ސަރުކާރުގެ ބޯހިޔާވަހިކަމުގެ މަޝްރޫއުގެ ދަށުން މާލެ ސަރަހައްދުން ގޯތި ލިބޭ ތަން ކަނޑައެޅުމުގެ ގުރުއަތަށް ހާޒިރު ނުވާ މީހެއްގެ ބަދަލުގައި އެއްވެސް އޮފިޝަލަކު ގުރުއަތުު ނުނަގާނެ ކަމަށާއި އެ މީހަކަށް އިތުރު ފުރުސަތެއް ލިބޭނެ ކަމަށް ޕްލޭނިން މިނިސްޓްރީން ބުނެފި އެވެ.
ބިންވެރިޔާ ސްކީމުގެ ދަށުން ދޫކުރާ ގޯތީގެ ގުރުއަތު ނެގުމާއި ގުޅޭގޮތުން މިނިސްޓްރީން ފުރަތަމަ ކުރި އިއުލާނުގައި ބުނެފައިވާ ގޮތުން ގުރުއަތު ނެގުމަށް ދީފައިވާ ގަޑިއަށް އެއްވެސް މީހަކު ހާޒިރު ނުވެއްޖެ ނަމަ އެމީހެއްގެ ބަދަލުގައި ގުރުއަތުގައި ބައިވެރިވާނީ މިނިސްޓްރީގެ އޮފިޝަލެކެވެ. އެއީ ގުރުއަތު ނެގުން މެދުނުކެނޑި ކުރިއަށްގެންދިއުމަށް ކަމަށް މިނިސްޓްރީން އޭރު ބުންޏެވެ.
މިނިސްޓްރީން އެގޮތައް ނިންމާފައިވަނީ ގޯތި ދިނުމުގައި މަކަރު ހަދައި އޮޅުވާލުމަށް ކަމަށް ބުނެ ބައެއް ފަރާތްތަކުން ވަނީ ތުހުމަތުކޮށްފަ އެވެ.
ނަމަވެސް, މިނިސްޓްރީގެ އެ ނިންމުން ބަދަލުކޮށް ގުރުއަތު ނެގުމުގައި އޮފިޝަލުން ބައިވެރިނުވާން ނިންމާފައިވާ ކަމަށް ނޫސްވެރިންނަށް މައުލޫމާތު ދެއްވަމުން ޕްލޭނިން މިނިސްޓްރީގެ ސީނިއާ އެކްޒެކެޓިވް ޑިރެކްޓަރު މުހައްމަދު އާރިފް ރޭ ވިދާޅުވި އެވެ.
އަދި, މިނިސްޓްރީން ކަނޑައަޅާ ގަޑިއަށް މީހަކު ހާޒިރު ނުވާ ހާލަތުގައި އެމީހެއްގެ ގުރުއަތު ނެގުން ރީ ޝެޑިއުލްކުުރުމަށް ފަހު ގެދޮރުވެރިން ޕޯޓަލް މެދުވެރިކޮށް އަންގާނެ ކަމަށާއި އެގޮތައް ނިންމީ ވީހާވެސް ދެފުށް ފެންނަ ގޮތަކަށް ގުރުއަތު ނެގުމުގެ ކަންތައް ކުރިއަށްގެންދިއުމަށް ކަމަށް އޭނާ ވިދާޅުވި އެވެ.
ގޯތީގެ ގުރުނެގުން ކުރިއަށްދާގޮތާ ގުޅޭގޮތުން އާރިފް މީޑިއާ އަށް މައުލޫމަތު ދެއްވަނީ، ވިދާޅުވީ ގޯތީގެ ގުރުނެގުމަށް ހާޒިރުނުވާ މީހުންގެ ބަދަލުގައި އޮފިޝަލުން ގުރު ނުނަގާނެ ކަމަށް --- ފޮޓޯ:އިޔާން/އަދަދު
"މިއީ ވަރަށް ހައްސާސް މައްސަލައެއް. އަޅުގަނޑުމެން ތިން ސަރަހައްދަކުން ގޯތި މި ދެނީ. އެހެންވެ އަޅުގަނޑުމެން ބޭނުންވީ އިތުރަށްވެސް އެބޭފުޅަކު އައިސް އެ ބޭފުޅެއްގެ އަތުން ގުރުއަތު ނެގުމުގެ ފުރުސަތު ދޭން," އާރިފް ވިދާޅުވި އެވެ.
އާރިފް ވިދާޅުވީ މިހާތަނަށް ގުރުއަތު ނެގުމަށް ހާޒިރު ނުވި އެއްވެސް މީހެއްގެ ބަދަލުގައި އޮފިޝަލަކު ގުރުއަތު ނަގާފައި ނުވާނެ ކަމަށާއި ގުރުއަތު ނެގުން ނިމިފައިވާ ސަރަހައްދުތަކުގެ ފޮށިތަކުގައި އެގޮތަށް ހާޒިރު ނުވި މީހުންގެ ގަނޑުކޮޅުތައް މިހާރުވެސް ހުންނާނެ ކަމަށެވެ. އަދި, ގުރުއަތު ނެގުން ކުރިއަށްގެންގޮސް އެންމެ ފަހު ދުވަހު އެ ފަރާތްތަކަށް އަލުން ގުރުއަތު ނެގުމަށް ގަޑިތަކެއް ކަނޑައަޅާނެ ކަމަށްވެސް ވިދާޅުވި އެވެ.
"ފުރަަތަމަ ދުވަހުވެސް އަޅުގަނޑުމެން ނާންނަ އެއްވެސް ބޭފުޅެއްގެ ގުރު ނުނަގަން. މިތަނަށް ނާންނަ އެއްވެސް ބޭފުޅެއްގެ ބަދަލުގައި ގުރު ނަގާފައި ނުވާނެ. ހުސްވެފަ ހުރި ފޮށިތަކުން އެ ފެންނަނީ ނާންނަ ބޭފުޅުންގެ ކަރުދާސް" އާރިފް ވިދާޅުވި އެވެ.
މާލެ ސަރަހައްދުން ގޯތި ލިބޭ މީހުންގެ މެދުގައި ގުރުއަތުނެގުން ގަލޮޅު ދަނޑުގައި މިހާރުވެސް ކުރިއަށްދާއިރު ގުރުއަތުލުން ނިންމާލެވޭނީ މާދަމާ ރޭ 19:00 ގައި ކަމަށް މިނިސްޓްރީން ބުންޏެވެ. ގޯތި ގުރުގައި މަކަރު ހަދަމުންދާ ކަމަށް އެކި ފަރާތްތަކުން ތުހުމަތު ކުރިނަމަވެސް ގުރުގައި މަކަރު ހެދުމުގެ އެއްވެސް ފުރުސަތެއް ނޯންނާނެކަމުގެ ޔަގީންކަން މިނިސްޓްރީން ވަނީ ދީފަ އެވެ.
އެގޮތުން ގުރުއަތު ކަރުދާސް އަޅާފައި ހުންނަ ފޮށިތަކުގެ ސީލް ކެނޑުމާއި ބަންދުކޮށް އަލުން ސީލްކުރަނީީ އެވަގުތު ތިބި ބައެއްގެ ހާޒިރުގައި ކަމަށާއި ފުލުހުންނާއި މިނިސްޓްރީގެ މުވައްޒަފުން އެ ފޮށިތައް 24 ގަޑިއިރު ބަލަމުންދާ ކަމަށް މިިނިސްޓްރީން ބުންޏެވެ.
ބިންވެރިޔާ ސްކީމުގެ ދަށުން ގޯއްޗަށް އެދި ހުށަހެޅި 97 ޕަސެންޓު މީހުންނަށް ގޯތި ދިނުމަށް ސަރުކާރުން ވަނީ ނިންމާފަ އެވެ. އެއީ 18،955 މީހުންނަށް 9001 ގޯއްޗެވެ. ގޯތި ދެނީ ހުޅުމާލެއާއިި ގުޅީފަޅާއި ގިރާވަރުފަޅުންނެވެ.
