ރާއްޖޭގައި ބާއްވާ އެންމެ ޝަރަފްވެރި ބޮޑީބޯޑިން ހަރަކާތް ކަަމަށްވާ ވިޒިޓް މޯލްޑިވްސް ޕްރޯ 2023 ރަސްމީކޮށް މިއަދު ފަށައިފި އެވެ.
ދުނިޔޭގެ އެންމެ މަތީ ފަންތީގެ ބޮޑީބޯޑަރުން ވާދަކުރާ އިންޓަނޭޝަނަލް ބޮޑީބޯޑިން ކޯޕަރޭޝަން (އައިބީސީ) ވޯލްޑް ޓުއާގެ އެންމެ ފާހަގަކޮށްލެވޭ އެއް މުބާރާތްކަމަށްވާ ވިޒިޓް މޯލްޑިވްސް ޕްރޯ ކުރިއަށްދާނީ މިމަހުގެ 3-12 އަށް މާލޭގެ ވަރުނުލާ ރާޅުގަނޑު ސަރަހައްދުގަ އެވެ.
16 ގައުމަކުން 80އަށްވުރެ ބޮޑީބޯޑަރުން ވާދަކުރާ މި މުބާރާތް ރަސްމީކޮށް ފައްޓަވައިދެއްވީ ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަހުމަދު އެވެ.
މި ރަސްމިއްޔާތުގައި ވާހަކަދައްކަވަމުން ފަޒްނާ އަހުމަދު ވަނީ ދުނިޔޭގެ އެންމެ މަތީ ފަންތީގެ ބޮޑީބޯޑަރުންނާއިއެކު ވާދަކޮށް ރާއްޖޭގެ އެތުލީޓުން ހޯދަމުން އަންނަ ކުރިއެރުން ފާހަގަކުރައްވާފަ އެވެ. ގިނަ ބަޔަކު ރާޅާ އެޅުމުގެ ތެރެއަށް ވަންނަކަން ފާހަގަކުރައްވާ އެކަމަނާ ވަނީ ޖޫނިއާ ގިނަ ބޮޑީބޯޑަރުން މި ކުޅިވަރުން ފެނުމަކީ މި ކުޅިވަރުގެ ކުރިމަގަށް ކުރެވޭ އުއްމީދު ބޮޑުވާ ކަމެއްކަމަށެވެ.
މިއަހަރުގެ މުބާރާތަކީ ރާއްޖޭގައި މިދިޔަ އަހަރު ބޭއްވުނު ވިޒިޓް މޯލްޑިވްސް ޕްރޯއަށްވުރެ ފޯރިގަދަ އަދި ވާދަވެރި މުބާރާތަކަށްވާނެކަމަށް ބެލެވެ އެވެ. މިގޮތުން މިއަހަރު މިދިޔަ އަހަރަށްވުރެ ބައިވެރިން ވާދަކުރާ އަދަދު ދެ ގުނަ ބޮޑެވެ.
މިއަހަރުގެ މުބާރާތުގައިވެސް ހަތަރު ކެޓަގަރީއެއް އޮންނާނެ އެވެ. އެއީ މެންސް އޯޕަން، ވިމެންސް އޯޕަން، ޑްރޮޕް ނީ އަދި ޖޫނިއާ ކެޓަގަރީ އެވެ. ހަތަރު ކެޓަގަރީގައިވެސް މިދިޔަ އަހަރަށްވުރެ ބައިވެރިން އިތުރެވެ. މިދިޔަ އަހަރުގެ މުބާރާތުގައި އެންމެ މަދުން ބައިނަލްއަގްވާމީ ސާފަރުން ވާދަކުރީ ޖޫނިއާ ބައިގަ އެވެ. އެހެންނަމަވެސް މިފަހަރު އެހެން ޑިވިޝަންތަކެކޭ އެއްގޮތަށް ޖޫނިއާ ބަޔަށްވެސް ބޮޑު ތަރުހީބެއް ލިބުނެވެ.
މިއަހަރުގެ މުބާރާތް ރާއްޖޭގެ ބޮޑީބޯޑިންއަށް ހާއްސަވާ ގިނަ ސަބަބުތަކެއް އެބަހުއްޓެވެ. މިދިޔަ އަހަރަށްވުރެ ފުރިހަމަ މުބާރާތެއް މިއަހަރު ގެނެސްދޭން މޯލްޑިވްސް ބޮޑީބޯޑިން އެސޯސިއޭޝަން (އެމްބީބީއޭ) އިން މަސައްކަތްކުރަމުން އަންނައިރު، މިފަހަރުގެ ވިޒިޓް މޯލްޑިވްސް ޕްރޯގައި ރާއްޖޭގެ ހަތަރު ޖަޖުން ބައިވެރިވާނެ އެވެ. އޭގެ ތެރޭގައި އަންހެން ޖަޖެއްވެސް ހިމެނެ އެވެ.
ވިޒިޓް މޯލްޑިވްސް ޕްރޯގައި ރާއްޖޭގެ 14 ބޮޑީބޯޑަރަކު ވާދަކުރާނެ އެވެ. ވައިލްޑް ކާޑް ދެ އެތުލީޓުންގެ ގޮތުގައި މިފަހަރު އާމިން އުމަރު މޫސާ އާއި އަލީ ހުޝްރުވާން އަހުމަދުއަށް އެޑްވާންޓޭޖެއް ލިބޭނެއެވެ. މިގޮތުން އޯޕަން ބައިގައި އައްޔަ ވާދަކުރަން ފަށާނީ ގަދަ 32 އާ ހިސާބުންނެވެ. އަދި ޖޫނިއާ ބައިގައިވެސް އާމިން ވާދަކުރާނީ ސީޑްކޮށްފައިވާ ބޮޑީބޯޑަރުންނާ ހިސާބުންނެވެ.
މީގެ އިތުރުން ކޮންމެ ކެޓަގަރީއަކުން ހަތަރު އެތުލީޓަކަށް އެމްބީބީއޭ އިން ވަނީ ފްރީ ޕާސް ދީފަ އެވެ. ފިރިހެން ބައިން ފްރީ ޕާސް ލިބުނީ ކުޑަ އައްޔަ، އާމިން، އަޝްރަފް ހަސަން، އަދި އަލީ ޖާވިދު އަށެވެ.
ޖޫނިއާ ބައިން ފްރީ ޕާސް ލިބުނީ އާމިން، އިޔާން އަހުމަދު، މުހައްމަދު ޖަރީޝް ޖިހާދު އަދި މުހައްމަދު ކައިފް އަށެވެ. ފްރީ ޕާސް ދިނުމުގައި ބަލާފައިވަނީ އެންމެ ފަހުން ނިމުނު ބުރުނު ޝިކާރު ޗެލެންޖުގެ ނަތީޖާތަކާއި ގައުމީ ޓީމުގެ ރޭންކިން އަށެވެ.
