މުލަންޕޫރު، އިންޑިއާ (އޭޕްރީލް 19) - އިންޑިއަން ޕްރިމިއާ ލީގު (އައިޕީއެލް) ގައި ޕަންޖާބް ކިންގްސް އަތުން ނުވަ ލަނޑުން މޮޅުވެ، މުމްބައި އިންޑިއަންސް އިން ޕްލޭއޮފްގެ ޖާގައިގެ އުންމީދު ދަމަހައްޓައިފި އެވެ.
ފަސް ފަހަރު ޗެމްޕިއަންކަން ހޯދާފައިވާ މުމްބައި މި ފަހަރުގެ ސީޒަން ފެށީ ދަށްކޮށެވެ. އެކަމަކު، އާ ކެޕްޓަން، ހާޑިކް ޕާންޑްޔާގެ ލީޑަޝިޕާ އެކު، މުމްބައި އަންނަނީ މަޑުމަޑުން ފޯމަކަށް އެޅެމުންނެވެ. އެ ގޮތުން، ރޭގެ މެޗާ އެކު، މުމްބައި މި ވަނީ ހަތް މެޗުން ތިން ވަނަ މޮޅު ހޯދައިފަ އެވެ.
މަހަރާޖާ ޔަދަވިންދުރަ ސިންގް އިންޓަނޭޝަނަލް ސްޓޭޑިއަމްގައި ރޭ ކުޅުނު މެޗުގައި، ޕަންޖާބު ކިންގްސް އަށް ޓޮސް ދިމާވުމުން އެ ޓީމުން ނިންމީ ކުޅެން އަރާށެވެ. އެ ގޮތުން، 19.1 އޯވަރުގެ ތެރޭގައި ޕަންޖާބުގެ ހުރިހާ ކުޅުންތެރިން ނުބައިވިއިރު، އެ ޓީމަށް ހެދުނީ، 183 ލަނޑެވެ. އެ ޓީމުން އެންމެ ރަނގަޅު ކުޅުމެއް ދެއްކީ، 28 ބޯޅަ އަށް 61 ލަނޑު ހެދި އާޝުތޯޝް ޝަރްމާ އެވެ.
މި އިނިންގްސްގައި މުމްބައިގެ ޖަސްޕްރީތު ބުމްރާ އާއި ޖެރާލްޑް ކޯޓްޒީ، ކޮންމެ ކުޅުންތެރިއަކު ވަނީ ތިން ވިކެޓް ނަގައިފަ އެވެ.
މުމްބައި މޮޅުވީ ޖަވާބުގައި ކުޅެން އަރައި، 20 އޯވަރުގެ ތެރޭގައި ހަތް ކުުޅުންތެރިން ނުބައިވެގެން 192 ލަނޑު ހަދައިގެންނެވެ.
މެޗު ފަށައިގެން، މުމްބައިގެ އޯޕަނިން ބެޓްސްމަނުންގެ ގޮތުގައި އެރީ، އިޝާން ކިޝަން އާއި ރޯހިތު ޝަރްމާ އެވެ. އިޝާން އަށް ލަނޑަށް ނުބައިވިއިރު، ރޯހިތު ނުބައިވީ 36 ލަނޑަށެވެ. މުމްބައި މޮޅުކޮށްދޭން މި މެޗުގައި ތަފާތަކަށްވީ ސޫރްޔަކުމާރް ޔާދަވް އެވެ. އޭނާ ވަނީ 53 ބޯޅައިން 78 ލަނޑު ހަދައިފަ އެވެ.
ޕަންޖާބުން މި އިނިންގްސްގައި، ހަރްޝަލް ޕަޓޭލް ތިން ވިކެޓް ނެގިއިރު، ޓީމުގެ ކެޕްޓަން، ސޭމް ކަރަން ވަނީ ދެ ވިކެޓް ނަގައިފަ އެވެ.
މި މޮޅާ އެކު މުމްބައި އޮތީ ހަތް ވަނައިގަ އެވެ. ލީގު ބުރު ނިމޭއިރު މުބާރާތުން ކުރިއަށްދެވޭނީ، ގަދަ ހަތަރަކަށެވެ.
އައިޕީއެލްގައި މިރޭ ކުޅޭ މެޗުގައި، ލަކްނައު ސުޕަ ޖަޔަންޓްސް ކުޅޭނީ ޗެންނާއި ސުޕަ ކިންގްސްއާ އެވެ. ޗެންނާއި ތިން ވަނައިގައި އޮތްއިރު، ލަކްނައު އޮތީ ފަސް ވަނައިގަ އެވެ.
