ޕްރެޒިޑެންޓްސް ކަޕުގައި ވާދަކުރާ ކްލަބްތަކުން މިއަދު އޮތް އެ މުބާރާތުގެ ޕްރީ މެޗު ނޫސްވެރިންގެ ބައްދަލުވުން ބޮއިކޮޓްކޮށްފި އެވެ.
އެގޮތަށް ނިންމީ "މިހާރު" ނޫހުން ބައިވެރިވާ ނޫސްވެރިންގެ ބައްދަލުވުންތަކުގައި ބައިވެރިނުވާނެ ކަމަށް ބުނެ އެވެ.
މިއަދުގެ ނޫސްވެރިންގެ ބައްދަލުވުމުގައި މާޒިޔާ އިން އިއްވި ބަޔާނެއްގައި ބުނީ "މިހާރު" ނޫހުން ފުޓްބޯޅައިގެ ރޫހާ ހިލާފަށް މައުލޫމާތު ފަތުރާތީ އާއި ފުޓްބޯޅަ ކްލަބްތަކާ އެފްއޭއެމްއާ ޒާތީކޮށް މަސައްކަތްކުރާތީ "މިހާރު" ނޫސް ބައިވެރިވާ ނަމަ ބައްދަލުވުމުގައި ބައިވެރިނުވާން ނިންމާފައިވާ ކަމަށެވެ. ފުރަތަމަ ޑިވިޝަނުގެ ކްލަބްތަކުގެ ތެރެއިން މިއަދުގެ ނޫސްވެރިންގެ ބައްދަލުވުމުގައި މީޑިއާގެ ސުވާލުތަކަށް ޖަވާބު ދިނީ ސުޕަ ޔުނައިޓެޑް ސްޕޯޓްސް (ސަސް)ގެ ކޯޗު އިސްމާއިލް މަހްފޫޒް (އިންމަ) އެވެ.
އެފްއޭއެމްގެ ޖެނެރަލް ސެކްރެޓަރީ ހުސެއިން ޖަވާޒް ވިދާޅުވީ އެހެން ކްލަބްތަކުން ވެސް ނޫސްވެރިންގެ ބައްދަލުވުމުގައި ބައިވެރިނުވާން ކޯޗުންނަށް އަންގާފައިވާ ކަމަށެވެ.
ޖަވާޒް ވިދާޅުވީ ކްލަބްތަކުގެ އެ ނިންމުމާ ގުޅޭ ގޮތުން ކްލަބްތަކާ އެކު އެފްއޭއެމުން މަޝްވަރާކުރާނެ ކަމަށެވެ. ޖަވާޒް ވިދާޅުވީ ފަހަކަށް އައިސް "މިހާރު" ނޫހުން ނެގެޓިވްކޮށް ފުޓްބޯޅައިގެ ހަބަރުތައް ގެނެސްދޭކަން އެ އެސޯސިއޭޝަނަށް ވެސް ފާހަގަކުރެވޭ ކަމަށެވެ.
2016 ވަނަ އަހަރު ވުޖޫދުވި "މިހާރު" ނޫހަކީ ރާއްޖޭގައި އެންމެ ފުޅާ ދާއިރާއެއްގައި ކުޅިވަރު ހަބަރުތައް ގެނެސްދޭ އެއް ނޫހެވެ. އެ ނޫހުން އަންނަނީ ކުޅިވަރު ކުޅުންތެރިންގެ އަގުވަޒަންކުރުމުގެ ގޮތުން "މިހާރު އެވޯޑްސް" ގެ ނަމުގައި ކުޅިވަރު އެވޯޑެއް ވެސް ބާއްވަމުންނެވެ.
