ޅ. ހިންނަވަރުގައި އިމާރާތްކުރާ 50 ހައުސިން ޔުނިޓާއި 50 ރޯހައުސްގެ ބިންގާ އަޅައިފި އެވެ.
އިއްޔެ ހިންނަވަރު ހިއްކި ބިމުގައި ބޭއްވި ރަސްމިއްޔާތުގައި ރޯހައުސް އަދި ހައުސިން ޔުނިޓުގެ ބިންގާ އަޅުއްވައި ދެއްވީ ޕްލޭނިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން އާއި ހިންނަވަރު ދާއިރާގެ މެންބަރު ޖީހާން މަހުމޫދު އަދި އެރަށު ކައުންސިލުގެ މެންބަރުންނެވެ.
ހިންނަވަރުގައި ޑިޒައިން އެންޑް ބިލްޑް އުސޫލުން 50 ރޯހައުސް އާއި 50 ހައުސިން ޔުނިޓު އިމާރާތް ކުރުމުގެ މަސައްކަތް ދޮންބޭޒް ޕްރައިވެޓް ލިމިޓެޑްއާ ހަވާލުކޮށްފައި ވަނީ މިދިޔަ އަހަރު ޖުލައި މަހު އެވެ.
ހިންނަވަރު ހިއްކި ބިމުގައި އިމާރާތްކުރާ ރޯހައުސްއަޢި ހައުސިން ޔުނިޓުގެ ބިންގާ އެޅުމުގެ ރަސްމިއްޔާތު -- ފޮޓޯ: ހައުސިން މިނިސްޓްރީ
5000 މީހުންގެ އާބާދީއެއް އޮންނަ ހިންނަވަރު ފަޅުން 28 ހެކްޓަރުގެ ބޮޑު ބިމެއް ހިއްކީ މީގެ 12 އަހަރު ކުރިން 2011 ވަނަ އަހަރެވެ. އޭރުއްސުރެ އެ ބިމުގައި ކޮށްފައިވާ ހަމައެކަނި މަސައްކަތަކީ ހިއްކި ބިމުގެ ދެކުނު ފަރާތުގައި ބޯޓް ޔާޑަކާއި މަސް ކައްކާތަނެއް ހެދުމެވެ
ބިން ހިއްކިތާ 11 އަހަރު ފަހުން އެ ބިމުގައި 7000 އަކަފޫޓުގެ ދެ ބުރީގެ 50 ރޯހައުސް އާއި 1000 އަކަފޫޓުގެ 50 ހައުސިން ޔުނިޓު އިމާރާތްކުރަން ބަޔަކާ ހަވާލުކުރީ މިދިޔަ ޖުލައި މަހު އެވެ. ދޮންބޭޒް ޕްރައިވެޓް ލިމިޓެޑާ އެ މަސައްކަތް ހަވާލުކުރީ 83 މިލިއަން ރުފިޔާއަށް، އެއް އަހަރު ދުވަހުގެ ތެރޭގައި ނިންމާ ގޮތަށެވެ.
މި މަޝްރޫއުގެ ދަށުން އިމާރާތްކުރާ ހައުސިން ޔުނިޓުތަކުގައި ތިން ކޮޓަރިއާއި، ތިން ފާހާނާގެ އިތުރުން ސިޓިން ރޫމާއި، ބަދިގެ، ކާގެ އަދި ލޯންޑްރީ އާއި ސްޓޯ ރޫމު ހިމެނޭނެ ކަމަށް ޕްލޭނިން މިނިސްޓްރީން ބުނެ އެވެ.
އެ މިނިސްޓްރީން ބުނީ މީގެ އިތުރަށް އިމާރާތުގެ ވަށާފާރާއި ހައުސިން ޔުނިޓްތަކުގައި ދިރިއުޅޭ މީހުންނަށް ހިތްފަސޭހަ މާހައުލެއް ގާއިމް ކުރުމަށްޓަކައި ޔުނިޓްތައް ވަށައިގެން އަލި ކުރާނެ ކަމަށެވެ.
