ލަންޑަން (އޭޕްރީލް 17) - ލޯން އެއްބަސްވުމެއްގެ ދަށުން ކްރިސްޓަލް ޕެލަސްގައި މޮޅު ކުޅުމެއް ދައްކަމުން އަންނަ މިޑްފީލްޑަރު ކޮނާ ގަލަގާ އަށް، މިރޭ އިނގިރޭސި އެފްއޭ ކަޕްގެ ސެމީ ފައިނަލުގައި ޗެލްސީއާ ދެކޮޅަށް ކްރިސްޓަލް ޕެލަސް އިން ނުކުންނަ މެޗު ކުޅެން ހުއްދަ ނުދޭން ނިންމައިފި އެވެ.
މިދިޔަ ސީޒަނުގައި ގަލަގާ ވަނީ ޗެލްސީގެ ލޯން އެއްބަސްވުމެއްގެ ދަށުން ވެސްޓް ބްރޮމްވިޗް އަލްބިއަން އަށް ވެސް މޮޅު ކުޅުމެއް ދައްކައިފަ އެވެ. މި ފަހަރު ގަލަގާ، ލޯން އެއްބަސްވުމެއްގެ ދަށުން ގުޅުނީ ކްރިސްޓަލް ޕެލަސްއާ އެވެ. އެ ޓީމުން އެފްއޭ ކަޕް ސެމީ ފައިނަލުން ފުރުސަތު ހޯދިއިރު، ގަލަގާ ވަނީ މޮޅަށް ކުޅެފަ އެވެ. ސީޒަނުގެ ހުރިހާ މުބާރާތެއްގައި ގަލަގާ ވަނީ ކްރިސްޓަލް ޕެލަސް އަށް ޖުމްލަ އަށް ގޯލު ޖަހައިދީފަ އެވެ.
ލޯން އެއްބަސްވުމެއްގެ ދަށުން ޓީމުތަކަށް ކުޅުންތެރިން ދޫކުރާއިރު، ދާއިމީ ކޮންޓްރެކްޓް އޮތް ކްލަބާ ދެކޮޅަށް ނުކުޅެވޭ ގޮތަށް ގަވާއިދު ހަދަ އެވެ. އެ ގޮތުން ކްރިސްޓަލް ޕެލަސް އަށް ގަލަގާ ލޯނަކަށް ދިނީ ވެސް ޗެލްސީއާ ދެކޮޅަށް ނުކުޅެވޭ ގޮތަށެވެ. އެކަމަކު، އެފްއޭ ކަޕް ސެމީ ފައިނަލަކީ ހާއްސަ މެޗަކަށްވާތީ ކްރިސްޓަލް ޕެލަސް އިން ވަނީ ގަލަގާ އަށް ކުޅެވޭތޯ ހުއްދަ އަކަށް ޗެލްސީ ކައިރިން އެދިފަ އެވެ. އެކަމަކު، ޗެލްސީން ވަނީ އެ ހުށަހެޅުން ވަގުތުން އަނބުރާ ފޮނުވާލައިފަ އެވެ.
ޗެލްސީގެ ކޯޗު ތޯމަސް ޓުޗެލް ބުނީ ގަލަގާ ހުރީ ހިތްހަމަނުޖެހިފައި ކަން އެނގޭ ކަމަށާއި އެކަމަކު، މުޅި ޗެލްސީގެ މަސްލަަހަތަށް ވިސްނުމަށް ފަހު މިއީ އަޅަން ޖެހޭ ފިޔަވަޅެއް ކަމަށެވެ. އަދި މި ވަރުގެ މެޗެއް ނުކުޅެ ގަލަގާ ހުންނަން ޖެހޭތީ އެކަމާ އޭނާ ކިބައިން މައާފަށް އެދޭ ކަމަށް ވެސް ޓުޗެލް ވަނީ ބުނެފަ އެވެ.
"އަހަރެމެން މި ކުޅެނީ މެޗުން މޮޅުވާން. ގަވާއިދުތަކާ ހުރިހާ ކަމެއް ސާފުކޮށް ފެންނަން އޮންނާނެ އަހަރެމެން މި ކޮންޓްރެކްޓް ހެދިއިރު ވެސް. ގަލަގާ ދެރަވާނެކަން ވެސް އެނގޭ. އެކަމަކު، މި ގޮތަށް ގަވާއިދު އޮއްވައި، އަހަރެމެން ބޭނުމެއް ނޫން ވަކި ހުއްދައެއް ދީގެން މީގެ ގެއްލުމެއް އަހަރެމެންނަށް ލިބެން،" ޓުޗެލް ބުންޏެވެ.
އުމުރުން 22 އަހަރުގެ ގަލަގާ ދައްކަމުން އަންނަ ރަނގަޅު ކުޅުމުގެ ސަބަބުން މިދިޔަ ނޮވެމްބަރު މަހު އިންގްލެންޑްގެ ސީނިއާ ޓީމުން ވެސް އޭނާ އަށް ފުރުސަތު ލިބުނެވެ.
ކްރިސްޓަލް ޕެލަސްގެ ކޯޗު ޕެޓްރިކް ވިއޭރާ ބުނީ ގަލަގާ އަށް ނުކުޅެވޭތީ ޓީމު އޮތީ އޭނާ އަށް ޓަކައި، އަދި ހާއްސަކޮށް މުބާރާތުގެ ޝަރަފަށްޓަކައި މޮޅެއް ހޯދުމަށް ކަމަށެވެ.
ވިއެރާ ވަނީ އާސެނަލަށް ކުޅެމުން ހަތަރު ފަހަރު އަދި މެންޗެސްޓާ ސިޓީގައި ހުރެ އެއް ފަހަރު އެފްއޭ ކަޕް ކާމިޔާބުކޮށްފަ އެވެ. އޭނާ އަމާޒުހިފައިގެން ހުރީ ކްރިސްޓަލް ޕެލަސް އަށް ވެސް ކާމިޔާބު ހޯދައިދިނުމަށެވެ.
އެފްއޭ ކަޕްގެ ދެ ވަނަ ސެމީ ފައިނަލުގައި ޗެލްސީ އާއި ކްރިސްޓަލް ޕެލަސް ކުޅޭ މެޗު ފަށާނީ މިރޭ ރާއްޖެ ގަޑިން 20:30 ގަ އެވެ. މި މެޗުން މޮޅުވާ ޓީމެއް އަންނަ މަހު 14 ވަަނަ ދުވަހު ކުޅޭ ފައިނަލުގައި ބައްދަލުކުރާނީ ލިވަޕޫލާ އެވެ. ލިވަޕޫލުން ރޭ ވަނީ ފުރަތަމަ ސެމީ ފައިނަލުގައި 3-2 އިން މެންޗެސްޓާ ސިޓީ ބަލިކޮށްފަ އެވެެ.
