ޖުމްލަ އަގު 199 މިލިއަން ރުފިޔާއަށް އަރާ ހަ މަޝްރޫއެއް ކޮންޓްރެކްޓަރުންނާ ހަވާލުކޮށްފި އެވެ.
އިއްޔެ ހަވާލުކުރި މި މަޝްރޫއުތަކުގެ ތެރޭގައި ހިމެނެނީ ނަރުދަމާ ނިޒާމުގެ ތިން މަޝްރޫއަކާއި، ބަނދަރުގެ ދެ މަޝްރޫއެއްގެ އިތުރުން ގޮނޑުދޮށް ހިމާޔަތް ކުރުމުގެ މަޝްރޫއެކެވެ. އެ މަޝްރޫއުތައް ހަވާލުކޮށްފައި ވަނީ ފެނަކަ ކޯޕަރޭޝަނާއި އެމްޓީސީސީގެ އިތުރުން ސާސް-އީ ކޮންސްޓްރަކްޝަނާ އެވެ.
މީގެ ތެރެއިން ވެސް އެންމެ ގިނަ މަޝްރޫއު ހަވާލުކޮށްފައި ވަނީ ފެނަކައާ އެވެ. އެގޮތުން، އެ ކުންފުންޏަށް ވަނީ ސ. ހިތަދޫ، ގއ. ވިލިނގިލި އަދި ފ. ނިލަންދޫގެ ނަރުދަމާގެ މަސައްކަތް ހަވާލުކޮށްފަ އެވެ.
ސ. ހިތަދޫ ފެނާއި ނަރުދަމާގެ މަޝްރޫއު
ހިތަދޫ އަލަށް އާބާޑުވާ ސަރަހައްދުގައި ފެނާއި ނަރުދަމާ ގާއިމުކުރުމަށް ފެނަކައަށް ހަވާލުކުރީ 21.5 މިލިއަން ރުފިޔާއަށް 350 ދުވަހުގެ ތެރޭގައި ނިންމާ ގޮތަށެވެ. މި މަސައްކަތް ނިންމާ ހަވާލުކުރަން ޖެހޭ ފަހު ތާރީހަކީ 2024, ޖެނުއަރީ 10 އެވެ.
މި މަޝްރޫއުގެ ދަށުން ހިތަދޫގައި އަލަށް އާބާދުވާ ސަރަހައްދުގައި ނަރުދަމާ ހޮޅި އެޅުމާއި، ޖަންކްޝަން ބެހެއްޓުމާއި، ފެނުގެ ވިއުގައެއް އަޅާ، ފެން މީޓަރުތައް ބެހެއްޓުމުގެ އިތުރުން މިހާރު އައްޑޫގައި ހިދުމަތް ދެމުންނދާ ފެނާއި ނަރުދަމާގެ ނިޒާމާ ގުޅާލާނެ އެވެ.
ގއ. ވިލިނގިލި ނަރުދަމާގެ މަޝްރޫއު
ވިލިނގިލީގައި އަލަށް އާބާދުވި ސަރަހައްދާއި ހިއްކި ބިމުގައި ނަރުދަމާ ނިޒާމު ގާއިމު ކުރުމަށް 43.8 މިލިއަން ރުފިޔާއަށް ފެނަކައާ ހަވާލުކުރީ 480 ދުވަހުގެ ތެރޭގައި ނިންމާ ގޮތަށެވެ. މި މަސައްކަތް ނިންމާ ހަވާލުކުރަން ޖެހޭ ފަހު ތާރީހަކީ 2024, މެއި 19 އެވެ.
މި މަޝްރޫއުގެ ދަށުން ވިލިނގިލީގައި އަލަށް އާބާދުވި ސަރަހައްދާއި ހިއްކި ބިމުގައި ނަރުދަމާ ހޮޅި އަޅާ، ޕަމްޕް ސްޓޭޝަން ބަހައްޓާ، ނަރުދަމާ ޖަންކްޝަން ބެހެއްޓުމުގެ އިތުރުން ސީ އައުޓްފޯލްއެއް އަޅާނެ އެވެ.
ފ. ނިލަންދޫ ނަރުދަމާގެ މަޝްރޫއު
ނިލަންދޫގައި މިހާރު ހުރި ވެކިއުމް ސްވަރޭޖް ސިސްޓަމް އަޕްގްރޭޑް ކުރުމަށް 42.3 މިލިއަން ރުފިޔާއަށް ފެނަކައާ ހަވާލުކޮށްފައި ވަނީ 180 ދުވަސް ތެރޭގައި ނިންމާ ގޮތަށެވެ. މި މަސައްކަތް ނިންމާ ހަވާލުކުރަން ޖެހޭ ފަހު ތާރީހަކީ އަންނަ ޖުލައި މަހުގެ 24 އެވެ.
މި މަޝްރޫއުގެ ދަށުން ނިލަންދޫގައި 2008 ވަނަ އަހަރު ގާއިމްކޮށްފައިވާ ނަރުދަމާ ނިޒާމުގެ ވެކިއުމް ސްޓޭޝަން ހަދާ، ޕަމްޕުތަކާއި އެހެނިހެން ތަކެތި ބަދަލުކޮށް، ސީއައުޓްފޯލްއެއް އަޅާ، ސްވާ ޖެޓިން މެޝިނެއް ފޯރުކޮށްދޭނެ އެވެ.
އއ. ތޮއްޑޫ ގޮނޑުދޮށް ހިމާޔަތްކުރުން
ތޮއްޑޫ ގޮނޑުދޮށް ހިމާޔަތްކުރުމުގެ މަޝްރޫއު 20.3 މިލިއަން ރުފިޔާއަށް ސާސް-އީ ކޮންސްޓްރަކްޝަންއާ ހަވާލުކޮށްފައި ވަނީ 365 ދުވަހުގެ ތެރޭގައި ނިންމާ ގޮތަށެވެ. މި މަސައްކަތް ނިންމާ ހަވާލުކުރަން ޖެހޭ ފަހު ތާރީހަކީ 2024, ޖެނުއަރީ 25 އެވެ.
މި މަޝްރޫއުގެ ދަށުން 750 މީޓަރުގެ ޖިއޯޓިއުބް ރިވެޓްމަންޓެއް ގާއިމުކުރުމާއި 17،000 ކޮޑިމީޓަރުގެ ވެލިން ގޮނޑުދޮށް މުއްސަނދި ކުރާނެ އެވެ. މިއީ ތޮއްޑޫގައި ފާހަގަކުރެވިފައިވާ ރަށްގިރުމުގެ މައްސަލަ ހައްލު ކުރުމަށް ހިންގާ މަޝްރޫއެކެވެ.
ރ. ދުވާފަރު ބަނދަރުގެ މަޝްރޫއު
ދުވާފަރު ބަނދަރު އަޕްގްރޭޑް ކުރުމުގެ މަޝްރޫއު 11.4 މިލިއަން ރުފިޔާއަށް އެމްޓީސީސީއާ ހަވާލުކުރީ 180 ދުވަހުގެ ތެރޭގައި ނިންމާ ގޮތަށެވެ. މި މަސައްކަތް ނިންމާ ހަވާލުކުރަން ޖެހޭ ފަހު ތާރީހަކީ އަންނަ ޖުލައި މަހުގެ 24 އެވެ.
މި މަޝްރޫއުގެ ދަށުން، ދުވާފަރު ބަނދަރުގެ މެދު ދިޔައިން ފެށިގެން -3.0 މީޓަރު ހަމަވާ ވަރަށް 39،135 ކިއުބިކް މީޓަރު ބަނދަރު ފުންކުރާނެ އެވެ. އަދި 1.5*154 މީޓަރުގެ ކޮންކްރީޓް ޖެޓީއެއް ހަދާނެ އެވެ.
ބ. ދަރަވަންދޫ ބަނދަރުގެ މަޝްރޫއު
ދަަރަވަންދޫ ބަނދަރު އަޕްގްރޭޑް ކުރުމުގެ މަޝްރޫއު 59.9 މިލިއަން ރުފިޔާއަށް އެމްޓީސީސީއާ ހަވާލުކުރީ 365 ދުވަހުގެ ތެރޭގައި ނިންމާ ގޮތަށެވެ. މި މަސައްކަތް ނިންމާ ހަވާލުކުރަން ޖެހޭ ފަހު ތާރީހަކީ 2024، ޖެނުއަރީ 25 އެވެ.
މި މަޝްރޫއުގެ ދަށުން 1،843 ކިއުބިކް މީޓަރަށް ބަނދަރު ފުން ކުރުމާއި، އަލަށް އިތުރުކުރާ ބަނދަރުގެ ބޭސިން 30،504 ކިއުބިކް މީޓަރަށް ފުންކުރުން ހިމެނެ އެވެ. އަދި ބޮޑުހިލައިގެ ބޭރުތޮށި ރިވެޓްމަންޓް، ގްރޮއިން ޖަހާ، އެއްގަމު ތޮށިލާ، ސްކޯރިން އެޕްރޮން ޖަހާ މޫރިން ރިންގާއި ބޮއި ވެސް ހަރުކުރާނެ އެވެ.
މީގެ އިތުރުން، ދެ ނެވިގޭޝަނަލް އެއިޑް ގާއިމުކޮށް، އެކްސެސް ޕްލެޓްފޯމު އަޅާ، ކޮންކްރީޓް ޖެޓީ ހަދާ، ޕޭވްމަންޓް ހެދުމުގެ އިތުރަށް 10 މަގު ބައްތި ހަރުކުރުމަކީ ވެސް މި މަޝްރޫއުގެ ދަށުން ކުރަން ހަމަޖެހިފައިވާ މަސައްކަތްތަކެވެ.
