ލ. ގަމުގައި އެޅުމަށް ނިންމާފައިވާ 100 ހައުސިން ޔުނިޓުގެ ބިންގާ އެޅުމުގެ ރަސްމިއްޔާތު މިއަދު ބާއްވައިފި އެވެ.
އެ ރަސްމިއްޔާތުގައި، 100 ހައުސިން ޔުނިޓުގެ ބިންގާ އަޅުއްވައިދެއްވީ ހައުސިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީނާއި، ރައްޔިތުންގެ މަޖިލީހުގެ ގަމު ދާއިރާގެ މެންބަރު މުހައްމަދު ވިސާމްގެ އިތުރަށް ރަށު ކައުންސިލް މެމްބަރުންނާއި އަންހެނުންގެ ކޮމިޓީގެ މެންބަރުންނެވެ.
މި މަޝްރޫއު ހަވާލުކޮށްފައިވަނީ އެސްޖޭ ކޮންސްޓްރަކްޝަން ޕްރައިވެޓް ލިމިޓެޑްއާ އެވެ. މަޝްރޫއު ހަވާލުކުރުމުގެ އެއްބަސްވުމުގައި މި އަހަރުގެ މެއި މަހު ސޮއިކުރި އެވެ.
މަޝްރޫއުގެ އަގަކީ 84،297،200.00 ރުފިޔާ އެވެ. މީގެ ދަށުން، އިމާރާތް ކުރަނީ 1000 އަކަފޫޓުގެ 100 ހައުސިން ޔުނިޓެވެ. އަދި، ކޮންމެ ޔުނިޓެއްގައި ތިން ކޮޓަރި، ތިން ފާހަނަ، ސިޓިން ރޫމް، ބަދިގެ، ކާގެ، ލޯންޑްރީ އަދި ސްޓޯރޫމް ހިމެނޭނެ އެވެ.
މި ޔުނިޓުތަކުގައި ދިރިއުޅޭ ރައްޔިތުންނަށް ހިތްފަސޭހަ މާހައުލެއް ގާއިމުކޮށްދިނުމަށް ޔުނިޓުތައް ވަށައިގެން އަލިކޮށް، ޕާކެއް ގާއިމުކޮށް، ވެހިކަލް ޕާކު ކުރާނެ ޕާކިން ޒޯނެއް ހެދުމަށް ވެސް އެއްބަސްވެފައިވެ އެވެ.
މަޝްރޫއުގެ މަސައްކަތް ނިންމުމަށް ހަވާލުކޮށްފައި ވަނީ އެއް އަހަރު ދުވަހުގެ މުއްދަތެކެވެ.
