ބާސެލޯނާ (ޑިސެމްބަރު 15) - ހިތުގެ މައްސަލައެއް ފާހަގަވެގެން މި ވަގުތު ކުޅުމާ ދުރުގައި ހުރި ބާސެލޯނާގެ އާޖެންޓީނާގެ ފޯވާޑް ސާޖިއޯ އަގުއޭރޯ ފުޓްބޯޅައިން ރިޓަޔާކުރިކަން ރަސްމީކޮށް އިއުލާނުކޮށްފި އެވެ.
އަގުއޭރޯ ރިޓަޔާކުރީ އޭނާ އަށް ދިމާވި ހިތުގެ މައްސަލަތަކުގެ ސަަބުންނެވެ.
އުމުރުން 33 އަހަރުގެ އަގުއޭރޯ ފުޓްބޯޅަ ކުޅުން ހުއްޓާލިކަން އިއުލާނުކުރީ މިއަދު ބާސެލޯނާ ދަނޑުގައި ބޭއްވި ހާއްސަ އިވެންޓެއްގަ އެވެ. އަގުއޭރޯއާ އެކު މި އިވެންޓްގައި ބާސެލޯނާގެ ރައީސް ޖޮއާން ލަޕޯޓާ ބައިވެރިވެވަޑައިގެންނެވި އެވެ.
"އަހަރެން ނިންމައިފިން ޕްރޮފެޝަނަލް ފުޓްބޯޅައިން ރިޓަޔާކުރަން. މިއީ ވަރަށް ވެސް އުނދަގޫ ނިންމުމެއް. އެކަމަކު، އަހަރެން މި ނިންމުމާ މެދު ހިތްހަމަޖެހޭ. ކޮންމެ ގޮތެއް ވިޔަސް އެންމެ މުހިންމީ އަހަރެންގެ ސިއްހަތު. އެ ކަމަށް ވިސްނާފައި ކުޅުން ހުއްޓާލަން ނިންމީ،" ރޮވިފައި ހުރެ، ކަރުނަ ފޮހެމުން އަގުއޭރޯ ރިޓަޔަމެންޓް އިއުލާނުކުރަން ބުންޏެވެ.
"އަހަރެން ހަފްތާއެއްހާ ދުވަސް ކުރިން މި ނިންމުން ނިންމައިފިން. އެއީ ޑޮކްޓަރުން ލަފާދެނީ ވެސް އެ ގޮތަށް،"
މި ފަހަރު މެންޗެސްޓާ ސިޓީ ދޫކޮށް ދެ އަހަރުގެ ކޮންޓްރެކްޓެއްގައި އަގުއޭރޯ ބާސެލޯނާ އަށް ބަދަލުވި ނަމަވެސް އޭނާ އަށް އެ ޓީމުގެ ޖޯޒީގައި ކުޅެވުނީ ފަސް މެޗެެވެ. އަގުއޭރޯ ސްޕެނިޝް ލީގުގެ މެޗެއްގައި ބާސެލޯނާގެ ފުރަތަމަ އެގާރައިގައި ހިމެނިގެން ފުރަަތަމަ ކުޅުނީ އޮކްޓޫބަރު 30 ވަނަ ދުވަހު އަލަވޭސްއާ ދެކޮޅަށެވެ. އެ މެޗުގެ 41 ވަނަ މިނިޓްގައި އަގުއޭރޯ އަށް ނޭވާލާން އުނދަގޫވެގެން ދަނޑުމަތީގައި ފަރުވާ ދިނުމަށް ފަހު ބަދަލުކުރި އެވެ.
އެ މެޗަށް ފަހު ބާސެލޯނާ އިން އެރޭ ފަހުން ނެރުނު ބަޔާނެއްގައި ބުނެފައިވަނީ ހިތުގެ ޓެސްޓްތަކެއް ހަދަން އަގުއޭރޯ ހޮސްޕިޓަލްގައި އެޑްމިޓްކޮށްފައިވާ ކަމަށެވެ. އަގުއޭރޯގެ ހާލަތު ދެނެގަންނަން ތިން މަސް ދުވަހުގެ މުއްދަތަށް މޮނިޓަރިންގައި ބަހައްޓަން ނިންމި ނަމަވެސް ފުރަތަމަ ޓެސްޓްތަކުން ވެސް އަގުއޭރޯ އަށް ދެން ފުޓްބޯޅައިން ކުރިއަށްދިއުން ވާނީ އުނދަގޫކަމެއްކަން އެނގި އޭނާ ނިންމީ ރިޓަޔާކުރާށެވެ.
ބާސެލޯނާ ޖޯޒީގައި ކުޅުނު ހަމައެކަނި އެލްކްލަސިކޯ މެޗުގައި އަގުއޭރޯ ވަނީ ރެއާލް މެޑްރިޑް ކޮޅަށް ގޯލު ޖަހާފައި.
އަގުއޭރޯ ބުނީ ބާސެލޯނާ އަށް އައީ ވަރަށް ފޮނި އުއްމީދުތަކަކާ އެކީ ކަމަށާއި އެކަމަކު، ބޭނުންވި ކަންކަން ފުރިހަމަ ނުވެ ދާން ޖެހުނު ކަމުގައި ވިޔަސްް އެ ކްލަބުން ބެހެއްޓި ގާތްކަން އަބަދުވެސް ހަނދާނުގައި ހުންނާނެ ކަމަށެވެ.
އާޖެންޓީނާގެ ކްލަބް، އިންޑިޕެންޑިއޭޓް އިން ވިދާލި އަގުއޭރޯ ޔޫރަޕްގައި ފުރަތަމަ ކުޅުނީ ސްޕެއިނުގެ އެތުލެޓިކޯ މެޑްރިޑަށެވެ. އެ ޓީމަށް 2010 ވަނަ އަހަރު ޔޫރޮޕާ ލީގު ކާމިޔާބު ކޮށްދޭން އެހީތެރިވި އަގުއޭރޯ ވަނީ އެ ޓީމަށް ކުޅެދިން 234 މެޗުން 101 ގޯލު ޖަހައިފަ އެވެ.
މެންޗެސްޓާ ސިޓީން އަގުއޭރޯގެ ސޮއި ހޯދީ 2011 ވަނަ އަހަރު 44 މިލިއަން ޑޮލަރުގެ ފީއެއް ދައްކައިފަ އެވެ. ސިޓީން 44 އަހަރުކޮށްފައި، 2011-2012 ވަނަ އަހަރުގެ ސީޒަނުގައި އިނގިރޭސި ޕްރިމިއާ ލީގުގެ ތަށި ހޯދި ގޯލު ޖެހި އަގުއޭރޯ ވަނީ އެ ކްލަބަށް 10 އަހަރު ކުޅެދީފަ އެވެ. އަގުއޭރޯ އަކީ ސިޓީގެ ތާރީހުގައި އެންމެ ގިނަ ގޯލު ޖެހި ކުޅުންތެރިޔާ އެވެ. ސިޓީ އަށް 390 މެޗުން 260 ގޯލު ޖަހައިދިންއިރު، އޭގެ ތެރޭގައި 16 ހެޓްރިކް ހިމެނެ އެވެ. އަގުއޭރޯ އަކީ ބިދޭސީ ކުޅުންތެރިންގެ ތެރެއިން ޕްރިމިއާ ލީގުގައި އެންމެ ގިނަ ގޯލު ޖެހި ކުޅުންތެރިޔާ އެވެ.
އަގުއޭރޯ ލެޖެންޑެއްގެ ގޮތުގައި ސިޓީ ދޫކޮށްލިއިރު، އެ ޓީމާ އެކު ޕްރިމިއާ ލީގު ފަސް ފަހަރު، އެފްއޭ ކަޕް އެއް ފަހަރު އަދި ލީގު ކަޕް ހަ ފަހަރު ކާމިޔާބުކުރި އެވެ. އަދި ފަހު ސީޒަނުގައި ސިޓީއާ އެކު ޗެމްޕިއަންސް ލީގުގެ ފައިނަލުގައި ކުޅުނެވެ.
އަގުއޭރޯ ވަނީ އާޖެންޓީނާގެ 23 އަހަރުން ދަށުގެ ޓީމާ އެކު 2008 ވަނަ އަހަރުގެ ބެއިޖިން އޮލިމްޕިކްސް ފުޓްބޯޅަ އިވެންޓުން ރަން މެޑަލް ހޯދުމުގެ އިތުރުން 28 އަހަރަށް ފަހު އާޖެންޓީނާ އިން ފުރަތަމަ ފަހަރަށް ބައިނަލްއަގުވާމީ މުބާރާތެއް ކާމިޔާބު ކުރި ޓީމުގައި ހިމެނިފަ އެވެ. އާޖެންޓީނާ އިން ކާމިޔާބުކުރީ މި ފަހަރުގެ ކޮޕަ އެމެރިކާ ފުޓްބޯޅަ މުބާރާތެވެ. އަދި އަގުއޭރޯ އަކީ 2014 ވަނަ އަހަރުގެ ވޯލްޑް ކަޕް ފައިނަލަށް ދިޔަ އާޖެންޓީނާ ޓީމުގެ ކުޅުންތެރިއެކެވެ.
އަށާރަވަރަކަށް އަހަރުވީ ސީނިއާ ފުޓްބޯޅަ ކެރިއަރުގައި ކްލަބްތަކާއި ގައުމީ ޓީމުތަކަށް ކުޅުނު މެޗުތަކުގައި އަގުއޭރޯ ވަނީ 786 މެޗުން 427 ގޯލު ޖަހަައިފަ އެވެ.
އަގުއޭރޯ ރިޓަޔާކުރުމުން އޭނާއާ އެކު ކުޅުނު ގިނަ ކުޅުންތެރިންނާއި އޭނާ ކުޅުނު ކްލަބްތަކުގެ އިތުރުން ވާދަވެރި ޓީމުތަކުން ވެސް ވަނީ އޭނާގެ އަގުވަޒަންކޮށް މެސެޖް ކޮށްފަ އެވެ.
