ގދ. ތިނަދޫގައި 200 ހައުސިން ޔުނިޓް އަޅާނެ ބަޔަކު ހޯދަން ފިނޭންސް މިނިސްޓްރީން މިދިޔަ ބުރާސްފަތި ދުވަހު އިއުލާން ކޮށްފި އެވެ.
ފިނޭންސް މިނިސްޓްރީން އެ ޕްރޮޖެކްޓް އިއުލާން ކޮށްފައި ވަނީ ޑިޒައިން އެންޑް ބިލްޑް އުސޫލުން މަސައްކަތް ގެންދާ ގޮތަށެވެ. އެއީ އެ އިމާރާތްތަކުގެ ފަރުމާ އެކުލަވާލުމާއި، އިމާރާތްތައް އެޅުމުގެ މަސައްކަތާ ވެސް ހަވާލު ވާން ޖެހޭ ގޮތަށެވެ.
އެ ކަމަށް ޝައުގުވެރިވާ ފަރާތްތަކުން ބީލަމުގައި ބައިވެރިވާން 500 ރުފިޔާގެ ފީއެއް ދައްކަން ޖެހެ އެވެ.
އެ ފައިސާ ބަލައިގަންނާނީ މެއި މަހުގެ އަށްވަނަ ދުވަހުން ފެށިގެން މެއި މަހުގެ 26 ވަނަ ދުވަހާ ހަމައަށް ބަންދު ދޫން ކޮންމެ ދުވަހެއްގެ ހެނދުނު 8:30 އިން މެންދުރު 2:00 އަށް މިނިސްޓްރީގެ އޮންލައިން ޕޭމަންޓް ޕޯޓަލް ބަނޑޭރި-ޕޭ މެދުވެރިކޮށް ކަމަށް މިނިސްޓްރީގެ އިއުލާނުގައިވެ އެވެ.
އަދި ފައިސާ ދެއްކުމަށް ފަހު، ބީލަމަށް ރަޖިސްޓްރީވުމަށް އެދޭ ފަރާތުގެ ނަމާއި އެޑްރެސް، ގުޅޭނެ ނަންބަރާއި އީ-މެއިލް އެޑްރެސް އަދި ފައިސާ ދެއްކި ރަސީދުގެ ކޮޕީ ފިނޭންސް މިނިސްޓްރީއަށް މެއިލްއެއް ފޮނުވަން ޖެހޭނެ ކަމަށް ވެސް އިއުލާނުގައި ބުނެފައިވެ އެވެ. މަސައްކަތާ ގުޅޭ އެންމެހާ ލިޔެކިއުންތައް މިނިސްޓްރީގެ ވެބްސައިޓްގައި މެއި އަށްވަނަ ދުވަހުން ފެށިގެން ޑައުންލޯޑް ކުރެވެން ހުންނާނެ ކަމަށް ބުނެފައިވެ އެވެ.
ޕްރޮޖެކްޓްއާ ބެހޭ ގޮތުން އެއްވެސް ސުވާލެއް އޮތްނަމަ، މެއި މަހުގެ 16 ވަނަ ދުވަހުގެ މެންދުރުފަހު 1:30 ގެ ކުރިން އީމެއިލް ކުރަން ޖެހެ އެވެ.
ޕްރޮޖެކްޓުގެ ބިޑްސެކިޔުރިޓީގެ ގޮތުގައި 1،050،000 ރުފިޔާ ނުވަތަ އެ އަދަދާ އެއްވަރު އަދަދެއްގެ އެމެރިކާ ޑޮލަރު ހުށަހަޅަން ޖެހޭނެ ކަމަށާއި ބިޑް ސެކިޔުރިޓީގެ މުއްދަތަކީ ބިޑު ހުޅުވާ ތާރީހުން ފެށިގެން 148 ދުވަސް ކަމަށް އިއުލާނުގައި ބުނެފައިވެ އެވެ.
އިއުލާނުގައިވާ ގޮތުން، ބީލަން ހުޅުވުން އޮންނާނީ މެއި މަހުގެ 30 ވަނަ ދުވަހުގެ ހެނދުނު 10:00 ގައި ފިނޭންސް މިނިސްޓްރީގެ ނޭޝަނަލް ޓެންޑާގެ ޖަލްސާ ކުރާ މާލަމުގަ އެވެ.
ގދ. ތިނަދޫއަކީ ރާއްޖޭގެ ފަސްވަނައަށް އެންމެ އާބާދީ ބޮޑު ރަށެވެ. ގާތްގަނޑަކަށް 7،000 އަށް ވުރެ ގިނަ މީހުންގެ އާބާދީއެއް އޮންނަ އެ ރަށުގައި ވެސް އެންމެ ދަތި ކަމަކަށް އޮތީ ބޯހިޔާވަހިކަމުގެ މައްސަލަ އެވެ. މީގެ ކުރިން ވެސް ތިނަދޫގައި ވަނީ 120 ހައުސިން ޔުނިޓް ގާއިމްކޮށްފަ އެވެ.
