ޕެރިސް (ފެބްރުއަރީ 21) - މަޝްހޫރު ފުޓްބޯޅަ ތަރި، ޒިނެދިން ޒިދާނަށް އިޓަލީގެ ޔުވެންޓަސް އާއި ފްރާންސްގެ ޕީއެސްޖީގެ ކޯޗިން އޮފާތަކެއް ލިބިފައިވާ ކަމަށް ފްރާންސްގެ މީޑިއާ ރިޕޯޓްތައް ބުނެފި އެވެ.
މީގެ 18 މަސް ކުރިން ރެއާލް މެޑްރިޑްގެ ކޯޗުކަން ދޫކޮށްލި ޒިދާން ހުރީ އެއްވެސް ޓީމަކާ ހަވާނުލުވެ އެވެ. ޒިދާން، ފްރާންސް ގައުމީ ޓީމާ ހަވާލުވާން އުޅޭ ކަމަށް މީގެ ކުރިން މީޑިއާގައި ވާހަކަ ދެކެވުނު ނަމަވެސް، ފްރާންސްގެ ކޯޗަކަށް ހުރި ޑިޑިއޭ ޑެޝޯމްޕްސް ވަނީ 2026 ވަނަ އަހަރުގެ ވޯލްޑް ކަޕްގެ ނިޔަލަށް ކޮންޓްރެކްޓް އާ ކޮށްފަ އެވެ.
ޕީއެސްޖީގެ ކޯޗުކަމާ ޒިދާން ހަވާލުވުމުގެ ފުރުސަތު ބޮޑު ކަމަށް މީގެ ކުރިން ވެސް މީޑިއާގައި އަޑުފެތުރުނެވެ. އެކަމަކު، ޕީއެސްޖީން ވަނީ އެންމެ ފަހުން ވެސް އެ ޓީމުގެ ކޯޗަކަށް ކްރިސްޓޮފް ގަލްޓިއޭ ހަމަޖައްސައިފަ އެވެ. ގަލްޓިއޭގެ ކޯޗުކަމުގައި ޕީއެސްޖީ އަށް ދެމެހެއްޓެނިވި ގޮތެއްގައި ރަނގަޅު ނަތީޖާ ނެރެން އުނދަގޫވެފައިވާއިރު، އޭނާގެ މުސްތަގުބަލާ ގުޅޭގޮތުން ވަނީ ސުވާލު އުފެދިފަ އެވެ.
މާލީ މައްސަލަަތަކެއްގެ ސަބަބުން ޔުވެންޓަސް އަށް ގިނަ ގޮންޖެހުންތަކެއް ކުރިމަތިވެފައިވާއިރު، މި ސީޒަން ނިމުމުން އެ ޓީމުގެ ކޯޗުކަމުން މެސިމޯ އަލެގްރީ ވަކިވާނެ ކަމަށް އިޓަލީގެ މީޑިއާތަކުން ވަނީ ރިޕޯޓްކޮށްފަ އެވެ. އަދި ޔުވެންޓަސްގެ ވިސްނުމަކީ ކުރިން އެ ޓީމަށް ކުޅުނު ޒިދާނާ ޓީމު ހަވާލުކުރަން ކަމަށް ވެސް އެވެ.
ފްރާންސްގެ ލެ ފިގާރޯ ނޫހަށް ދިން އިންޓަވިއުއެއްގައި ޒިދާން ބުނީ ގިނަ ޓީމުތަަކަކާ ހަވާލުވާން ހުށަހެޅުންތައް ލިބިފައިވާ ކަމަށެވެ. އަދި އުންމީދަކީ ވަރަށް އަވަހަށް ކޯޗިން އަށް އެނބުރި އައުން ކަމަށް ޒިދާން ވަނީ ބުނެފަ އެވެ.
"އަހަންނަށް މިހާރު ވަރަށް ހުސް ވަގުތު ގިނަ. މިހާރު ވިސްނުމަކީ ކިހާ ދުވަހެއް ވަންދެންތޯ މި ގޮތުގައި ދާނީ. ފަަހަރެއްގައި އަންނަ ޖޫން މަހާ ހަމައަށް މިހެން ގޮސްދާނެ. އެކަމަކު، އެ އަށް ވުރެ އަވަސްނުވާނެ އެކޭ ނުބުނެވޭނެ ދޯ،" ރެއާލަށް ޖެހިޖެހިގެން ތިން ޗެމްޕިއަންސް ލީގު ކާމިޔާބު ކޮށްދިން ޒިދާން ބުންޏެވެ.
ރެއާލަށް ދެ ފަހަރެއްގެ މަތިން ކޯޗުކޮށްދިން ޒިދާން، ތިން ވަނަ ފަަހަރަށް އެ ޓީމާ ހަވާލުވުމުގެ ފުރުސަތު އޮތް ކަމަށް ރެއާލްގެ ބޯޑު މެމްބަރަކާ ހަވާލާދީ ސްޕެއިންގެ މީޑިއާ އަކުން ވަނީ ރިޕޯޓްކޮށްފަ އެވެ. އެއީ، މި ސީޒަނަށް ފަހު، ރެއާލްގެ ކޯޗު ކާލޯ އަންޗެލޮޓީ، ބްރެޒިލް ޓީމުގެ ކޯޗުކަމާ ހަވާލުވާން އުޅޭ ކަމުގެ އަޑުތައް ގަދަވަމުން އަންނާތީ އެވެ.
