މެންޗެސްޓާ (ޑިސެމްބަރު 24) - އިނގިރޭސި ޕްރިމިއާ ލީގުގެ މެޗުތަކުގައި ފަސް ބަދަލު ގެެނެވޭގޮތް ހަދަން ޖެހޭ ކަމަށް މެންޗެސްޓާ ޔުނައިޓެޑްގެ ކޯޗު ޖަރުމަނުގެ ރަލްފް ރަންގްނިކް ބުނެފި އެވެ.
ކޮވިޑް-19ގެ ސަބަބުން އިނގިރޭސި ޕްރިމިއާ ލީގުގެ 12 މެޗެއް މި މަސް ތެރޭގައި ފަސްކުރަން ޖެހުނުއިރު، އޭގެ ތެރޭގައި ޔުނައިޓެޑުން ބްރައިޓަން އާއި ބްރެންޓްފޯޑާ ދެކޮޅަށް ކުޅެން އޮތް މެޗުތައް ހިމެނެ އެވެ.
އިނގިރޭސި ޕްރިމިއާ ލީގުގެ ކޯޗުންނާއި ސީނިއާ އޮފިޝަލުންނާ އެކު ލީގުގެ ބޯޑުން ދާދި ފަހުން ބޭއްވި ބައްދަލުވުމުގައި މިހާރު އޮތް ކޮވިޑް-19ގެ ހާލަތުގެ ސަބަބުން ލީގު ވަގުތީ ގޮތުން މަޑުޖައްސާލަން ކްލަބްތަކުން ބޭނުމެއްނުވި އެވެ. ކްލަބްތަކުން އެދުނީ ކޮވިޑް-19ގެ ހާލަތުގެ ތެރޭގައި ވެސް ކުޅެވޭ ވަރަކަށް މެޗުތައް ކުޅޭށެވެ. އެއީ މި ވަގުތު ފަސްކުރާ މެޗުތައް ފަހުން ކުޅެފިނަމަ ސީޒަނުގެ ފަހު ކޮޅުގެ ޕްރެޝަރުގައި ގާތްގާތުގައި ގިނަ މެޗުތަކެއް ކުޅެން ޖެހޭނެތީ އެވެ.
ސްކައިސްޕޯޓްސް އަށް ދިން އިންޓަވިއުއެއްގައި ރަންގްނިކް ބުނީ މި ކަންކަމަށް ފުޓްބޯޅައިގެ ތެރެއިން ގެނެވޭނެ ހައްލަކީ މެޗުތަކުގެ ތެރެއިން ފަސް ބަދަލު ގެެނެވޭ ގޮތް ހެދުން ކަމަށެވެ.
މެޗުތަކުގައި ފަސް ބަދަލު ގެނެވޭ ގަވާއިދަކީ 2020 ވަނަ އަހަރު ކޮވިޑްގެ ސަބަބުން ތިން މަހެއްހާ ދުވަހަށް ފުޓްބޯޅަ ހުއްޓާލުމަށް ފަހު އަލުން ފެށިއިރު، ގެނައި ގަވާއިދެކެވެ. އެ ގަވާއިދު ޔޫރަޕްގެ ވަރުގަދަ ހުރިހާ ލީގެއްގައި ދަމަހައްޓަމުން އައި ނަމަވެސް ޕްރިމިއާ ލީގުގައި އޮތީ ތިން ބަދަލު ގެނެވޭ ގަވާއިދެވެ.
"ހަގީގަތަކީ މިހާރު މި އޮތީ މީގެ ދޮޅު އަހަރު ކުރިން އޮތް ހާލަތު. އަހަންނަށް ލިބިފައިވާ މައުލޫމާތު ގޯސްކަމުގައި ނުވާނަމަ ޔޫރަޕްގެ ވަރުގަދަ ލީގުތަކުގެ ތެރެއިން މި ލީގު (ޕްރިމިއާ ލީގު) އެކަނި މި އޮތީ ތިން ބަދަލު ގެނެވޭ ގޮތަށް، މިއީ އަހަރެންގެ ނަޒަރުގައި ބަދަލުވާން ޖެހޭ ކަމެއް،" ފަސް ބަދަލުގެ ގަވާއިދާ ބެހޭގޮތުން ރަންގްނިކް.ބުންޏެވެ.
ފަސް ބަދަލުގެ ގަވާއިދު ނުގެނެވި އޮތީ ކްލަބްތަކުގެ މެޖޯރިޓީ ތާއީދުނުކުރާތީ އެވެ. އެއީ ފަސް ބަދަލު ގެނެސްފިނަަމަ މަޝްހޫރު ގިނަ ކުޅުންތެރިން ތިބި ޓީމުތަކަށް އެޑްވާންޓޭޖް އޮންނާނެތީ އެވެ.
ރަންގްނިކް ބުނީ މެޗުތަކަށް ނަގާ ޓީމު ޝީޓުގައި ބަދަލު ކުޅުންތެރިންގެ ގޮތުގައި ކީޕަރު ނޫން އަށް ކުޅުންތެރިއަކު ހިމެނޭއިރު، ފަސް ބަދަލު ގެނެވެން ޖެހޭ ގޮތަށް ގަވާއިދުގައި އޮންނަން ޖެހޭ ކަމަށެވެ.
މީގެ އިތުރުން ރަންގްނިކް ބުނީ އިނގިރޭސި ފުޓްބޯޅަ ސީޒަން ދިގުލައިދާ އެންމެ ބޮޑު ސަބަބަކީ ލީގުގެ އިތުރުން ދެ ކަޕް މުބާރާތް އޮންނާތީ ކަމަށެވެ.
ދާދި ފަހުން ފްރާންސް އިން ވެސް ވަނީ އެ ގައުމުގެ ފުޓްބޯޅައިގައި ކުޅެމުން އައި އެއް ކަޕް މުބާރާތް ހުއްޓާލައިފަ އެވެ. އެއީ ކުޅުންތެރިން ސީޒަނެއްގައި ގިނަ މެޗުތަކެއް ކުޅެން ޖެހޭތީ އެ ކަމަށް ލުޔެއް ގެނައުމުގެ ގޮތުުންނެވެ.
ރަންގްނިކް ބުނީ ފްރާންސްގައި ގެނައި ބަދަލު އިނގިރޭސި ފުޓްބޯޅައިގައި ވެސް ގެންނަން ޖެހޭ ކަމަށާއި އެ ގޮތުން އެންމެ ރަނގަޅު ގޮތަަކަށް ވާނީ ލީގު ކަޕް ހުއްޓާލުން ކަމަށެވެ.
