އަންނަ އޮކްޓޯބަރު މަހުގެ ނިޔަލަށް ގިރާވަރުފަޅު ހިއްކައި ނިމޭނެ ކަމުގެ ޔަގީންކަން އެ މަސައްކަތް ކުރާ ނެދަލޭންޑްސްގެ ސީއެމްސީ-ބޮސްކާލިސް ޖޮއިންޓު ވެންޗާ ކުންފުނިން ދީފި އެވެ.
ގިރާވަރުފަޅުން ހިއްކާ ބިމުގައި ހުންނަވައި ސީއެމްސީ-ބޮސްކާލިސް ޖޮއިންޓް ވެންޗާގެ ޕްރޮޖެކްޓު މެނޭޖަރު، ހޫގޯ ވޭން ކުއީޖްލް އިއްޔެ ހަވީރު ވިދާޅުވީ ބިން ހިއްކުމުގެ މަސައްކަތް ކުރިއަށް އޮތް ދުވަސްތަކުގައި 24 ގަޑިއިރު ކުރިއަށް ގެންދާނެ ކަމަށެވެ. އެ ފަޅުން ހިއްކާ 169 ހެކްޓަރުގެ ބިން އަންނަ އޮކްޓޫބަރު މަހުގެ ނިޔަލަށް އެއްކޮށް ނިންމާލެވޭނެ ކަމުގެ ޔަގީންކަން ވެސް އޭނާ ދެއްވި އެވެ. އެ މަސައްކަތް ފަށާފައި ވަނީ މި އަހަރުގެ މޭ މަހު އެވެ.
ފަންޑު މެނޭޖުމަންޓު ކޯޕަރޭޝަނުން ތަރައްގީ ކުރާ ގިރާވަރުފަޅުން ބިންވެރިޔާ ސްކީމުގެ ދަށުން ދޭން ނިންމާފައިވާ 5,433 ގޯއްޗަށް ބޭނުންވަނީ 73 ހެކްޓަރުގެ ބިމެވެ.
ބޮސްކާލިސްގެ ޕްރޮޖެކްޓް މެނޭޖަރު އަދި އަކްރަމް ކަމާލުއްދީން, ގިރާވަރުގެ ހިއްކި ބިމުގައި -- ފޮޓޯ: ޝަހުޒާން/ އަދަދު
އެ ވާހަކައަށް ބާރުދެއްވައި ހައުސިން މިނިސްޓަރީގެ ސްޓޭޓް މިނިސްޓަރު އަދި ގެދޮރުވެރިޔާ ކޮމިޓީގެ ޗެއާ، އަކްރަމް ކަމާލުއްދީން ވިދާޅުވީ ރައީސުލްޖުމްހޫރިއްޔާ ވައުދުވެވަޑައިގެންނެވި ގޮތަށް ބިންވެރިޔާ ސްކީމުގެ ދަށުން ގޯތި ލިބުނު ހުރިހާ އެންމެންނަށް މި ދައުރު ނިމުމުގެ ކުރިން ގޯތިތައް ކަނޑާ ރެޖިސްޓަރީ ހަވާލުކުރާނެ ކަމަށެވެ.
"މިހާރު އެދަނީ ހިއްކަމުން ހިއްކަމުން. ރައީސް ވައުދުވެވަޑައިގެންފައިވާ ގޮތުން ނޮވެމްބަރު 11ގެ ކުރިން ގޯތި ކަނޑާ, ގޯތީގެ ރަޖިސްޓްރީ ކޮންމެ ބިންވެރިއަކަށް ދޭނެ،" އަކްރަމް ވިދާޅުވި އެވެ.
ގިރާވަރުފަޅު ބިން ހިއްކުމުގެ މަސައްކަތް ކުރިއަށް ދަނީ -- ފޮޓޯ: މިރާޝް/ އަދަދު
ބިންވެރިޔާ ސްކީމުގެ ދަށުން ފުރަތަމަ ބުރުގައި ދޫކުރާ 9003 ގޯތީގެ ތެރޭގައި ހިމެނެނީ, ހުޅުމާލެއިން ދޫކުރާ 1351 ގޯއްޗާއި, ގުޅީފަޅުން ދޫކުރާ 2,219 ގޯތީގެ އިތުރުން ގިރާވަރުފަޅުން ދޫކުރާ 5,433 ގޯއްޗެވެ. އެކަމަށް ހުޅުމާލެއިން 26 ހެކްޓަރު, ގުޅީފަޅުން 42 ހެކްޓަރު އަދި ގިރާވަރުފަޅުން 73 ހެކްޓަރުގެ ބިން ބޭނުންވެ އެވެ.
ގިރާވަރުފަޅުގެ އިތުރުން ގުޅީފަޅުން ހިއްކަންޖެހޭ ބިން ހިއްކުމުގެ މަސައްކަތް މިހާރު ދަނީ ކުރަމުންނެވެ. ގުޅީފަޅުން ހިއްކާފައިވާ ބިމުން ގާތްގަނޑަކަށް 400 އެއްހައި ގޯތި މިހާރު ވެސް ދެވޭނެ ކަމަށް އަކްރަމް ވިދާޅުވި އެވެ.
މާލެ، ވިލިމާލެ، ގުޅިފަޅު އަދި ތިލަފުށި ގުޅާލާ ބްރިޖުގެ މަސައްކަތަށް ފަހު، ގިރާވަރާ ބްރިޖު ގުޅާލުން ވަކި މަޝްރޫއެއްގެ ގޮތުގައި ކުރިއަށް ގެންދަވާނެ ކަމަށް ރައީސް ސޯލިހު ވަނީ ވިދާޅުވެފަ އެވެ.
