މެޑްރިޑް (ޑިސެމްބަރު 30) - ފިނި މޫސުމުގެ ޓްރާންސްފާ ބާޒާރުގައި ޔޫރަޕްގެ ކުލަބުތަކުން ކުޅުންތެރިން ހޯދުމުގެ މަސައްކަތް ކުރަމުން އަންނައިރު، ރެއާލް މެޑްރިޑުން ސްކޮޑަށް ބަދަލުތައް ގެނައުން ދުރު ކަމަށް އެ ޓީމުގެ ކޯޗު ކާލޯ އަންޗެލޮޓީ ބުނެފި އެވެ.
ޖެނުއަރީ ޓްރާންސްފާ އަކީ ސީޒަންގެ މެދުތެރެއިން ކުލަބުތަކަށް ކުޅުންތެރިން ގަތުމަށް އޮންނަ ފުރުސަތެކެވެ. އެ ގޮތުން އަނިޔާގެ ސަބަބުންނާއި ފޯމު ދަށްވުމުގެ ސަބަބުން ޓީމަށް ގެންނަން ބޭނުންވާ ބަދަލުތައް ގެނައުމަށް މި ޓްރާންސްފާގައި ކޯޗުންނަށް ފުރުސަތު ލިބެ އެވެ.
ދުނިޔޭގެ އެންމެ ބޮޑު އެއް ކުލަބު ކަމަށްވާ ސްޕެއިންގެ ރެއާލުން ޖެނުއަރީ ޓްރާންސްފާ ފެށީ ބްރެޒިލްގެ ޒުވާން ކުޅުންތެރިޔާ އެންޑްރިޗްގެ ސޮއި ހޯދައިގެންނެވެ. އެހެންނަމަވެސް، އޭގެ ފަހުން އިތުރު ކުޅުންތެރިއެއް ގެނައުމާ ގުޅޭ އެއްވެސް މަޝްވަރާއެއް އެކުލަބުން ނުކުރެ އެވެ.
ޓްރާންސްފާތަކާ ގުޅޭގޮތުން ސުވާލުކުރުމުން އަންޗެލޯޓީ ބުނީ މިހާރު އެކުލަބުގައި އޮތް ސްކޮޑާ މެދު ހިތްހަމަޖެހޭ ކަމަށާއި، އެ ސްކޮޑަށް ބަދަލުތަކެއް ގެންނަން ޖެހޭ ކަމަށް ނުފެންނަ ކަމަށެވެ. އެންމެ މުހިންމު ކަމަކީ ހުރިހާ ކުޅުންތެރިން ވެސް އަނިޔާއެއް ނުވެ ސީޒަންގެ ބާކީ ބައި ފުރިހަމަކުރުން ކަމަށް އަންޗެލޮޓީގެ ވާހަކައިގައި ވަނީ ފާހަގަކޮށްފަ އެވެ.
ރެއާލަށް ކުރިއަށް އޮތީ ބުރަ ބޮޑު ތިން މަހެވެ. އެ ގޮތުން އެހެން ޓީމުތަކާ ހިލާފަށް އެ ޓީމަށް މެޗުތައް ގިނަ އެވެ. ސްޕެނިޝް ލީގު މެޗުތަކާއި، ޗެމްޕިއަންސް ލީގު މެޗުތަކުގެ އިތުރުން ސްޕެނިޝް ސުޕަ ކަޕާއި، ފީފާ ކުލަބު ވޯލްޑް ކަޕްގެ މެޗުތައް ވެސް ކުރިއަށް އޮތް ތިން މަހު އެ ކުލަބުން ކުޅޭނެ އެވެ. ސުޕަ ކަޕާއި ކުލަބު ވޯލްޑް ކަޕްގެ މެޗުތައް ކުޅުމަށް އެކު ލަބުން ޔޫރަޕުން ބޭރަށް ދަތުރުކުރަން ޖެހެނޭ އެވެ.
އަންޗެލޮޓީ ބުނީ އެ ކުލަބަށް ހުރި މެޗުތަކުގެ އަދަދާއި ޝެޑިއުލްގެ ބުރަ ކުޅުންތެރިންނަށް އިހުސާސް ނުވާނެ ގޮތަށް ޓީމު ރޮޓޭޓްކޮށްގެން ކުރިއަށްދާން މަސައްކަތްކުރާނެ ކަމަށެވެ. ރެއާލް ސްކޮޑުގައި މި ވަގުތު ތިބި ކޮންމެ ކުޅުންތެރިއަކާ މެދު ވެސް ފުރިހަމަ އިތުބާރު އެބައޮތް ކަމަށް އަންޗެލޮޓީ ވަނީ ބުނެފަ އެވެ.
މިދިޔަ އަހަރު އެ ޓީމުގައި ތިބި މުހިންމު ކުޅުންތެރިންގެ ތެރެއިން ކުލަބު ދޫކޮށްލީ މިޑްފިލްޑަރު ކަސެމީރޯ އެކަންޏެވެ. ކަސެމީރޯގެ ބަދަލުގައި ރެއާލް އިން ވަނީ ފްރާންސްގެ އައުރެލިން ޗުއަމެނީ ގެނެސްފަ އެވެ.
