މާލޭގެ މަގުތައް ޒަމާނީ ފެންވަރަށް ތަރައްގީކުރުމުގެ މަޝްރޫއުގެ ދަށުން, ތާރު އަޅައިގެން އަމީނީ މަގު ހެދުމުގެ މަސައްކަތް ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އިން މިއަދު ފަށައިފި އެވެ.
ޖުލައި ތިންވަނަ ދުވަހު ޕްލޭނިން މިނިސްޓްރީން އާރުޑީސީއާއެކު އެއްބަސްވުމެއްގައި ސޮއިކޮށް ހަވާލުކުރި މަޝްރޫއުގެ އަމަލީ މަސައްކަތް ފެށީ އެ މަގުގެ ހެންވޭރުކޮޅުގައި މިއަދު ހަވީރު ބޭއްވި ރަސްމިއްޔާތެއްގަ އެވެ.
އެ ރަސްމިއްޔާތުގައި އާރުޑީސީގެ މެނޭޖިން ޑިރެކްޓަރު މޫސާ އަލި މަނިކާއި، ޕްލޭނިން މިނިސްޓްރީގެ ސްޓޭޓް މިނިސްޓަރު އަކުރަމް ކަމާލުއްދީންގެ އިތުރަށް، ރައްޔިތުންގެ މަޖިލީހުގެ ހެންވޭރު ދެކުނު ދާއިރާގެ މެންބަރު ހުސައިން ޝަހީމާއި މާލެ ސިޓީގެ މޭޔަރު ޑރ. މުހައްމަދު މުއިއްޒު ބައިވެރިވެވަޑައިގެންނެވި އެވެ.
އަމީނީ މަގު ތަރައްގީ ކުރުމުގެ މަސައްކަތް އާރްޑީސީއާ ހަވާލުކޮށްފައިވަނީ 210 ދުވަހުގެ ތެރޭގައި ނިންމާ ގޮތަށެވެ. އެއީ 84 މިލިއަން ރުފިޔާއަށެވެ.
މަޝްރޫއު ފެށުމުގެ ގޮތް ބޭއްވި ރަސްމިއްޔާތުގައި މޫސާ ވިދާޅުވީ ވިއްސާރަ ދުވަސްވަރު އަމީނީ މަގު ފެންބޮޑުވެ ހަލާކުވެފައި އޮންނަ އޮތުމަށް ނިިމުމަކަށް ގެންނަން އާރުޑީސީން ހަވާލުވި މަޝްރޫއަކީ އެ ކުންފުނިން ކުރިއަށް ގެންދާ އެންމެ މުހިންމު އެއް މަޝްރއެވެ.
"އަދުގެ ސަރުކާރުން އާރުޑީސީއާ ހަވާލުކުރެއްވި މި މުހިންމު މަޝްރޫއާއެކު އަޅުގަނޑުމެން މި ފަށަނީ ބޮޑު ގޮންޖެހުމާއި އެ ނުތަނަވަސް ޝަކުވާތަކަށް ނިންމުން ގެނެސްދޭން،" މޫސަ ވިދާޅުވި އެވެ.
އޭނާ ވިދާޅުވީ މަގު ހެދުމުގެ މިފަދަ މަޝްރޫއުތައް ކުރިއަށް ގެންދާއިރު މަސައްކަތުގެ ވައްޓަފާޅި އާއި ފެންވަރު ހިފެހެއްޓުމަކީ އެ ކުންފުނިން އަބަދުވެސް އެންމެ ބޮޑު ސަމާލު ކަމެއް ދޭނެ ކަންތައްތައް ކަމަށެވެ.
އެކަމަކު މަގުތައް ހެދުމުގެ މިފަދަ މަޝްރޫއުތައް ކުރިއަށް ގެންދިއުމުގައި ގޮންޖެހުންތަކެއް ވެސް ހުންނަ ކަމަށް އޭނާ ވިދާޅުވި އެވެ.
"މާލޭ ބައެއް މަގުތަކުގައި ކޭބަލްތަކާއި ހޮޅިތަކާއި އެނޫން ވެސް ބައެއް ތަކެތި ވަޅުލާފައި ހުންނަ ގޮތުން މަގު ހެދުމުގެ މަސައްކަތް ކުރިޔަށް ގެންދިއުމަށް ގޮންޖެހުން ކުރިމަތިވޭ،" މޫސާ ވިދާޅުވި އެވެ.
އަމީނީ މަގު ހެދުމުގެ މަޝްރޫއު މިއަދު ފެށިއިރު، މި މަސައްކަތް ބޮޑު އަގުގައި ހަވާލުކުރި މައްސަލަ އެންޓި-ކޮރަޕްޝަން ކޮމިޝަން (އޭސީސީ) އަށް މިދިޔަ މަހު ވަނީ ހުށަހަޅާފަ އެވެ.
މައްސަލަ އޭސީސީއަށް ހުށަހެޅީ ކުރިން 39 މިލިއަން ރުފިޔާއަށް ސިޓީ ކައުންސިލުން އެ މަސައްކަތް ކުރަން އުޅެނިކޮށް، ސަރުކާރުން 84 މިލިއަން ރުފިޔާއަށް އެ މަޝްރޫއު އާރްޑީސީއާ ހަވާލުކުރުމުންނެވެ.
އޭސީސީން އެ މައްސަލަ ބަލަން ފެށި ނަމަވެސް މަޝްރޫއު ހުއްޓާލުމަށް އަންގާފައެއް ނުވެ އެވެ. އެހެންވެ އާރުޑީސީން ވެސް ވަނީ މަޝްރޫއު ފަށައިގެން ކުރިއަށް ގެންދިއުމަށް ނިންމައިފަ އެވެ.
