ރާއްޖޭގައި އިންޑިއާ ސިފައިން އޮޕަރޭޓްކުރާ ވައިގެ އުޅަނދުތަކުގެ އޮޕަރޭޝަން ނުހުއްޓޭނެ "ވޯކަބަލް ސޮލިއުޝަން" އެއް ހޯދަން ދެގައުމުން މިއަދު ބޭއްވި ބައްދަލުވުމެއްގައި މަޝްވަރާކުރި ކަމަށް އިންޑިއާގެ އެކްސްޓާނަލް މިނިސްޓްރީން ބުނެފި އެވެ.
ރާއްޖޭގައި ތިބޭ އިންޑިއާ ސިފައިން އަނބުރާ ފޮނުވައިލުމާއި ދެގައުމު ގުޅުމާ ބެހޭ އެހެން ގިނަ ކަންތައްތަކާ މަޝްވަރާކުރަން އުަފައްދާފައިވާ "ކޯގްރޫޕް" އިން ފޮރިން މިނިސްޓްރީގަައި މިއަދު ބޮޑު ބައްދަލުވުމެއް ބޭއްވި އެވެ. އެ ބައްދަލުވުމަށް ފަހު ރާއްޖޭން ނެރުނު ބަޔާނެއްގައި ބުނީ އިންޑިއާ ސިފައިން އަނބުރާ ގެންދިއުން އަވަސްކުރަން މިއަދުގެ މަޝްވަރާތަކުގައި އިންޑިއާއިން އެއްބަސްވި ކަަމަށެވެ.
އެހެން ނަމަވެސް އެ ބައްދަލުވުމާ ބެހޭ ގޮތުން އިންޑިއާއިން ނެރުނު ބަޔާނުގައި އެކަމާ ބެހޭ ގޮތުން ވަކި އެއްޗެއް ނުބުނެ އެވެ. އިންޑިއާގެ އެކްސްޓާނަލް އެފެއާޒް މިނިސްޓްރީގެ ބަޔާނުގައި ބުނީ ބަލިމީހުން އެއްތަނުން އަނެއް ތަނަށް އުފުލުމާއި އިންސާނީ އެހީދޭން ވައިގެ އުޅަނދުތަކުން ހިންގާ އޮޕަރޭޝަންތައް ނުހުއްޓި ކުރިއަށް ގެންދެވޭނެ ހައްލަކާ މެދު މަޝްވަރާކުރި ކަަމަށެވެ.
ރާއްޖޭގައި ތިބޭ އިންޑިއާ ސިފައިންނަކީ ކުރީގެ ސަރުކާރުން ބުނެފައިވާ ގޮތުގައި އެގައުމުން ރާއްޖެއަށް "ހަދިޔާކޮށްފައިވާ" ދެ ހެލިކޮޕްޓަރާއި ޑޯނިއާ މަތިންދާބޯޓް އޮޕަރޭޓްކުރުމަށެވެ. އެމީހުން ހިމެނޭ ގޮތުން ރާއްޖޭގައި ތިބޭ އިންޑިއާގެ ހުރިހާ ސިފައިން އަނބުރާ ފޮނުވައިލުމަކީ ރައީސް ޑރ.މުހައްމަދު މުއިއްޒުގެ ރިޔާސީ ވައުދެކެވެ.
ރާއްޖެ-އިންޑިއާ ކޯ ގްރޫޕުން މިއަދު ބޮޑު ބައްދަލުވުމެއް ބޭއްވި އިރު ރައީސް އޮފީހުން ބުނީ އަންނަ މާޗްމަހުގެ 15 ގެ ކުރިން އިންޑިއާ ސިފައިން އަނބުރާ ގެންދަން މިއަދުގެ ބައްދަލުވުމުގައި ސަރުކާރުން ހުށަހެޅި ކަމަށެވެ.
