ވިޒިޓް މޯލްޑިވްސް ޕްރޯ 2023 ގައި މިދިޔަ އަހަރުގެ ޗެމްޕިއަން ހަވާއީގެ ޑޭވިޑް ހަބާޑް އާއި އަންހެން ކުރީގެ ދުނިޔޭގެ ޗެމްޕިއަން ޕޯޗުގަލްގެ ޖޮއާނާ ޝެންކާ ވާދަކުރާނެކަން ހާމަކޮށްފި އެވެ.
އޮގަސްޓް މަހުގެ 3-12 އަށް މާލޭގެ ވަރުނުލާ ރާޅުގަނޑު ސަރަހައްދުގައި އޮންނަ ވިޒިޓް މޯލްޑިވްސް ޕްރޯ އަކީ އައިބީސީ ވޯލްޑް ޓުއާގައި ހިމެނޭ ދެ ވަނަ އަށް އެންމެ އަގުބޮޑު މުބާރާތެވެ. މި މުބާރާތުގައި 18 ގައުމަކުން 100 އެއްހާ ބޮޑީބޯޑަރުން ވާދަކުރާނެކަމަށް ބެލެވެ އެވެ.
މުބާރާތުގައި ބައިވެރިވުމުގެ ފުރުސަތު ހުޅުވާލުމާ އެކު އެންމެ ފުރަތަމަ ރަޖިސްޓާ ކުރި ބޮޑީބޯޑަރުންގެ ތެރޭގައި މިދިޔަ އަހަރުގެ މޯލްޑިވްސް ޕްރޯގެ ފިރިހެން އޯޕަން އަދި ޑްރޮޕް-ނީ ބައިގެ ޗެމްޕިއަންކަން ހޯދީ ޑޭވިޑް ހަބާޑް ހިމެނެ އެވެ.
ޑޭވިޑް ހަބާޑް އަކީ ދުނިޔޭގެ އެންމެ ކުރީ ސަފުގައި ގިނަ ދުވަސްތަކެއް ވަންދެން ޖާގަ ހިފަހައްޓަމުން އަންނަ ބޮޑީބޯޑަރެކެވެ. އޭނާ ވަނީ ޑްރޮޕް-ނީ ބައިގެ ދުނިޔޭގެ ޗެމްޕިއަންކަން މިހާތަނަށް ނުވަ ފަހަރަށް ހޯދައިފަ އެވެ.
ޑޭވިޑް ހަބާޑް މިދިޔަ އަހަރުގެ މޯލްޑިވްސް ޕްރޯގައި ވާދަކޮށް އެއް ވަނަ ހޯދުމުގެ އިތުރުން އޭނާ ވަނީ ރާއްޖޭގެ ގައުމީ ޖޫނިއާ ޓީމަށް ކޯޗިން ކްލިނިކެއް ވެސް ހިންގައިފަ އެވެ. މި އަހަރު ވެސް އޭނާގެ ހާއްސަ ކްލިނިކެއް އޮންނާނެ ކަމަށް މޯލްޑިވްސް ބޮޑީބޯޑިން އެސޯސިއޭޝަނުން މައުލޫމާތު ދެ އެވެ.
ޑޭވިޑް ހަބާޑްގެ އިތުރުން މި އަހަރު ވިޒިޓް މޯލްޑިވްސް ޕްރޯގައި ވާދަކުރާނެކަން އިއުލާންކޮށްފައިވާ އަނެއް ބޮޑީބޯޑަރަކީ ޕޯޗުގަލްގެ ޖޮއާނާ ޝެންކާ އެވެ. ޖޮއާނާ ޝެންކާ އަކީ 2017 ވަނަ އަހަރުގެ ދުނިޔޭގެ ޗެމްޕިއަން އެވެ. އޭނާ ވަނީ ހަތަރު ފަހަރެއްގެ މަތިން ޔޫރަޕްގެ ޗެމްޕިއަންކަން ވެސް ހޯދައިފަ އެވެ.
ޖޮއާނާ ވަނީ މިދިޔަ އަހަރުގެ ވެސް މޯލްޑިވްސް އޯޕަންގައި ވާދަކޮށްފަ އެވެ. މިދިޔަ އަހަރު އޭނާ ކެޓީ ކުއާޓާ ފައިނަލުންނެވެ. ވިޒިޓް މޯލްޑިވްސް ޕްރޯ 2023 ގައި މިދިޔަ އަހަރެކޭ އެއްގޮތަށް ދުނިޔޭގެ ޗެމްޕިއަނުންނާއި މި ވަގުތު ބޮޑީބޯޑިންގެ އެންމެ ކުރީގައި އުޅޭ ގިނަ ބޮޑީބޯޑަރުންތަކެއް ވާދަކުރާނެ ކަމަށް ބެލެވެ އެވެ.
