ރައީސުލްޖުމްހޫރިއްޔާ ޑރ.މުހައްމަދު މުއިއްޒުއާ ސީދާ ސުވާލު ކުރެވޭ "ރައްޔިތުންގެ އަޑު" ޕޯޓަލް މިރޭ ސަލްޓަން ޕާކުގައި ބޭއްވި ޕަބްލިކް ފޯރަމްގައި އިފްތިތާހުކޮށްފި އެވެ.
އީފާސް ބޭނުންކޮށްގެން ލޮގިން ކުރެވޭ މި ޕޯޓަލް މެދުވެރިކޮށް ރައްޔިތުން ކުރަން ބޭނުންވާ ސުވާލުތަކާއި، ޝަކުވާތަކުގެ އިތުރުން ބޭނުންވާ ހިޔާލުތައްވެސް ސީދާ ރައީސްއަށް ހުށަހެޅެ އެވެ.
ޕޯޓަލް އިފްތިތާހު ކޮށްދެއްވުމަށްފަހު ރައީސް މުއިއްޒު ވިދާޅުވީ ރައްޔިތުންގެ ހާދިމެއް ގޮތަށް މަސައްކަތް ކުރާއިރު ރައްޔިތުންނާ ގާތުން މަސައްކަތް ކުރުމަށް މަގު ފަހި ކުރަން ޖެހޭނެ ކަމަށާއި، އެގޮތުން މި ޕޯޓަލް މެދުވެރިކޮށް ރައްޔިތުން ބޭނުންވާ ކޮންމެ ކަމެއް އެމަނިކުފާނު ކައިރިން އެއްސެވޭނެ ކަމަށެވެ.
"ޕޯޓަލްއަށް ފޮނުވާ ސުވާލުތަކަށް ޖަވާބު ދޭނީ އަޅުގަނޑު. ދެފުށް ފެންނަ ޖަވާބުދާރީވާ ސަރުކާރެއް ގާއިމުކުރާނެ ކަމަށް އަޅުގަނޑު ވައުދުވީ. ޖަވާބު ދޭނަން އިރާދަކުރެއްވިޔާމުން. ޖަވާބު ނުދީ ކަންކަން ވާނުވާ ނޭގޭ ގޮތަކަށް އޮތުމަކީ އަޅުގަނޑު ކުރާ ހަމައެއް ނޫން," ރައީސް މުއިއްޒު ވިދާޅުވި އެވެ.
މި ފުރުސަތުގެ ބޭނުން ހިފުމަށް އެދޭކަން ފާހަގަކުރައްވާ ރައީސް މުއިއްޒު ވިދާޅުވީ ފުރުސަތުގެ ބޭނުން ހިފައިފިނަމަ އޮޅުން ނުފިލައި އެއްވެސް ކަމެއް ނޯންނާނެ ކަމަށާއި، ލިބޭނީ ހަގީގީ ތެދު މައުލޫމާތު ކަމަށެވެ.
ރައްޔިތުން ބޭނުންވާ ކަންކަން ސީދާ ރައީސްއަށް ހުށަހެޅޭ ގޮތަށް ހާއްސަ ޕޯޓަލްއެއް ހަދަން ނިންމާފައިވާ ކަން ރައީސް މުއިއްޒު އިއުލާން ކުރެއްވީ މި މަހު ރިޔާސީ ބަޔާން އިއްވަމުންނެވެ.
ރިޔާސީ ބަޔާނުގައި ރައްޔިތުންނާ އަދި މީޑިއާތަކާ ވީހާވެސް ގާތުން މަސައްކަތް ކުރަން ބޭނުންވާކަން ރައީސްގެ ރިޔާސީ ބަޔާނުގައި ވިދާޅުވެފައިވާއިރު، ރައީސް އޮފީހުގެ ތަރުޖަމާނެއް ނެތި 50 އަށްވުރެ ގިނަ ދުވަސް ވެފައިވާތީ އެކަމުގެ ކަންބޮޑުވުން ނޫސްވެރިން އަންނަނީ ފާޅު ކުރަމުންނެވެ.
މީގެއިތުރުން ނޫސްވެރިން ބޭނުންވާ ސުވާލުތަކަށް މިނިސްޓްރީތަކުން އަދި ރައީސް އޮފީހުން ލިބުމަށް ދަތިތައް ކުރިމަތިވާއިރު، ރައީސް އޮފީހުން ބާއްވާ ނޫސްވެރިންގެ ބައްދަލުވުންތަކުގައި ބޭނުންވާ ސުވާލުތަކަށް ޖަވާބު ލިބޭތީވެސް ނޫސްވެރިން އަންނަނީ ކަންބޮޑުވުން ފާޅުކުރަމުންނެވެ.
