މެޑްރިޑް (ފެބްރުއަރީ 3) - ރެއާލް މެޑްރިޑްގެ ކޯޗު ކާލޯ އަންޗެލޮޓީގެ ކޯޗިން ލައިސަންސްގެ މުއްދަތު ހަަމަވެފައިވާއިރު، އޭގެ ކަންތައްތައް ހިނގާދިޔަ ގޮތް އޭނާ މިޑިއާ އަށް އޮޅުންފިލުވައިދީފި އެވެ.
ޔުއެފާ ޕްރޯ ލައިސަންސް ހާސިލްކޮށްފައިވާ އުމުރުން 62 އަހަރުގެ އަންޗެލޮޓީގެ ކޯޗިން ލައިސަންސް މުއްދަތު ހަމަވީ ޑިސެމްބަރު 31 ވަނަ ދުވަހު އެވެ.
ކޯޗިން ލައިސަންސް އާ ނުކޮށް އޮތް މައްސަލައިގައި ޔުއެފާއިން އިޓަލީ އަށް އުފަން ކޯޗު، އަންޗެލޮޓީ އަށް އަންގާފައިވަނީ މުއްދަތު ހަމަނުވެ އޮތް ލައިސަންސެއް ނެތި ރެއާލަށް ކޯޗުކޮށްދޭން ބެންޗަށް ނުދެވޭނެ ކަމަށެވެ. އަންޗެލޮޓީގެ ކޯޗިން ލައިސަންސް މައްސަލައިގައި ޔުއެފާ އިން ވަނީ ސްޕެއިނުގެ ފުޓްބޯޅަ ފެޑެރޭޝަނަށް ވެސް މައުލޫމާތު ފޮނުވައިފަ އެވެ.
އެ މައްސަލައިގައި ސްޕެއިނުގެ މީޑިއާ އަށް އަންޗެލޮޓީ ބުނީ ޑިސެމްބަރު 31 އަށް އޭނާގެ ކޯޗިން ލައިސަންސް މުއްދަތު ހަމަވެފައިވާ ވާހަކަ އަކީ ހަގީގަތް ކަމަށެވެ. އެކަމަކު، އެ މުއްދަތު ހަމަވުމުގެ ކުރިން ކޯޗިން ލައިސަންސް އާ ކުރަން ކުރަން ޖެހޭ ކަންކަން ސްޕެއިނުގެ ފުޓްބޯޅަ ފެޑެރޭޝަނާ ގުޅިގެން ކޮށްފައިވާ ކަމަށް އަންޗެލޮޓީ ވަނީ ބުނެފަ އެވެ.
"އަހަންނަކީ އަބަދުވެސް ގަވާއިދަށް އިހުތިރާމްކުރާ މީހެއް. ކަންތައް ހިނގާދިޔަ ގޮތް އޮތީ ހުރިހާ ތަނަކަށް ރަނގަޅަށް އޮޅުންނުފިލައި. ލައިސަންސްގެ މުއްދަތު އޮތީ ހަމަވެފައި. އެކަމަކު، މިދިޔަ އޮކްޓޫބަރު މަހު ސްޕެއިނުގެ ފުޓްބޯޅަ ފެޑެރޭޝަނުގެ އެހީގައި އަހަރެން ވާނީ ކޯޗިން ލައިސަންސް އާ ކުރަން ކޯހެއް ފުރިހަމަކޮށްފައި. އެ ކަމަށްޓަކައި، ސްޕެއިނުގެ ފުޓްބޯޅަ ފެޑެރޭޝަނަށް އަހަރެން ޝުކުރު އަދާކުރަން،" އަންޗެލޮޓީ ބުންޏެވެ.
އޮފިޝަލަކާ ހަވާލާދީ ސްޕެއިނުގެ މީޑިއާ ރިޕޯޓްތައް ބުނާގޮތުން ޔުއެފާ އަށް އަންޗެލޮޓީގެ ކޯޗިން ލައިސަންސް އާ ކުރަން ބޭނުންވާ މައުލޫމާތު މިހާރު ވަނީ ސްޕެއިން ފުޓްބޯޅަ ފެޑެރޭޝަން މެދުވެރިކޮށް ފޮނުވައިފަ އެވެ.
"ދެން މައްސަލައެއް ދިމާވާނެ ކަމަކަށް ނުބެލެވޭ،" ރެއާލް މެޗުގައި ބެންޗަށް އާދެވޭނެތޯ ކުރި ސުވާލަށް އަންޗެލޮޓީ ބުންޏެވެ.
ކޯޗިން ލައިސަންސް އާ ކުރަން އަންޗެލޮޓީ ފަހުގެ ތާރީހެއްގައި ކޯހެއް ހަދާފައިނުވާނަމަ ލައިސަންސް އާ ކުރަން އޭނާ އަށް ވެސް އޮތީ އާންމު އުސޫލާ އެއްގޮތަށް ކުރިއަށް ދިއުމެވެ. އެ ގޮތަކީ ލައިސަންސް އާ ކުރަން 15 ގަޑިއިރުގެ އޮންލައިން ތިއަރީ ކޯހެއް ފުރިހަމަކޮށް، އޭގެ ފަހުން ޓެސްޓެއްގައި ބައިވެރިވެގެންނެވެ.
އެކަަމަކު، ސްޕެއިން ފުޓްބޯޅަ ފެޑެރޭޝަންގެ އެހީގައި އަންޗެލޮޓީ މިދިޔަ އޮކްޓޫބަރު މަހު ހެދި ކޯހާ އެކު އޭނާގެ ލައިސަންސް ޔުއެފާ އިން އާ ކޮށްދޭނެ ކަމަށް ރިޕޯޓްތައް ބުނެ އެވެ.
