މޯލްޑިވްސް ސާފިން އެސޯސިއޭޝަން (އެމްއެސްއޭ) އާއެކު ސީނިއާ އަދި ޖޫނިއާ ޓީމުތައް ހިމެނޭހެން ގައުމީ ސާފިން ޓީމުތަކުގެ އޮފިޝަލް ސްޕޮންސަރަށް ވުމަށް ވެފައިވާ އެއްބަސްވުން ބޭންކް އޮފް މޯލްޑިވްސް (ބީއެމްއެލް) އިން އިތުރުކޮށްފި އެވެ.
ބީއެމްއެލްއިން ބުނީ މި ޕާޓްނާޝިޕްގެ ދަށުން، ސާފިންގައި ޒުވާން މޮޅު ކުދިންގެ ހުނަރު ޕްރޮމޯޓު ކުރުމަށް އެމްއެސްއޭއިން ކޮންމެ އަހަރަކު ބާއްވާ ނޭޝަނަލް ޖޫނިއާ ސަރފިން ޗެންޕިއަންޝިޕަށް ވެސް ބީއެމްއެލްގެ އެހީތެރިކަން ލިބޭނެ ކަމަށެވެ.
މިކަމާ ގުޅޭ ގޮތުން ބީއެމްއެލްގެ ސީއީއޯ އަދި މެނޭޖިން ޑައިރެކްޓާ ކާލް ސްޓުމްކަ ވިދާޅުވީ ސާފިން އަކީ ރާއްޖޭގައި މަގުބޫލުކަން ހޯދަމުންދާ އަދި ކުރިއަރަމުންދާ ކުޅިވަރެއް ކަމަށާއި، ރާއްޖެ އާއި ރާއްޖޭން ބޭރުގެ ފަރާތްތަކުންވެސް މި ކުޅިވަރަށް ވަރަށް ބޮޑަށް ޝައުގުވެރިވާ ކަމަށެވެ.
"ސަރަހައްދީ އަދި ދުނިޔޭގެ ފެންވަރުގެ މުބާރާތްތަކުގައި ކާމިޔާބު ހޯދުމުގެ ހުނަރު ސަރފިންގެ އެތުލީޓުންގެ ފަރާތުން ފެނޭ. މީގެ ކުރިންވެސް އެތުލީޓުން ވަނީ އެކަން ހާމަކޮށްދީފައި،" ކާލް ސްޓުމްކަ ބުންޏެވެ.
ގައުމީ ސާފިން ޓީމުގެ ސްޕޮންސާ މުއްދަތު ބީއެމްއެލްއިން އިތުރު ކުރުން -- ފޮޓޯ: ބީއެމްއެލް
އެމްއެސްއޭގެ ރައީސް މުހައްމަދު ސަބާހު ވިދާޅުވީ ބީއެމްއެލްއާ ގުޅިގެން މި ޕާޓްނާޝިޕް ދެމެހެއްޓޭކަމީ ލިބޭ އުފަލެއް ކަމަށާއި، ބީއެމްއެލްއިން ސާފިންގެ ގައުމީ ޓީމުތަކަށް ދެއްވާ އެހީއާއި ރާއްޖޭގައި ކުޅިވަރު ކުރިއެރުވުމުގެ އިތުރުން ޒުވާން އެތުލީޓުން ކުރިއަރުވަން ކުރާ މަސައްކަތް އުފަލާއެކު ފާހަނގަކުރާ ކަމަށެވެ.
ރާއްޖޭގެ ކުޅިވަރު ކުރިއެރުވުމަށް އެހީތެރިކަން ފޯރުކޮށްދިނުމުގެ ގޮތުން ގައުމީ ކުޅިވަރު އެސޯސިއޭޝަންތަކާ ގުޅިގެން ޔޫތު ޑިވެލޮޕްމަންޓް ޕްރޮގްރާމްތަކާއި ޕާޓްނާޝިޕްތަކުގެ ދަށުން ބީއެމްއެލްއިން އަންނަނީ މުހިންމު ދަރުރެއް އަދާކުރަމުންނެވެ.
ބީއެމްއެލްއިން ވަނީ މޯލްޑިވްސް އޮލިމްޕިކް ކޮމިޓީއާ ގުޅިގެން ގައުމީ އަދި ބައިނަލްއަގްވާމީ ފެންވަރުގައި އެތުލީޓުން ކުރިއެރުވުމަށް ސްޕޯޓްސް ސްކޮލާޝިޕްވެސް ދީފަ އެވެ.
