ޕެރިސް (މެއި 28) - ޗެމްޕިއަންސް ލީގުގެ ފައިނަލުގައި މިރޭ ލިވަޕޫލާ ދެކޮޅަށް ނުކުންނައިރު، ރެއާލް މެޑްރިޑަށް މި މުބާރާތުގެ ފައިނަލުގެ ޕްރެޝަރު އަލެއް ނުވާނެ ކަމަށް އެ ޓީމުގެ ކޯޗު ކާލޯ އަންޗެލޮޓީ ބުނެފި އެވެ.
ރެއާލުން ވަނީ މިހާތަނަށް ޗެމްޕިއަންސް ލީގުގެ ފައިނަލުގައި ކުޅުނު 16 ފަހަރުގެ ތެރެއިން 13 ފަހަރު ކާމިޔާބުކޮށްފަ އެެވެ. ރެއާލުން ވަނީ ޗެމްޕިއަންސް ލީގުގެ ފައިނަލުގައި ކުޅުނު ހަ ފަހަރު ވެސް މޮޅުވެފަ އެވެ. އޭގެ ތެރޭގައި 2018 ވަނަ އަހަރުގެ ފައިނަލުގައި ލިވަޕޫލް އަތުން 3-1 އިން މޮޅުވި މެޗު ވެސް ހިމެނެ އެވެ. ރެއާލް އެންމެ ފަހުން ޗެމްޕިއަންސް ލީގުގެ ފައިނަލެއްގައި ބަލިވީ ވެސް ލިވަޕޫލް އަތުންނެވެ. އެއީ 1981 ވަނަ އަހަރު ޕެރިހުގައި ކުޅުނު ފައިނަލުގައި 1-0 އިންނެވެ.
މިރޭ ޕެރިހުގައި ކުޅޭ ފައިނަލުގެ ކުރިން އޮތް ނޫސްވެރިންގެ ބައްދަލުވުމުގައި އަންޗެލޮޓީ ބުނީ އެ ޓީމުގައި ޗެމްޕިއަންސް ލީގުގެ ހަތަރު ފައިނަލުން މޮޅުވުމުގެ ތަޖުރިބާ ހުރި ކުުޅުންތެރިން ގިނަ ކަމަށާއި އެެހެންކަމުން މޮޅުވުމަށް އެ ނަގަން ޖެހޭ ޕްރެޝަރަށް އެ ކުޅުންތެރިން އާ ނުވާނެ ކަމަށެވެ.
"އަހަރެމެން މި ތިބީ ބޭނުންވާ މަންޒިލާ ވަރަށް ގާތުގައި. ރެއާލަށް އެނގޭނެ މި ކަހަލަ މެޗުތަކުގެ ޕްރެޝަރުގެ ތެރޭގައި ކުޅެން. ދުވަސްވީ ތަޖުރިބާކާރު ކުޅުންތެރިން އެހީވާނެ ޒުވާން ކުޅުންތެރިންނަށް، މި މެޗު މާހައުލުގައި ކޮންފިޑެންސާ އެކު ކުޅެލަން،" އަންޗެލޮޓީ ބުންޏެވެ. "މި ޓީމުގައި ތިބި ކުޅުންތެރިންނަކީ ޖެހިޖެހިގެން ތިން އަހަރު ޗެމްޕިއަންސް ލީގު ހޯދި، ތަށި ކާމިޔާބުކުރަން ކުރަން ޖެހޭ މަަސައްކަތް އެނގޭ ކުުޅުންތެރިން،"
ފައިނަލް މެޗުގެ ކުރިން ބޭއްވި ފަހު ޕްރެކްޓިހުގެ ތެރެއިން އަންޗެލޮޓީ ކުޅުންތެރިންނަށް ބުނެދެނީ.
މިއީ އަންޗެލޮޓީ ޗެމްޕިއަންސް ލީގުގެ ފައިނަލަކަށް ނުކުންނަ ފަސް ވަނަ ފަހަރެވެ. މީގެ ކުރިން އަންޗެލޮޓީގެ ކޯޗުކަމުގައި އޭސީ މިލާން ވަނީ ދެ ފަހަރެއްގެ މަތިން ލިވަޕޫލާ ބައްދަލުކޮށްފަ އެވެ. އެ ގޮތުން އޭސީ މިލާން ވަނީ 2005 ވަނަ އަހަރު އިސްތަންބޫލްގައި ކުޅުނު ފައިނަލުގައި ޕެނަލްޓީ ޖަހައިގެން ލިވަޕޫލް އަތުން ބަލިވެފަ އެވެ. އެކަމަކު، 2007 ވަނަ އަހަރު އެތަންސްގައި އޮތް ފައިނަލުގައި އަންޗެލޮޓީގެ މިލާން ޓީމު ވަނީ 2-1 އިން ލިވަޕޫލް ބަލިކޮށްފަ އެވެ.
ލިވަޕޫލުން މިރޭ ރެއާލް ބަލިކޮށްފިނަމަ ހަތް ވަނަ ޗެމްޕިއަންސް ލީގު ތަށި ލިބޭނެ އެވެ. އޭރުން މިލާނާ އެއްވަރުވާނެ އެވެ. އަންޗެލޮޓީ ބުނީ މިލާނުގެ ގިނަ ބައެއްގެ ފޯނު ކޯލު ލިބެމުން އަންނަ ކަމަށެވެ.
"މިލާނުން އެބަ އެދޭ އަހަރެން ގާތުގައި ލިވަޕޫލް ހަތް ވަނަ ތަށި ހޯދިޔަނުދެން. އަނެއްކޮޅުން، އަހަރެން މިދިޔަ ސީޒަނުގައި ހުރީ ލިވަޕޫލްގެ ވާދަވެރި އެވަޓަންގައި. އަހަންނަކީ އެވަޓަންގެ ވެސް މީހެއް، އެހެންވީމަ، ރެއާލަށް ނޫނަސް ލިވަޕޫލް ހުއްޓުވަން ޖެހޭ ބައިވަރެއް ސަަބަބު އަހަންނަށް އެބައޮތް،" އަންޗެލޮޓީ ބުންޏެވެ.
ލިވަޕޫލް އަތުން ކިއޭވްގައި 2018 ވަނަ އަހަރު ރެއާލް މޮޅުވި ފައިނަލުގައި ތަރި އަކީ ގަރެތު ބޭލް އެވެ. ބޭލް ވަނީ އެ މެޗުގައި ބެންޗުން އަރައި ދެ ގޯލު ޖަހައިފަ އެވެ. އަންޗެލޮޓީ ބުނީ ބޭލްގެ އިތުރުން އެޑެން ހަޒާޑް ވެސް މި މެޗަށް ފިޓް ކަމަށެވެ.
މެޗުގެ ކުރިން ލިވަޕޫލްގެ މުހައްމަދު ސަލާހު ވަނީ 2018 ވަނަ އަހަރުގެ ބަދަލުހިފަން ބޭނުންކަމަށް ބުނެފަ އެވެ. އެ އަށް ރެއާލްގެ ބައެއް ކުޅުންތެރިން ވަނީ ރައްދުދީފަ އެވެ.
އެ ގޮތުން ރެއާލްގެ ފުލްބެކް، ޑެނީ ކާވަހާލް ބުނީ ދެ ވަނަ ފައިނަލެއްގައި ސަލާހާއި ލިވަޕޫލް ރެއާލް އަތުން ބަލިވުން އެއީ މާ ބޮޑު ކަމަކަށް ނުވާނެ ކަމަށެެވެ. އަދި ރެއާލްގެ ފެޑެރީކޯ ވަލްވޭޑޭ ބުނީ ސަލާހުގެ އެ ވާހަކަތައް ފެނުނީ ރެއާލަށް އިހުތިރާމް ކުޑަކޮށް ކަމަށާއި އޭގެ ޖަވާބު ދޭން ދަނޑުމަތީގައި މޮޅަށް ކުޅެން ބޭނުންވާ ކަމަށެވެ.
ޕެރިހުގައި މިރޭ ކުޅޭ ޗެމްޕިއަންސް ލީގުގެ ފައިނަލް މެޗު ފަށާނީ ރާއްޖެ ގަޑިން 00:00 ގަ އެވެ.
