މާޒިޔާ ސްޕޯޓްސް އެންޑް ރެކްރިއޭޝަން ކުލަބް ދޫކޮށް، ހުސެއިން ނިހާން (ނިހާޓް)، އޮޑި ސްޕޯޓްސް ކުލަބަށް ބަދަލުވެއްޖެ އެވެ.
ނިހާޓް، އޮޑި ސްޕޯޓްސް ކްލަބަށް ބަދަލުވިކަން އިއުލާނުކުރި އެ ކްލަބްގެ ނަން ރީބްރޭންޑް ކުރަން މިރޭ ސެންޓްރަލް ޕާކުގައި ބޭއްވި އިވެންޓުގަ އެވެ.
ލ. މައިބައިދޫ އަށް އުފަން، ނިހާޓް އަންނަނީ 2019 ވަނަ އަހަރުން ފެށިގެން މާޒިޔާ އަށް ކުޅެމުންނެވެ. ގައުމީ ފުޓްބޯޅަ ޓީމާ އެކު، 2018 ވަނަ އަހަރު ސާފް ޗެމްޕިއަންޝިޕް ކާމިޔާބުކުރި މިޑްފީލްޑަރު، މީގެ ކުރިން ވަނީ ކުލަބް ވެލެންސިއާ އަދި ވިކްޓަރީ ސްޕޯޓްސް ކުލަބަށް ވެސް ކުޅެފަ އެވެ.
ނިހާޓް ވަނީ ވިކްޓަރީ އަށް ވެސް މީގެ ކުރިން ކުޅެފަ އެވެ.
މިރޭ އޮޑި ސްޕޯޓްސް ކުލަބުން ބޭއްވި ރަސްމިއްޔާތުގައި ނިހާޓް ވަނީ އެ ކުލަބަށް ސޮއި ކޮށްފަ އެވެ. ނިހާޓްގެ އިތުރުން އޮޑި ސްޕޯޓްސް ކުލަބުން ވަނީ މުހައްމަދު ރަޝީދު (ހޮކޭ)ގެ ސޮއި ވެސް ހޯދައިފަ އެވެ.
ރިޓަޔަމަންޓްގައި ހުރި ހޮކޭ އޮޑި ސްޕޯޓްސް ކުލަބާ އެކު ދެ ވަނަ ޑިވިޝަނުގައި ވެސް ކުޅެފައިވެ އެވެ.
ނިހާން އާއި ހޮކޭގެ އިތުރުން އޮޑި ސްޕޯޓްސް ކުލަބަށް ވަނީ ކުރިން ސުޕަ ޔުނައިޓެޑް ސްޕޯޓްސް (ސަސް) އާއި ޓީސީ ސްޕޯޓްސް ކުލަބަށް ކުޅުނު ޒުވާން ފޯވާޑް ހައިޝަމް ރަޝީދު ވެސް ސޮއި ކޮށްފަ އެވެ. ހައިޝަމްގެ އިތުރުން، ވިކްޓަރީ އަށް ކުރިން ކުޅުނު ސަޔަމް ސައީދު ވެސް ވަނީ ސޮއިކޮށްފަ އެވެ.
ދެ ވަނަ ޑިވިޝަނުގައި ވެސް އޮޑި ސްޕޯޓްސް ކުލަބުން ފެނުނު ރާހިލް ރަޝީދު (ރާއްކޮ) ވެސް އަންނަ އަހަރު ކުޅޭނީ އޮޑި ސްޕޯޓްސް ކުލަބަށެވެ. އަދި ކުރިން ކްލަބް ގްރީން ސްޓްރީޓްސް އަށް ކުޅުނު މުހައްމަދު މިންވާލް އާއި މުހައްމަދު މުސްލިހު (މުއްޓި) ވެސް ސޮއިކުރީ ދެ ވަނަ ޑިވިޝަންގެ ޗެމްޕިއަން، އޮޑި އަށެވެ.
މިދިޔަ ސީޒަންތަކުގައި މާޒިޔާއިން ހޯދި ކާމިޔާބީތަކުގައި ނިހާޓް ވަނީ މުހިންމު ދައުރެއް އަދާކޮށްފަ އެވެ. މީގެ އިތުރުން 2018 ވަނަ އަހަރު ރާއްޖެއިން ސާފް ޗެމްޕިއަންޝިޕް ކާމިޔާބުކުރިއިރު, ނިހާޓް ވަނީ ގައުމީ ޓީމުގެ މެދުތެރޭގައި ތަފާތު މޮޅު ކުޅުމެއް ދައްކައިފަ އެވެ.
