މެޑްރިޑް (މެއި 7) - ގަދަ ރޯގައެއްގައި ވޭންތަކެއް ތަހައްމަލުކުރަމުން ވެސް، ހިތްވަރާ އެކު ކުޅެ، މެޑްރިޑް އޯޕަން ޗެމްޕިއަންކަން ހޯދައި، ދުނިޔޭގެ އަށް ވަނައިގައި އޮތް ރަޝިއާގެ އަންޑްރޭ ރުބްލޭވް، ބައްޔަށް ވުރެ ގަދަވެވިދާނެކަން ސާބިތުކޮށްދީފި އެވެ.
"މިދިޔަ ނުވަ ވަރަކަށް ދުވަހު އަހަރެން އުޅުނު ހާލު ބުނެދެން ފަސޭހައެއް ނޫން. އަހަންނަށް ހަގީގަތުގައި މި ބުނަން އުޅޭ ވާހަކަ ފަސޭހައެއް ނޫން. އަހަންނަށް ގަބޫލެއް ނުކުރެވޭ އަހަރެން މިދިޔަ ދުވަސްތަކުގައި އެ ގޮތަށް އުޅެފައި، މި ވަގުތު ތަށްޓެއް ހިފައިގެން ހުރެ ވާހަކަ ދައްކަން ލިބޭނެ ކަމަށް،" ރުބްލޭވް، 26، ބުންޏެވެ.
ދުނިޔޭގެ ރޭންކިން ތިން ވަނައިގައި އޮތް ސްޕެއިނުގެ ކާލޯސް އަލްކަރާޒް އަތުން މޮޅުވި، ރުބްލޭވް ވަނީ ފައިނަލުގައި ފަހަތުން އަރައި، ފެލިކްސް އޯގާ އަލިއާސްމޭ ބަލިކޮށްފަ އެވެ. އެއީ، 4-6 7-5 7-5 އިން ސެޓުތައް ގެންގޮސްގެންނެވެ.
"ވަރަށް ބޮޑު ޝުކުރެއް ހައްގުވޭ އަހަރެންގެ ޑޮކްޓަރުންނަށް. އަހަރެން މި ކަމުގެ، މި ކާމިޔާބީގެ ފުލް ކްރެޑިޓް ދޭން ބޭނުމީ ޑޮކްޓަރުންނަށް. އެ މީހުންނަށް ކުރެވުނު ހުރިހާ ކަމެއް ކޮށްގެން ވެސް އަހަރެން ކޯޓާ ހަމައަށް ގެންގޮސް، ހިތްވަރެއްލައިގެން ކުޅެވޭނެ ގޮތް ހަދައިދިން،" ދެ ވަނަ މާސްޓާސް ތަށި ހޯދި ރުބްލޭވް ބުންޏެވެ.
މެޑްރިޑް އޯޕަން އަށް އައުމުގެ ކުރިން އެންމެ ފަހުން ކުޅުނު ހަތަރު މެޗުން ރުބްލޭވް ވީ ބައްޔެވެ. އެކަމަކު، މި މުބާރާތުގައި ރުބްލޭވް ހޯދި "ކެރިއަރުގެ އެންމެ ހާއްސަ ކާމިޔާބީ"އާ އެކު، ތިން ހަފްތާ ތެރޭގައި ފަށާ ފްރެންްޗް އޯޕަން، ގްރޭންޑް ސްލޭމް މުބާރާތަށް ދާނީ އިތުބާރާ އެކު އެވެ.
