އިސްތަންބޫލް (އޭޕްރީލް 2) - ތުރުކީގެ ސުޕަ ލީގުން ވަކިވުމާމެދު ގޮތެއް ނިންމުމަށް މެމްބަރުންގެ މެދުގައި ފެންނަ ނުފެންނަ ވޯޓެއް ނެގުމަށް ފެނަބާޗޭ އިން ނިންމައިފި އެވެ.
ތުރުކީ ސުޕަ ލީގުން ވަކިވުމަށް ފެނަބާޗޭ އިން ވިސްނީ މިދިޔަ މަހު ލީގުގައި ޓްރަބްޒޮންސްޕޯއާ ދެކޮޅަށް ކުޅުނު މެޗުގައި ފެނަބާޗޭގެ ކުޅުންތެރިންނަށް ޓްރަބްޒޮންސްޕޯގެ ސަޕޯޓަރުން ހަމަލާ ދިނުމުންނެވެ.
ލީގުން ވަކިވުމާމެދު ވިސްނަމުންދާ ކަމަށް އެ ހަމަލާއަށް ފަހު ފެނަބާޗޭ އިން ވަނީ ބުނެފަ އެވެ.
ފެނަބާޗޭ އިން ވަނީ އެ ކްލަބުގެ އެކްސްޓްރާ އޯޑިނަރީ ބައްދަލުވުމެއް އަންގާރަ ދުވަހު ބޭއްވުމަށް ނިންމައިފަ އެވެ. މި ބައްދަލުވުމުގައި ތުރުކީ ލީގުން ވަކިވުމާ މެދު ކްލަބުގެ މެމްބަރުންގެ މެދުގައި ފެންނަ ނުފެންނަ ވޯޓެއް ނަގާނެ އެވެ.
ތުރުކީ ލީގުގެ ޗެމްޕިއަންކަން 19 ފަހަރު ހޯދާފައިވާ ފެނަބާޗޭ މި ވަގުތު އޮތީ ތުރުކީ ލީގުގެ ދެވަނައިގައެވެ. އެއްވަނައިގައި އޮތް ގަލަޓަސަރާއީ އޮތީ ފެނަބާޗޭ އަށްވުރެ 2 ޕޮއިންޓް ކުރީގައެވެ.
މި ފަހަކަށް އައިސް ތުރުކީ ލީގުގައި ވަނީ ގިނަ މައްސަލަތަކެއް ފެންމަތިވެފައެވެ. އޭގެ ތެރޭގައި ކްލަބެއްގެ ރައީސެއް ރެފްރީއަކަށް ހަމަލާ ދިން މައްސަލައެއް ހިމެނެއެވެ. ފެނަބާޗޭ ލީގުން ވަކިވާން ނިންމައިފިނަމަ، ތުރުކީގެ ލީގަށް އޭގެ އަސަރުކުރާނެ އެެވެ.
