ރޯމް، އިޓަލީ (މެއި 3) - ޔޫރޮޕާ ލީގުގެ ސެމީ ފައިނަލްގެ ފުރަތަމަ ލެގުގައި ރޯމާ ދަނޑުގައި 2-0 އިން މޮޅުވުމަށް ފަހު، ބަޔާ ލެވަކޫސަން ފައިނަލުގެ ޖާގައަކާ ފިޔަވަޅަކާ ގާތަށް ޖެހިލައިފި އެވެ.
އަންނަ ހަފްތާގައި ލެވަކޫސަން ދަނޑުގައި ކުޅޭ މެޗު އެއްވަރުކޮށްލައިގެން ނޫނީ، އެއް ގޯލުގެ ފަރަގުން އެ ޓީމު ބަލިވިޔަސް، ފައިނަލުގެ ޖާގަ ލިބޭނެ އެވެ. އަނެއް ސެމީ ފައިނަލުގައި، ފްރާންސްގެ މާސޭ ވަނީ އިޓަލީގެ އެޓަލަންޓާއާ 1-1 އިން އެއްވަރުވެފަ އެވެ.
ރޯމްގެ އޮލިމްޕިކް ސްޓޭޑިއަމްގައި ކުޅުނު މެޗުގެ 28 ވަނަ މިނިޓްގައި ލެވަކޫސަނަށް ލީޑުނަގައިދިނީ ފްލޯރިއަން ވާޓްޒް އެވެ. މިއީ މި ސީޒަނުގައި ވާޓްޒް ޖެހި 18 ވަނަ ލަނޑެވެ. ލެވަކޫސަންގެ ދެ ވަނަ ގޯލު ޖެހީ، 73 ވަނަ މިނިޓްގައި ރޮބާޓް އަންޑްރިޗް އެވެ. މިއީ އޭރިއާބޭރުން ގޯލުގެ މަތީ ކަނަށް ބޯޅަ ފޮނުވާލައިގެން ޖެހި ލަނޑެކެވެ.
މުޅި މެޗުގައި ވެސް ރޯމާ އިން ގޯލާ ސީދާކޮށް ފޮނުވާލީ ދެ ބޯޅަ އެވެ. އެ ގޮތުން، ފުރަތަމަ ޝޮޓް ރޮމެލޫ ލުކާކޫ ޖެހިއިރު، އަނެއް ހަމަލާ ފޮނުވާލީ ޓަމީ އަބްރަހަމް އެވެ. މީގެ ތެރެއިން ރަނގަޅު ފުރުސަތު ލިބުނީ އަބްރަހަމް އަށެވެ.
ޖަރުމަނު ލީގުގެ ޗެމްޕިއަންކަން ކަށަވަރުކޮށް، ޖަރުމަނު ކަޕް ފައިނަލުން ވެސް ފުރުސަތު ހޯދާފައިވާ ޒަބީ އަލޮންސޯ ކޯޗުކޮށްދޭ ލެވަކޫސަނުން ސީޒަނުގައި މިހާތަނަށް ކުޅުނު 47 މެޗުން ބަލިވެފައިނުވެ އެވެ.
ޔުއެފާ ކޮންފަރެންސް ލީގުގެ ސެމީ ފައިނަލް މެޗުތަކުގެ ފުރަތަމަ ލެގަށް ބަލާއިރު، އެސްޓަން ވިލާ ވަނީ އަމިއްލަ ދަނޑުގައި 4-2 އިން އޮލިމްޕިއާކޯސް އަތުން ބަލިވެފަ އެެވެ. އަނެއް ސެމީގައި ކްލަބް ބްރޫޖް އަތުން ފިއޮރެންޓީނާ އަމިއްލަ ދަނޑުގައި މޮޅުވީ 3-2 އިންނެވެ.
