މެޑްރިޑް (ފެބްރުއަރީ 27) - އަންނަ ސީޒަންގައި ވެސް ރެއާލް މެޑްރިޑްގެ ކޯޗުގެ މަގާމުގައި ހުރެވޭނެކަމުގެ ޔަގީންކަން އެބައޮތް ކަމަށް އެ ޓީމުގެ ކޯޗު އިޓަލީގެ ކާލޯ އަންޗެލޮޓީ ބުނެފި އެވެ.
ސްޕެނިޝް ލީގުގެ ތާވަލްގެ ދެ ވަނައިގައި ރެއާލް އޮތްއިރު، އެ ޓީމާ ވާދަވެރި ބާސެލޯނާ ތާވަލްގެ އެއް ވަނައިގައި އޮތީ އަށް ޕޮއިންޓްގެ ލީޑަކާއެކު އެވެ.
ރެއާލްގެ ރައީސް ފްލޮރެންޓީނޯ ޕެރޭޒް މީގެ ކުރިން ކޯޗުންނަށް ގިނަ ފުރުސަތުތައް ދީފައިވަނީ ނަތީޖާތަކަށް ބަލައިފަ އެވެ. އެހެންކަމުން، މި ސީޒަންގެ ސްޕެނިޝް ލީގު ރެއާލަށް ގެއްލިއްޖެނަމަ، އަންނަ ސީޒަންގައި އަންޗެލޮޓީ އަށް މަގާމުގައި ނުހުރެވޭނެ ކަމަށް އަޑު ފެތުރިފައިވެ އެވެ.
އެހެން ނަމަވެސް، ޗެމްޕިއަންސް ލީގުގެ ގަދަ 16 ގެ ބުރުގެ ފުރަތަމަ ލެގުގައި މިދިޔަ ހަފުތާގައި ލިވަޕޫލް އަތުން 5-2 އިން ރެއާލް މޮޅުވި މެޗާ އެކު، މަގާމުގައި ދެމިހުރުމާ މެދު އަންޗެލޮޓީގެ ޔަގީންކަމާއި އިތުބާރު ވަނީ ބޮޑުވެފަ އެވެ.
"އަހަންނަށް ހީވަނީ އަހަރެން މި މަގާމުގައި ދެމިހުންނާނެހެން. މާބޮޑަށް އެކަމަކާ ނުވިސްނަން. އަހަރެންގެ ކޮންޓުރެކްޓް އާކުރާކަށް ނުޖެހޭނެ. ކޮންޓުރެކްޓް އެބައޮތް. އަހަރެން ކުރަންޖެހޭ ކަމަކީ މެޗުތަކުން މޮޅުވުން،" އަންޗެލޮޓީ ބުންޏެވެ.
ޔޫރަޕްގެ ޗެމްޕިއަންކަން 14 ފަހަރު ހޯދާފައިވާ ރެއާލުން ޒަމާނުންސުރެ ލީގުގެ ކާމިޔާބަށް ވުރެ ބޮޑަށް އިސްކަންދެނީ ޔޫރަޕްގައި ހޯދާ ކާމިޔާބީ ތަކަށެވެ. ފާއިތުވި 10 އަހަރުގެ ތެރޭގައި ރެއާލުން ވަނީ ޗެމްޕިއަންސް ލީގު ފަސް ފަހަރު ފަހަރު ހޯދައިފަ އެވެ. މި މުއްދަތުގައި ރެއާލް އިން ލީގު ކާމިޔާބުކުރީ ތިން ފަހަރު އެވެ.
އެކަމަކު، އަންޗެލޮޓީ ބުނީ ޗެމްޕިއަންސް ލީގުގެ މުހިންމުކަން ބޮޑަސް، ލީގު ހޯދަން ކުރާ މަސައްކަތަށް މަޑުޖެހުމެއް ނާންނާނެ ކަމަށެވެ.
