މޫދު ކުޅިވަރުގެ މަންޒިލެއްގެ ގޮތުގައި މުޅި ދުނިޔެއަށް ދިވެހިރާއްޖެ ތައާރަފްކުރުމަކީ ވަރަށް ބޭނުންތެރި ކަމެއް ކަމަށާއި އެކަމަށްޓަކައި މޫދު ކުޅިވަރުގެ ބައިނަލްއަގްވާމީ މުބާރާތްތަކެއް މި އަހަރު ރާއްޖޭގައި ބާއްވާނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
ރައީސް އެކަން އިއުލާންކުރެއްވީ ރައްޔިތުންގެ މަޖިލިސް މި އަހަރަށް ހުޅުވަން ބޭއްވި ޖަލްސާގައި މި އަހަރުގެ ރިޔާސީ ބަޔާން އިއްވަވަމުންނެވެ.
މި އަހަރު ބާއްވާނެ ކަމަށް ރައީސް އިއުލާންކުރެއްވި މުބާރާތްތަތަކީ އޭޝިއަން ސާފިން ޗެމްޕިއަންޝިޕް އަދި ބޮޑީ ބޯޑިން ވޯލްޑް ޓުއާގެ މުބާރާތެކެވެ.
ރައީސް ވަނީ ސާފިން އަދި ބޮޑީ ބޯޑީންގެ ނެޝަނަލް ޓީމްތައް މުޅިން އަލަށް އެކުލަވާލާ ގަވާއިދުން މުސާރަދޭން ފަށާފައިވާ ކަމަށް ވިދާޅުވެފަ އެވެ.
"ދިވެހި ޒުވާނުންނަށް ލިބޭ ހަކަތައަކީ ގައުމުގެ ދުވެއްޔަށް ލިބޭނެ ހަލުވިކަން. އެހަލުވިކަން ހޯދުމަށްޓަކާ ކުޅިވަރުގައި ކުރި ފަޅަން ޖެހޭ ތަފާތު މައިދާނުން ތަށި އުފުލާލަން އެދޭ ޒުވާނުން ގިނަ. ޒުވާނުން ރަންވަނަ ހޯދުމުގެ ރީތިނަން ލިބެނީ ހުރިހާ ދިވެހިންނަށް. ގާއިމު ކުރެވޭ ތަފާތު ކުޅިވަރުގެ ވަސީލަތްތަކުގެ ސަބަބުން، ޒުވާނުންނަށް ކުރިއެރުން ލިބި، ބައިނަލްއަގްވާމީ މުބާރާތްތައް ރާއްޖޭގާ ބާއްވަން ފަހިވާނެ،" ރައީސް ވިދާޅުވި އެވެ.
ރާއްޖޭގެ ވޯޓާސްޕޯޓްސް އެތުލީޓުން އަންނަނީ ބޮޑެތި ކާމިޔާބީތައް ހޯދަމުންނެވެ. އަދި ރާޅާއެޅުމުގެ ގައުމީ މުބާރާތަށް މިދިޔަ އަހަރު ފުރަތަމަ ފަހަރަށް އަންހެން ޑިވިޝަނެއް ވަނީ އިތުރުކޮށްފަ އެވެ.
