ކުއަލަ ލަމްޕޫރް (11 މެއި) - ސެލަންގޯގެ ކުޅުންތެރިއަކަށް ދިން ނުރައްކާތެރި އެސިޑް ހަމަލާއާ އަކާ ގުޅިގެން ކުޅުންތެރިންގެ ސަލާމަތާއި ރައްކާތެރިކަން ކަށަވަރުނުވާތީ، ހުކުރު ދުވަހު ކުޅެން ހަމަޖެހިފައި އޮތް މެލޭޝިއާގެ ފުޓްބޯޅަ ސީޒަން ހުޅުވާ މެޗު ކުޅުމަށް ސެލަންގޯ އިން ބޭނުމެއްނުވިއެވެ. މެލޭޝިއާގެ ފުޓްބޯޅަ ސީޒަން ހުޅުވާ މެޗު ވަނީ އެހެންވެ ކެންސަލްކޮށްފައެވެ.
ސެލަންގޯ މެޗު ނުކުޅުމުން، އެ ޓީމަށް ދެކޮޅަށް ނުކުންނަން އޮތް ޖޮހޯރު ދާރުލް ތަޒީމް އަށް ވަނީ މެޗު ލިބިފައެވެ.
ސެލަންގޯ އަދި މެލޭޝިއާގެ ގައުމީ ޓީމުގެ ވިންގާ ފައިސަލް ހާލިމްގެ މޫނަށް އެސިޑް ޖެހީ މި މަހުގެ ފަސް ވަނަ ދުވަހު ޝޮޕިން މޯލެއްގެ ތެރޭގައި ބާޒާރު ކުރަން އުޅެނިކޮށެވެ. މި ހަމަލާއާ ގުޅިގެން އޭނާ އަށް ފަރުވާ ދެމުން އަންނަ އިރު، އޭނާގެ ހާލު ރަނގަޅުވަމުން އަންނަ ކަމަށް މެލޭޝިއާގެ ފުޓްބޯލް އެސޯސިއޭޝަނުން ބުނެއެވެ. އެކަމަކު އޭނާ އަދިވެސް އޮތީ އައިސޫގައެވެ.
ސެލަންގޯ އިން އެދުނީ ސީޒަން ހުޅުވާ މެޗު ފަސްކުރުމަށެވެ. އެކަމަކު ކުޅުންތެރިންގެ ސަލާމަތާއި ރައްކާތެރިކަން ކަށަވަރުކުރާނެކަމުގެ ޔަގީންކަން މެލޭޝިއާގެ ފުލުހުން ދިނުމާއެކު، މެލޭޝިއާ ފުޓްބޯލް އެސޯސިއޭޝަނުން ނިންމީ މެޗު ކުރިއަށް ގެންދާށެވެ. އެކަމަކު މެޗު ކުޅުމަށް ސެލަންގޯ އިން ބޭނުމެއްނުވިއެވެ.
ފައިސަލްގެ އިތުރުން، މެލޭޝިއާގެ ގައުމީ ޓީމުގެ އިތުރު ދެ ކުޅުންތެރިންނަށްވެސް ވަނީ މި މަހުގެ ހަމަލާތައް އަމާޒުވެފައެވެ.
ޖޮހޯރު އަދި މެލޭޝިއާގެ ގައުމީ ޓީމުގެ މިޑްފީލްޑަރު ސަފީގް ހާރިމް ކާރުގައި އިންދައި، މީހަކު ވަނީ އޭނާގެ ކާރަށް ހަމަލާދީފައެވެ. އަދި މެލޭޝިއާގެ ގައުމީ ޓީމުގެ ކުޅުންތެރިއެއް ކަމަށްވާ އަކްޔާރު ރަޝީދުގެ ގެ ކައިރިން ހިނގި ވައްކަމެއްގައި، އޭނާ އަށް ވަނީ ބަޔަކު ހަމަލާ ދީފައެވެ.
މި ހަމަލާތަކުގެ ސަބަބެއް ނުވަތަ މިއީ ގުޅިފައިވާ ހަމަލާތަކެއްކަން އަދި ފުލުހުންނަށް ސާފެއްނުވެއެވެ.
