެންގަލޫރު އަށް ހެދުނީ 187 ލަނޑެވެ. އެންމެ ރަނގަޅަށް ކުޅުނީ 52 ލަނޑު ހެދި ރާޖަތު ޕަތިޑާރު އަދި 32 ލަނޑު ހެދި ކެމަރަން ގްރީނެވެ.
މި މެޗުގައި ބެންގަލޫރު ކޮޅަށް މެޗު އަނބުރާލުމުގައި ތަފާތު ދެއްކީ އެ ޓީމު ބޯލަރުންނެވެ. ކެޕިޓަލްސް އިން ކުޅެންއަރައި 19.1 އޯވަރުގެ ތެރޭގައި ހުރިހާ ކުޅުންތެރިން ނުބައިވެގެން ހެދުނީ 140 ލަނޑެވެ.
ބެންގަލޫރުގެ ބޯލަރުން ކަމަށްވާ ޔާޝް ޑަޔާލް 20 ލަނޑަށް ތިން ވިކެޓު ނެގިއިރު، ލޮކީ ފާގަސަން ވަނީ 23 ލަނޑަށް ދެ ވިކެޓު ނަގައިފަ އެވެ.
މި މޮޅާއެކު، ބެންގަލޫރު ވަނީ އައިޕީއެލް ތާވަލްގެ ފަސް ވަނަ އަށް ޖެހިލައިފަ އެވެ. ބެންގަލޫރަށް ބާކީ އޮތީ އެންމެ މެޗެކެވެ.
އައިޕީއެލްގެ ޕްލޭ އޮފްގެ ޖާގަ ލިބެނީ ލީގު ބުރުގެ ގަދަ ހަތަރު ޓީމަށެވެ. ބެންގަލޫރު އަށް ގަދަ ހަތަރެެއްގެ ފުރުސަތު އަދި އެބައޮތެވެ. އެކަމަކު، އެއީ އެހެން ޓީމުތަކުގެ ނަތީޖާ އަށް ބެލުމަށް ފަހު، ބެންގަލޫރުން ފަހު މެޗުގައި ޗެންނާއި ސުޕަ ކިންގްސް ބަލިކޮށްފިނަމަ އެވެ.
