ހުސްވެފައިވާ ވިކްޓަރީ ސްޕޯޓްސް ކްލަބްގެ ރައީސްގެ މަގާމަށް ހުސެއިން އާދަމް (އާދަމްބެ) އިންތިހާބުވެވަޑައިގެންފި އެވެ.
މުލިއާގޭ ޗީފް އޮފް ސްޓާފްގެ މަގާމު ފުރުއްވަމުން އަންނަ، އާދަމް އަކީ 1980 ގެ އަހަރުތަކުގައި ވިކްޓަރީ ޓީމުގެ މުހިންމު ކުޅުންތެރިއެކެވެ. ފުޓްބޯޅައިގެ އިތުރުން އެކި ކުޅިވަރުތަކުގެ ތެރޭގައި ޝާމިލުވެ އުޅުނު، ހުސެއިން އަކީ ރައީސް އިބްރާހިމް މުހައްމަދު ސޯލިހުއާ ވެސް ގާތް ގުޅުމެއް އޮންނަ ބޭފުޅެކެވެ.
ކުޅުންތެރިންގެ މުސާރަ ނުދިނުމާއި އެޑްމިނިސްޓްރޭޓިވް ގިނަ މައްސަލަތަކުގެ ސަބަބުން އެފްއޭއެމުން 2019 ވަނަ އަހަރު ފުޓްބޯޅައިގެ ހަރަކާތްތަކުން ސަސްޕެންޑް ކޮށްފައިވާ ވިކްޓަރީ ގެ ޗެއާޕާސަނަކަށް އެންމެ ފަހުން ހުންނެވި، ޑރ. އިބްރާހިމް ނާޝިދު (ނާޝް) އާއި ބޯޑުގެ ބައެއް މެމްބަރުން އިސްތިއުފާ ދެއްވީ މީގެ މަހެއްހާ ދުވަސް ކުރިންނެވެ
މިރޭ، ކަލާފާނު ސްކޫލްގައި ބޭއްވި ވިކްޓްރީގެ އިންތިހާބުގައި ރައީސް ކަމަށް ކުރިމަތިލެއްވީ ހުސެއިން އާދަމް އެކަންޏެވެ. އޭނާ އިންތިހާބު ކާމިޔާބު ކުރެއްވީ މިރޭ ބޭއްވި ވިކްޓްރީގެ ޖަލްސާގައި ހާޒިރުވެ، ވޯޓު ދިން 46 މެމްބަރުންގެ އަގުލަބިއްޔަތުންނެވެ. ނައިބު ރައީސަކަށް އިންތިހާބުވީ އިސްމާއިލް ލަތީފް އެވެ. އޭނާ އަށް ވެސް ފުރިހަމަ އަގުލަބިއްޔަތު ލިބިވަޑައިގެންނެވި އެވެ.
އަލަށް އިންތިހާބުވި ވިކްޓްރީގެ ބޯޑު މެމްބަރުންގެ ތެރޭގައި ހިމެނެނީ ރައްޔިތުންގެ މަޖިލީހުގެ ހުޅުމާލެ ދާއިރާގެ މެމްބަރު އަލީ ނިޔާޒުގެ އިތުރުން ފާތިމަތު ޝެރިން، ވިކްޓްރީ އަށް ކުރިން ކުޅުނު މިޑްފީލްޑަރު، މުހައްމަދު ޝައްފާޒު (ސައްޕޭ)، އިބްރާހިމް މުހައްމަދު، އަހުމަދު ފައިސަލް، އިބްރާހިމް އިޒްހާން، އިސްމާއިލް ޝަރީފް، އަހުމަދު އަރީސް (ޕަޓޭ)ގެ އިތުރުން ވިކްޓަރީ އަށް ގިނަ ދުވަހު ހިދުމަތްތަކެއް ކޮށްދެއްވައިފައިވާ، މަޝްހޫރު ގޯލްކީޕަރު ޓްރެއިނަރު އަހުމަދު ރިޔާޒް (ގާނާ) އެވެ. މި މެމްބަރުން ވެސް ހޮވިފައިވަނީ ޖަލްސާ އަށް ހާޒިރުވެތިބި، ހުރިހާ މެމްބަރުންގެ އަގުލަބިއްޔަތުންނެވެ.
މީގެ ތެެރެއިން ޕަޓޭ އާއި ގާނާ އަކީ އެކި ދައުރުތަކުގައި ވިކްޓަރީގެ އިސް މަގާމުތައް ފުރާފައިވާ ފަރާތްތަކެކެވެ. އެންމެ ފަހުން އިންތިހާބުވި ބޯޑުގައި ވެސް ގާނާ ހިމެނެ އެވެ.
ވިކްޓްރީގެ އަހަރީ އާންމު ޖަލްސާގެ ތެރެއިން.-- ފޮޓޯ: މުހައްމަދު ޝާބިން/ އަދަދު
އަލަށް އިންތިހާބުވި ބޯޑުން ވިކްޓްރީގެ އާ ޖެނެރަލް ސެކްރެޓަރީ އަކަށް އައްޔަންކޮށްފައިވަނީ، ކްލަބް މޯލްޑިވްސްގެ އިސް ފަރާތެއް ކަމަށްވާ، މޫސާ ރަމީޒް (ރަމީ) އެވެ.
ވިކްޓަރީން، 2019/2020 ލީގު މެޗުތަކަށް ހާޒިރުނުވާ މައްސަލަ އާއި ކުޅުންތެރިންނާއި ކޯޗުންނަށް ދޭން ޖެހޭ މުސާރަ ނުލިބިގެން އެ ފަރާތްތަކުން ހުށަހަޅާފައިވާ މައްސަލަ އާއި ކްލަބް ލައިސަންސްއާ ގުޅޭ ގޮތުން ހަމަކުރަން ޖެހޭ ލިޔެކިޔުންތައް ހަމަކޮށްފައިނުވާތީ އެފްއޭއެމުން ތަކުރާރުކޮށް ދިން އިންޒާރާ އެއްގޮތަށް އަމަލުނުކުރާތީ އެންމެ ފަހުން އެ ކްލަބް ސަސްޕެންޑްވީ އެވެ. ސަސްޕެންޑްކުރިއިރު، ވިކްޓަރީން ތުހުމަތުކުރީ އެ އަދަބަކީ އެ ކްލަބުން އިސްވެ، އެފްއޭއެމްގެ ލީޑަޝިޕް ބަދަލުކުރަން މަސައްކަތްކުރާތީ ކުރި ކަމެއް ކަމަށެވެ.
މިހާރު އޮތްގޮތުން ވިކްޓަރީން އާ ބޯޑުގެ ދަށުން ކްލަބް ހިންގަން ފަށައިގެން ކްލަބްގެ ސަސްޕެންޝަން އުވާލެވިދާނެ އެވެ. އެއީ ކުޅުންތެރިންނަށް ދޭން ޖެހޭ ފައިސާގެ ކަންކަމާ ގުޅޭގޮތުން އެއްބަސްވުންތަކެއް ހަދައި ކްލަބް ލައިސަންސްގެ ކަންކަން ފުރިހަމަކޮށްގެންނެވެ. އޭރުން، މި އަހަރުގެ ދެ ވަނަ ޑިވިޝަން ފުޓްބޯޅަ މުބާރާތުގައި ވިކްޓްރީ އަށް ވާދަކުރެވިދާނެ ކަމަށް އެފްއޭއެމުން މައުލޫމާތު ދެ އެވެ.
ވިކްޓަރީ އަށް އަލަށް އިންތިހާބުވި ބޯޑުގެ ބޮލުގައި އެޅިފައި އޮތް ޒިންމާ އަކީ ކްލަބްގެ ދަރަނިތައް ހަލާސްކޮށް ޓީމަށް މުބާރާތްތަކުގައި ވާދަކުރެވޭނެ ހިސާބަށް ގެންގޮސްދިނުމެވެ. އެނގިފައިވާ ގޮތުގައި އެ ކްލަބްގެ ދަރަނި އަށް ލަންކަ ރުފިޔާ އަށް ވުރެ އިތުރެވެ.
