އޮސްލޯ، ނޯވޭ (އޮކްޓޫބަރު 16) - އަންނަ އަހަރު ޖަރުމަނުގައި އޮންނަ ޔޫރޯ ފުޓްބޯޅަ މުބާރާތަށް ސްޕެއިން އާއި ސްކޮޓްލަންޑް ކޮލިފައިވެއްޖެ އެވެ.
އަންނަ އަހަރުގެ ޖޫން 14 އިން ޖުލައި 14 އަށް އޮންނަ ޔޫރޯ ފުޓްބޯޅަ މުބާރާތަށް މިހާތަނަށް ކޮލިފައިވެފައިވަނީ ހަތް ގައުމެކެވެ. އެއީ މުބާރާތް ބާއްވާ ގައުމު ޖަރުމަންގެ އިތުރުން ބެލްޖިއަމް، ފްރާންސް، ޕޯޗުގަލް، ސްޕެއިން، ސްކޮޓްލަންޑުގެ އިތުރުން ތުރުކީ އެވެ.
ސްޕެއިން އާއި ސްކޮޓްލެންޑަށް ޔޫރޯގެ ޖާގަ ޔަގީންވީ ރޭ ކުޅުނު ކޮލިފައިން ގްރޫޕް އޭގެ މެޗުގައި ސްޕެއިން އަތުން ނޯވޭ ބަލިވުމުންނެވެ. މި މެޗު ސްޕެއިން ކާމިޔާބުކުރީ 1-0 އިންނެވެ. މެޗުގެ ހަމައެކަނި ގޯލު ޖަހައިދިނީ ސްޕެއިންގެ 19 އަހަރުގެ މިޑްފިލްޑަރު ގަވީ އެވެ.
މި ނަތިޖާއާ އެކު ސްޕެއިން އޮތީ ގްރޫޕްގެ އެއް ވަނައިގައި 15 ޕޮއިންޓް ހޯދައިގެންނެވެ. ސްޕެއިންއާ އެކު މި ގްްރޫޕުން ދެން ކޮލިފައިވި ސްކޮޓްލެންޑުން ވެސް ވަނީ 15 ޕޮއިންޓް ހޯދައިފަ އެވެ. ތިން ވަނައިގައި އޮތީ މެންޗެސްޓާ ސިޓީގެ އާލިން ހާލަންޑު ކުޅެމުން އަންނަ ނޯވޭ އެވެ. ނޯވޭ އަށް ކޮލިފައިންގެ ސީދާ ޖާގައެއް މިހާރު ނުލިބޭއިރު، ޕްލޭއޮފް ބުރުން ވެސް އެ ޓީމަށް ފުރުސަތު ލިބުން އޮތީ ހަނިކޮށެވެ.
ތުރުކީ ޔޫރޯ ކޮލިފައިންގެ ޖާގަ ކަށަވަރުކުރީ ކޮލިފައިން ގްރޫޕް ޑީގައި ރޭ ލެޓްވިއާ އަތުން 4-0 އިން މޮޅުވުމުންނެވެ. މި ނަތީޖާއާ އެކު އެ ޓީމަށް ވަނީ ހަތް މެޗުން 16 ޕޮއިންޓް ލިިބިފަ އެވެ. މި ގްރޫޕްގައި ވޭލްސް އާއި ކްރޮއޭޝިއާ ވާދަކުރި މެޗުން ވޭލްސް މޮޅުވުމުން ދެ ވަނަ ޓީމުގެ ވާދަވެރިކަން ވަނީ ބޮޑުވެފަ އެވެ. ވޭލްސް އަށް މިހާރު 10 ޕޮއިންޓް ލިބިފައިވާއިރު، ކްރޮއޭޝިއާ އަށް ވެސް ވަނީ 10 ޕޮއިންޓް ލިބިފަ އެވެ.
ތުރުކީ އަށް ފަހު މި ގްރޫޕުން ޔޫރޯގެ ފަހު ޖާގަ ލިބޭނީ ވޭލްސް ނުވަތަ ކްރޮއޭޝިއާ އަށެވެ. ވޭލްސް އަށް ބާކީ އޮތީ އަރްމީނިއާ އަދި ތުރުކީއާ ދެކޮޅަށް ކުޅޭ މެޗެވެ. ކްރޮއޭޝިއާ އަށް އޮތީ ލެޓްވިއާ އަދި އާރްމިނިއާއާ ދެކޮޅަށް ކުޅޭ މެޗެވެ.
ޔޫރޯ ކޮލިފައިން ގްރޫޕް އައިގައި ސްވިޒަލެންޑަށް ބެލަރޫސް އަތުން މޮޅުނުވެވުމުން އެ ޓީމު ޔޫރޯގެ ޖާގަ އެއް އަވަހަށް ޔަގީންކުރުމުގެ ފުރުސަތު ވަނީ ގެއްލިފަ އެވެ. ބެލަރޫސް އާ ސްވިޒަލެންޑް ވާދަކުރި މެޗު ނިމުނީ 3-3 އިން އެއްވަރުވެގެންނެވެ. އޭގެ ފައިދާ ނަގައި މިހާރު މި ގްރޫޕްގެ އެއް ވަނައިގައި އޮތީ އެންޑޯރާ އަތުން 4-0 އިން ރޭ މޮޅުވި އަލްބޭނިއާ އެވެ.
ޔޫރޯ ކޮލިފައިންގައި މިރޭވެސް ފޯރިގަދަ މެޗުތަކެއް ކުޅޭނެ އެވެ. އޭގެ ތެރޭގައި ނެދަލެންޑްސް އާއި ގްރީސް ވާދަކުރާ މެޗާއި، ބެލްޖިއަމްއާ ސްވިޑެން ވާދަކުރާ މެޗު ފާހަގަކޮށްލެވެ އެވެ.
