ސަރުކާރުގެ ގެދޮރުވެރިޔާ ސްކީމުގެ ދަށުން ހުޅުމާލޭގައި އަޅަމުންދާ ފްލެޓުތަކަށް އަންނަ 2024 ވަނަ އަހަރުގެ ނިޔަލަށް ވަދެވޭނެ ކަމަށް ހައުސިން މިނިސްޓްރީން ހާމަކޮށްފި އެވެ.
ފްލެޓުތަކާ ގުޅިގެން އާންމުންގެ މެދުގައި ހުރި ކަންބޮޑުވުންތަކާ ގުޅިގެން މިއަދު ބޭއްވި ނޫސްވެރިންގެ ބައްދަލުވުމެއްގައި ހައުސިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން ވަނީ ފްލެޓުތަކުގެ މަސައްކަތްތައް ނިމެމުންދާ ވަރަކުން ފްލެޓުތައް ހަވާލުކޮށް މީހުންނަށް އެތަންތަނަށް ވަދެވޭނެ ކަމަށް ވިދާޅުވެފަ އެވެ.
"2024 ނިމޭ ތަނުގައި ހުރިހާ ފްލެޓަކަށް ވަދެވޭނެ. މިއަންނަ އަހަރު ނިމޭ އިރަށް ހުރިހާ ފްލެޓަކަށް ވަދެ ނިމޭނެ. އެކި ބައިބަޔަށް ނިމެމުން އެދަނީ. ނިމުނު ވަރަކަށް ވަދެވޭ ގޮތަށް ހަމަޖައްސާފައި އޮންނާނީ," ގެދޮރުވެރިޔާ ކޮމިޓީގެ ޗެއާމަން ކަން ވެސް ކުރައްވާ އަކްރަމް ވިދާޅުވި އެވެ.
އޭގެ އިތުރުން, މި ސްކީމުގެ ދަށުން ފްލެޓުތައް ދޫކުރިއިރު ރަށްރަށުގައި ދިރިއުޅުމުންދާ މީހުންނަށް ވެސް ފްލެޓު ލިބިފައިވާ ކަމަށް ބުނެ ހުރި ކަންބޮޑުވުންތަކާ ގުޅޭގޮތުން ވެސް ހައުސިން މިނިސްޓްރީގެ ސީނިއާ އެގްޒެކެޓިވް ޑިރެކްޓަރު މުހައްމަދު އާރިފް ވެސް ވާހަކަ ދެއްކެވި އެވެ.
"މާލޭގައި 15 އަހަރު ދިރިނޫޅުއްވާ ބޭފުޅަކަށަ ނުވަތަ ރަށްފުށުގައި ދިރިއުޅުއްވާ ބޭފުޅަކަށް ފްލެޓް ދެވިފައި އޮތް ކަމަށް ވާނަމަ އެކަން ވެސް އިސްލާހު ކުރާނަން," މިއަދުގެ ނޫސްވެރިންގެ ބައްދަލުވުމުގައި ވާހަކަ ދައްކަވަމުން އާރިފް ވިދާޅުވި އެވެ.
އެގޮތުން, ސްކީމު ފަރުމާކޮށްފައިވާ ގޮތުން ދަފްތަރުގައި 15 އަހަރު ޖެހިފައިވާ މީހަކު ރަށްފުށުގައި ދިރިއުޅުނު ނަމަވެސް އެ މީހަކަށް ކުރިމަތިލުމުގެ ހުރަހެއް ނޯންނާނެ ކަމަށް އޭނާ ވިދާޅުވި އެވެ. އަދި, އެހެން ހުރި ޝަކުވާތަކާއި އެހެނިހެން ޝަކުވާތައް ވެސް އެ މިނިސްޓްރީން ބަލާނެ ކަމަށް އާރިފް ވިދާޅުވި އެވެ.
ފްލެޓް ލިބޭ މީހުންގެ ލިސްޓު އެކުލަވާލުމުގައި އިހުމާލުވެފައި ނުވާނެ ކަމުގެ ޔަގީންކަން ޕްލޭނިން މިނިސްޓްރީން މިއަދު އަނެއްކާ ވެސް ދީފައިވެ އެވެ. އެގޮތުން, އަކްރަމް ވިދާޅުވީ ފްލެޓް ދިން ގޮތާއި މެދު, އާ ސަރުކާރުން އައިސް ފިޔަވަޅު އަޅާނެ އެއްވެސް ކަމެއް ކުރައްވާފައި ނުވާނެ ކަމަށެވެ.
"އެ ގެރެންޓީ އެބަ އޮތް. އިއްޔެ އޭސީސީގެ ބޭފުޅުން ވަޑައިގެން ބެއްލެވި އެއްޗެހި. އަޅުގަނޑަށް ފެންނަ ގޮތުގައި އެބޭފުޅުން ވަރަށް ހިތްހަމަޖެހިވަޑައިގެންނެވި. ނުދައްކާ އެއްވެސް އެއްޗެއް ނޯންނާނެ, ހުރިހާ އެއްޗެއް ބެއްލެވި," އަކްރަމް ވިދާޅުވި އެވެ.
ޕްލޭނިން މިނިސްޓްރީން ބުނީ ދާއިމީ ލިސްޓުގައި ޝަރުތު ހަމަވާ ކަމަށް ބުނާ ނަމަވެސް ފުރަތަމަ ދޭ 4000 ފްލެޓުގެ ތެރޭގައި ނުހިމެނޭ މީހުންނަށް ވެސް ސަރުކާރުން ކުރިއަށް ގެންދިއުމަށް ހަމަޖެހިފައިވާ ހައުސިން މަޝްރޫއުތަކުގެ ތެރެއިން ފުލެޓެއް ދިނުމަށް ހަމަޖެހިފައިވާކަމުގެ ލިޔުން ޕޯޓަލް މެދުވެރިކޮށް ދޭނެ ކަމަށެވެ.
ފުރަތަމަ ބުރުގައި ދޫކުރާ 4000 ފްލެޓު ދެނީ ތިން ކޮޓަރީގެ އެޕާޓްމަންޓަށް ޝަރުތު ހަމަވާ މީހުންގެ ތެރެއިން 76 އިން ފެށިގެން މަތިން މާކްސް ލިބުނު މީހުންނަށެވެ. އަދި ދެ ކޮޓަރީގެ އެޕާޓްމަންޓަށް ޝަރުތު ހަމަވާ މީހުންގެ ތެރެއިން 73 އިން ފެށިގެން މަތިން މާކްސް ލިބުނު މީހުންނަށެވެ.
ގެދޮރުވެރިޔާ ސްކީމުގެ ދަށުން ހުޅުމާލޭގެ ދެ ވަނަ ފިޔަވަހީގައި ސަރުކާރުން އަންނަނީ 18 ބުރީގެ 32 ޓަވަރު އިމާރާތް ކުރަމުންނެވެ. އޭގެ ތެރޭގައި ހިމެނެނީ ދެ ކޮޓަރީގެ 1،200 ޔުނިޓާއި ތިން ކޮޓަރީގެ 2،800 ޔުނިޓެވެ. އެ ޔުނިޓުތަކުގެ މަސައްކަތް މިހާރު ވަނީ ނިމުމަކާ ގާތްވެފަ އެވެ
