ނިއު ދިއްލީ، އިންޑިއާ (މެއި 1) - އަންނަ މަހު ފަށާ ޓީ20 ކްރިކެޓް ވޯލްޑް ކަޕަށް އިންޑިއާ އިން ނެގި ސްކޮޑުން، ދިއްލީ ކެޕިޓަލްސްގެ ކެޕްޓަން، ރިޝަބް ޕާންޓް އަށް ފުރުސަތު ދިންއިރު، ލަކްނައު ސުޕަ ޖަޔަންޓްސްގެ ކެޕްޓަން، ކޭއެލް ރާހުލް ސްކޮޑުން ބާކީކޮށްފި އެވެ.
ވިކެޓްކީޕަރެއްގެ ގޮތުުގައި ވެސް ތަފާތު ދައްކާ، ޕާންޓް، 26، ސީރިއަސް އަނިޔާތަކަކަށް ފަހު، ކުޅުމަށް އެނބުރި އައީ މިހާރު ކުރިއަށްދާ އިންޑިއަން ޕްރިމިއާ ލީގުގަ އެވެ. އެއީ، 2022 ވަނަ އަހަރުގެ ޑިސެމްބަރު މަހު، ހިނގި ނުރައްކާތެރި ކާރު އެކްސިޑެންޓެއްގެ ސަބަބުން ލިބުނު އަނިޔާ އިން ރަނގަޅުވާން ނެގި އަހަރަކަށް ވުރެ ގިނަ ދުވަހަށް ފަހު އެވެ.
ޕާންޓް ވަނީ، މިހާރު ކުރިއަށްދާ އިންޑިއަން ޕްރިމިއާ ލީގުގައި ކުޅުނު 11 މެޗުން 398 ލަނޑު ހަދައިފަ އެވެ.
އިންޑިއާ ސްކޮޑާއި ރިޒާވް ކުޅުންތެރިންގެ ތެރެއިން ވެސް ފުރުސަތު ނުލިބުނު މަޝްހޫރު ކުޅުންތެރިއަކީ، ކޭއެލް ރާހުލް އެވެ. އިންޑިއަން ޕްރިމިއާ ލީގުގައި މި ފަހަރު މޮޅު ކުޅުމެއް ދައްކަމުން އަންނަ ކޭއެލް ރާހުލްގެ ބަދަލުގައި އިންޑިއާ ސްކޮޑަށް ނެގީ، ރާޖަސްތާން ރޯޔަލްސްގެ ކެޕްޓަން، ސަންޖޫ ސެމްސަން އެވެ.
ސަންޖޫގެ ކެޕްޓަންކަމުގައި ރާޖަސްތާން މި ވަގުތު އޮތީ އިންޑިއަން ޕްރިމިއާ ލީގުގެ ތާވަލުގެ އެއް ވަނައިގަ އެވެ.
އަމިއްލަ ސަަބަބުތަކާ ހުރެ، އެންމެ ފަހުން ނެގި އިންޑިއާ ސްކޮޑުން ވަކިވި، ވިރާތު ކޯލީ އަށް މި ފަހަރުގެ ޓީމުން ވަނީ ފުރުސަތު ދީފަ އެވެ. އެކަމަކު، ގުޖުރާތު ޓައިޓަންސްގެ ކެޕްޓަން، ޝުބްމަން ގިލް ލައްވާލީ ރިޒާވް ކުޅުންތެރިންގެ ތެރޭގަ އެވެ.
އިންޑިއާ ޓީމުގެ ކެޕްޓަނަކަށް ރޯހިތު ޝަރްމާ ހަމަޖެއްސިއިރު، ވައިސް ކެޕްޓަނަކީ، 10 އަހަރަށް ފަހު ރޯހިތު އަތުން މުމްބައި އިންޑިއަންސް ކެޕްޓަންކަން ނެގުމަށް ފަހު، އެ މަގާމު ދިން، ހާޑިކް ޕާންޑްޔާ އެވެ.
ވެސްޓް އިންޑީސް އާއި އެމެރިކާގައި ކުރިއަށްދާ މި ފަހަރުގެ ޓީ20 ވޯލްޑް ކަޕްގައި އިންޑިއާ ކުޅޭ ފުރަތަމަ މެޗު އޮންނާނީ ޖޫން ފަސް ވަނަ ދުވަހު އަޔަލެންޑާ ދެކޮޅަށެވެ. އިންޑިއާގެ އެންމެ ފޯރިގަދަ ކުރިމަތިލުމަކަށް ވާނީ ޖޫން ނުވަ ވަނަ ދުވަހު ޕާކިސްތާނާ ކުޅޭ މެޗެވެ.
