ލެކްނޯ އެމްއެންޔޫއެސްޔޫ ފުޓްސަލް ފިއެސްޓާގެ ފިރިހެން ޑިވިޝަންގެ ޗެމްޕިއަންކަން މެޕްސް ކޮލެޖުން ހޯދިއިރު، އަންހެން ބައިގެ ތަށި ފުރަތަމަ ފަހަރަށް އެމްއެންޔޫ ބިޒްނަސް ސްކޫލް (އެމްއެންޔޫބީއެސް) އިން އުފުލާލައިފި އެވެ.
ޓާފް ދަނޑުގައި ރޭ ކުޅުނު ފިރިހެން ޑިވިޝަނުގެ ފައިނަލުގައި އެމްއެންޔޫ ބިޒްނަސް ސްކޫލް (އެމްއެންޔޫބީއެސް) އަތުން މެޕްސް މޮޅުވީ 4-3 އިންނެވެ. މިއީ މެޕްސް އިން މި މުބާރާތް ކާމިޔާބުކުރި ދެ ވަނަ ފަހަރެވެ. އެންމެ ފުރަތަމަ ތަށި އުފުލާލީ 2018 ވަނަ އަހަރު އެވެ.
ރޭގެ ފައިނަލުގައި ފުރަތަމަ ތިން ގޯލު ޖަހާފައިވަނީ ބިޒްނަސް ސްކޫލުންނެވެ. ފުރަތަމަ ދެ ގޯލު ޖެހީ އިބްރާހީމް އާތިފް އެވެ. ތިން ވަނަ ގޯލު ކާމިޔާބުކުރީ މުހައްމަދު އަނާން އެވެ. މެޕްސް ފަަހަތުން އަރައި މޮޅުވިއިރު، ގޯލުތައް ޖެހީ ޖަމްޝާދު ޖައިފަރު (ޖޭޖޭ)، އަބްދުﷲ ހިޝާން، ހަނާމް އިސްމާއިލް އަދި އަލީ ޝާޒް ހިލްމީ އެވެ. ޝާޒް، އެ ޓީމު މޮޅުކޮށްދިން ގޯލު ޖެހީ މެޗު ނިމެން މިނިޓަކަށް ވެފައި ވަނިކޮށެެވެ.
ފިރިހެން ޑިވިޝަންގެ ޗެމްޕިއަންކަން ހޯދި މެޕްސް ކޮލެޖަށް ޓްރޮފީ ހަވާލުކުރަނީ.--- ފޮޓޯ: އެމްއެންޔޫއެސްޔޫ މީޑިއާ
ފިރިހެން ޑިވިޝަނުގެ މޮޅު ކުޅުންތެރިއަކީ މެޕްސްގެ މަންސޫރު އެވެ. ފިިރިހެން ޑިވިޝަންގެ ފެއާޕްލޭޔަރަކީ އެމް އައި ކޮލެޖްގެ އަހުސާމް ހަސަން ދީދީ އެވެ. އެންމެ އުންމީދީ ކުޅުންތެރިއަކީ ސީއެފްއެސްގެ އަހުމަދު އިހާން އިނާޒް އެވެ. އެންމެ މޮޅު ކޯޗަކީ ބިޒްނަސް ސްކޫލްގެ އިސްމާއިލް އާސިފް އެވެ. އެންމެ ގިނަ ގޯލު ޖެހީ ބިޒްނަސް ސްކޫލްގެ މުހައްމަދު އިނާން އެވެ.
ފިރިހެން ޑިވިޝަނުގެ ގަދަ ފަހެއްގައި ހިމެނެނީ މެޕްސްގެ އަލީ ޝާޒް ހިލްމީ، އަހުމަދު އިބްތިޝާމް މައުސޫމް، ސީއެފްއެސްގެ މުހައްމަދު ނާބިތު ހުސެއިން، ބިޒްނަސް ސްކޫލްގެ އިނާން އަދި އަހުމަދު ރިޔުޝާން އެވެ.
އަންހެން ޑިވިޝަނުގެ ފައިނަލުގައި ރޭ ސެންޓަ ފޯ ފައުންޑޭޝަން ސްޓަޑީޒް (ސީއެފްއެސް)ގެ މައްޗަށް ބިޒްނަސް ސްކޫލުން ކުރިހޯދީ 2-0 އިންނެވެ. މި މެޗުގައި ބިޒްނަސް ސްކޫލްގެ ދެ ގޯލު ވެސް ކާމިޔާބުކުރީ ފިރުޝާނާ ނަސީރު އެވެ. ފިރުޝާނާ ވަނީ މުބާރާތުގެ އަންހެން ޑިިވިޝަންގެ މޮޅު ކުޅުންތެރިޔާ އަށް ވެސް ހޮވިފަ އެވެ.
ބިޒްނަސް ސްކޫލަކީ އަންހެން ޑިވިޝަނުގެ ތަށި އުފުލާލި ތިން ވަނަ ޓީމެވެ. މީގެ ކުރިން ބޭއްވި ދެ ފަހަރު ތަށި ހޯދީ 2018 ވަނަ އަަހަރު ކްލިކް ކޮލެޖާއި 2019 ވަނަ އަަހަރު އެމްއައި ކޮލެޖް އެވެ.
އަންހެން ޑިވިޝަނުގެ ގަދަ ފަހެއްގައި ހިމެނެނީ ކްލިކް ކޮލެޖްގެ ރޮވީނާ މަރިޔަމް، ބިޒްނަސް ސްކޫލްގެ އައިމިނަތު ޝަފްނާ، ސީއެފްއެސްގެ ފާތިމަތު ނިހާމާ، އައިޝަތު ލައިސާ މަޖީދު އަދި އައިމިނަތު އާޔާ އިގްބާލް އެވެ.
އަންހެން ޑިވިޝަންގެ އެންމެ ގިނަ ގޯލު ޖެހީ ކްލިކް ކޮލެޖްގެ ޝީނީޒް މުހައްމަދު އެވެ. މި ޑިވިޝަނުގެ އެންމެ މޮޅު ކޯޗަކަށް މުހައްމަދު ޔާސިރު ހޮވުނުއިރު، އެންމެ އުންމީދީ ކުޅުންތެރިއަކީ އެފްއެޗްއެސްގެ މަރިޔަމް ރިޝްމާ އެވެ. އަދި ފެއާ ޕްލޭޔާ އަކީ އެފްއެޗްއެސްގެ އައިމިނަތު ޝަފާނާ އަލީ އެވެ.
