ލަންޑަން (މެއި 2) - އިނގިރޭސި ޕްރިމިއާ ލީގުގެ ފަސް ވަނައިގައި ނިންމާ ޓީމަކަށް އަންނަ ސީޒަނުގެ ޗެމްޕިއަންސް ލީގުން ޖާގަ ލިބުމަށް އޮތް ދޮރު ބަންދުވެއްޖެ އެވެ.
ޗެމްޕިއަންސް ލީގުގެ ސެމީ ފައިނަލް ފުރަތަމަ ލެގުގައި ޖަރުމަނުގެ ބޮރޫޝިއާ ޑޯޓްމަންޑުން ރޭ ޕީއެސްޖީ އަތުން މޮޅުވުމާ އެކު، މި ނަތީޖާ އިން ޔޫރަޕްގެ މުބާރާތަކުގައި ޖަރުމަނުގެ ކްލަބްތަކުގެ އިންޑެކްސް ވަނީ މައްޗަށް ޖެހިލައިފަ އެވެ. މިއާ އެކު، އިޓަލީ އެކޭ އެއް ގޮތަށް ޖަރުމަނަށް ވެސް ވަނީ ޗެމްޕިއަންސް ލީގުން ފަސް ވަނަ ޖާގައެއް ލިބިފަ އެވެ.
ޖަރުމަނަށް އިތުރު ޖާގައެއް ލިބުމާ އެކު، ޕްރިމިއާ ލީގުގެ ފަސް ވަނަ އަށް ދާ ޓީމަށް ޗެމްޕިއަންސް ލީގުގެ ޖާގަ ލިބެން އޮތް މަގު ބަންދުވީ އެވެ. އެއީ، ޑޯޓްމަންޑުން ރޭ ހޯދި ނަތީޖާއާ އެކު، ޖަރުމަނު ކްލަބްތަކުގެ އިންޑެކްސް ވަނީ 18.356 އަށް އަރައިފަ އެވެ. ޔޫރަޕްގައި މި ވަގުތު އޮތް ހަމައެކަނި އިނގިރޭސި ކްލަބް، އެސްޓަން ވިލާ އިން ޔުއެފާ ކޮންފަރެންސް ލީގުގެ ތަށި ހޯދިޔަސް، އިނގިރޭސި ޓީމުތަކަށް ހޯދޭނެ އިންޑެކްސް އަކީ، 18.25 އެވެ. އެހެންކަމަށް ވުމާ އެކު، ދެން އިނގިރޭސި ޓީމުތަކަށް އިތުރަށް ޔޫރަޕްގެ މަތީ ފަންތީ ކްލަބް ފުޓްބޯޅަ މުބާރާތުން ލިބޭނެ ޖާގައެއް ނެތެވެ.
އިޓަލީ އާއި ޖަރުމަނަށް ޗެމްޕިއަންސް ލީގުގެ ހަ ވަނަ ޖާގައެއް ލިބުމުގެ ފުރުސަތު ވެސް އެބައޮތެވެ. އެއީ، ޑޯޓްމަންޑުން ޗެމްޕިއަންސް ލީގު ކާމިޔާބުކޮށް، ޖަރުމަނު ލީގުގެ ގަދަ ފަހަކުން ބޭރުން ސީޒަން ނިންމުމާއި، އެޓަލަންޓާ ނޫނީ ރޯމާ އިން ޔޫރޮޕާ ލީގު ކާމިޔާބުކޮށްފިނަމަ އެވެ.
ޗެމްޕިއަންސް ލީގާއި ޔޫރޮޕާ ލީގުގެ ޗެމްޕިއަން، އޮޓޮމެޓިކުން ޖެހިގެން އަންނަ ސީޒަނުގެ ޗެމްޕިއަންސް ލީގަށް ކޮލިފައިވާނެ އެވެ.
