އިންޓަނޭޝަނަލް ބޮޑީބޯޑިން ކޯޕަރޭޝަން (އައިބީސީ) ވޯލްޑް ޓުއާގެ އެންމެ މުހިންމު މުބާރާތަކީ ރާއްޖޭގައި ބާއްވާ މޯލްޑިވްސް ޕްރޯ ކަމަށާއި މިއީ ދުނިޔޭގެ ޗެމްޕިއަން ކަނޑައެޅުމުގައި މުހިންމު މުބާރާތެއްކަމަށް އައިބީސީގެ ހެޑް ޖަޖް ބްރެޒިލްގެ ޗިކޯ ގަރިޓާނޯ ބުނެފި އެވެ.
އައިބީސީ ވޯލްޑް ޓޫއާގައި ހިމެނޭ "ވިޒިޓް މޯލްޑިވްސް ޕްރޯ 2023" އަންނަ މަހުގެ 3-12 އަށް މާލޭގެ ރާޅުގަނޑު ސަރަހައްދުގައި އޮންނާނެ އެވެ. މި މުބާރާތުގެ އެންމެ ފަހުގެ ތައްޔާރީތައް މިހާރު ފަށާފައިވާއިރު، މިއީ އައިބީސީގެ ވޯލްޑް ޓުއާގެ މުބާރާތެއް ބާއްވާ ދެ ވަނަ ފަހަރެވެ.
އައިބީސީގެ ހެޑް ޖަޖްގެ ގޮތުގައި މަސައްކަތްކުރަމުން އަންނަ ޗިކޯ ވަނީ މި އަހަރުގެ މުބާރާތަަކީ މިދިޔަ އަހަރަށް ވުރެ ދެ ގުނަ ފޯރިގަދަ އަދި "ބޮޑު" މުބާރާތެއްގެ ގޮތުގައި ސިފަކޮށްފަ އެވެ. އޭނާ ބުނީ ރާއްޖެއިން މި މުބާރާތަށް ތައްޔާރުވާ މިންވަރާ އެއްވަރަށް އެތުލީޓުންނާއި އައިބީސީ އިން ވެސް މި މުބާރާތަށް ތައްޔާރުވާ ކަމަށެވެ.
"ރާއްޖެ އެނބުރި އާދެވުމަކީ ތަފާތު އުފާވެރި އިހުސާސެއް ކުރެވޭކަމެއް. މިދިޔަ އަހަރަށްވުރެ މިފަހަރު މި މުބާރާތުގެ ފޯރިގަދަވާނެ. ފެންވަރު ރަނގަޅުވާނެ. އަނެއްކާ މިހާރުވެސް މި މުބާރާތް އަހަރުމެންނަށް މި ފެންނަނީ ވަރަށް ބޮޑުކޮޮށް. ވަރަށް ބުރަ މަސައްކަތެއް އެމްބީބީއޭއިން މި ކުރަނީ. މިދިޔަ އަހަރަށްވުރެ ދެ ގުނަ ބޮޑުކޮށް މިފަހަރު މި މުބާރާތް ފެންނާނީ." ބްރެޒިލްގެ ޗިކޯ ބުންޏެވެ.
ރާއްޖޭގެ ޖަޖުންނަށް ބޭއްވި ސެމިނާގެ ތެރެއިން ޗިކޯ ބުނެދެނީ.--- ފޮޓޯ: އަބްދުﷲ އިޔާން/ އަދަދު
އޭނާ ބުނީ ރާއްޖޭގެ މުބާރާތް މިދިޔަ އަހަރު ބެލި މީހުން ވެސް މިގައުމަށް އަންނަން ބޭނުންވި ކަމަށާއި، ރާއްޖޭގެ އިންތިޒާމުތަކާއި ކަންކަމަށް ބަލާއިރު މިދިޔަ އަހަރު ބޭއްވުނީ ވަރަށް ކާމިޔާބު މުބާރާތެއް ކަމަށެވެ. އޭނާ ބުނީ މިދިޔަ އަހަރެކޭ އެއްގޮތަށް މި ފަހަރުގެ މުބާރާތުގައި ވެސް އިންތިޒާމްތަކުގެ ކޮލިޓީކަމާއި، ފެންވަރު ރަނގަޅުކަން ފެންނާނެ ކަމަށެވެ.
"އަހަރެން މިދިޔަ އަހަރުވެސް މުބާރާތް ފެށުމުގެ ކުރިން ބުނިން އައިބީސީ ޓުއާގެ އެންމެ ފެންވަރު ރަނގަޅު އެންމެ ސަޅި މުބާރާތަށް ރާއްޖޭގެ މުބާރާތް ވާނެއޭ. އެކަން ފެނުނު މުބާރާތް ނިމުނުއިރުވެސް." އައިބީސީ ވޯލްޑް ޓުއާގެ ހުރިހާ މުބާރާތެއްގައި ވެސް އިސް ޖަޖުގެ ގޮތުގައި މަސައްކަތް ކުރަމުން އަންނަ ޗިކޯ ބުންޏެވެ.
އޭނާ ބުނީ ޓުއާގެ މެދުތެރެއިން ރާއްޖޭގައި މި މުބާރާތް އޮތުމަކީ މި މުބާރާތުގެ ފޯރިގަދަވާ އެއް ސަބަބުކަމަށެވެ. މިގޮތުން މި މުބާރާތުގެ ޗެމްޕިއަންކަން ހޯދާ ބޮޑީބޯޑަކަރަކަށް ދުނިޔޭގެ ޗެމްޕިއަންކަން ހޯދުމުގެ ފުރުސަތު ބޮޑުވާކަމަށާއި، ދުނިޔޭގެ ތަށި ހޯދަން ބޭނުންވާ ނަމަ މި މުބާރާތުގައި ވާދަކޮށް ކާމިޔާބީ ހޯދުން މުހިންމު ކަމަށެވެ.
މިފަހަރުގެ މުބާރާތުގައި މިދިޔަ އަހަރަށްވުރެ ގިނަ އެތުލީޓުން ވާދަކުރުމަކީ މިކަމުގެ ހެއްކެއްކަމަށްވެސް އޭނާ ބުންޏެވެ. މިގޮތުން މިދިޔަ އަހަރު ވާދަނުކުރާ ދުނިޔޭގެ ރޭންކިންގެ މަތީގައި އުޅޭ ގިނަ ބޮޑީބޯޑަރުންތަކެއް މިފަހަރުގެ މުބާރާތުގައި ވާދަކުރާކަން އޭނާ ފާހަގަކުރި އެވެ.
ޗިކޯ އިސްވެ، ބޭއްވި ޖަޖިން ކޯހުގެ ތެރެއިން އަންހެން ބޮޑީބޯޑަރު، ލުޖެއިން.--- ފޮޓޯ: އަބްދުﷲ އިޔާން/ އަދަދު
ޗިކޯ ވަނީ ރާއްޖޭގައި ތިބި ބޯޑަރުންގެ ފެންވަރު ރަނގަޅުކަންވެސް ފާހަގަކޮށްފަ އެވެ. މިގޮތުން އެ ބޮޑީބޯޑަރުންނަކީ ދުނިޔޭގެ އެންމެ މަތީ ފަންތީގެ ބޯޑަރުންނާ ވާދަކޮށް ކާމިޔާބު ހޯދޭނެ އެތުލީޓުންކަންވެސް އޭނާ ފާހަގަކުރި އެވެ.
"ދިވެހިންގެ ފެންވަރުވެސް އަންނަނީ ރަނގަޅުވަމުން. މިއަހަރު އަހަންނަށް ޔަގީން އިތުރު ކާމިޔާބީ ހޯދާނެކަން. އަހަނަށް ބުނަން ކެރިދާނެ ކުރިއަށް އޮތް ދުވަސްތަކުގައި ރާއްޖޭގެ ބޮޑީބޯޑަރެއް ދުނިޔޭގެ ތައްޓަށް ވާދަކުރާނެއޭ. މިއީ ޓުއާގެ މެދުތެރެ. އެހެންވީމަ މިއީ އެންމެ މުހިންމު މުބާރާތް. މި މުބާރާތް ކާމިޔާބުކުރާ މީހަކަށް ދުނިޔޭގެ ޗެމްޕިއަންކަން ލިބުމުގެ ފުރުސަތު ބޮޑު. މިއީ އެންމެ ފުރިހަމަ އެންމެ ފޯރިގަދަ އެންމެ ވަރުގަދަ އިވެންޓަށްވާނެ." އޭނާ ބުންޏެވެ.
ޗިކޯ ވަނީ މިދިޔަ އަހަރެކޭ އެއްގޮތަށް މުބާރާތް ފެށުމުގެ ކުރިން ބާއްވާ އައިބީސީ ޖަޖިން ކޯސް މި އަހަރު ވެސް ކުރިއަށްގެން ގޮސްފަ އެވެ. މާލޭގައި ކުރިއަށްދިޔަ މި ކޯހުގައި ރާއްޖޭގެ ގިނަ ޖަޖުންތަކެއް ބައިވެރިވިއިރު ފުރަތަމަ ފަހަރަށް ރާއްޖޭގެ އަންހެން ބައިވެރިއަކު ވެސް ޖަޖިން ސެމިނާ ފުރިހަމަކުރި އެވެ. އެއީ 2022 ވަނަ އަހަރުގެ ބުރުނު ޝިކާރު ޗެލެންޖުގެ އަންހެން ބައިގެ ޗެމްޕިއަންކަން ހޯދި ލުޖެއިން ހަސަން އެވެ.
