މެންޗެސްޓާ (ޑިސެމްބަރު 8) - މެންޗެސްޓާ ޔުނައިޓެޑަށް ޖަރުމަނުގެ ސްޕޯޓްސް ސައިކޮލޮޖިސްޓެއް ކަމަށްވާ ސާޝާ ލެންސް ގެނެސްފި އެވެ.
ލެންސްގެ އިތުރުން ދެން ރަންގްނިކްގެ ކޯޗިން ޓީމާ ދެން ގުޅުނީ ނިއުޔޯކް ރެޑްބުލް އާއި ޓޮރޮންޓޯ އަށް ކޯޗުކޮށްދިން ކްރިސް އާމަސް އެވެ.
އުމުރުން 46 އަހަރުގެ ލެންސް އަކީ ކުރިން ޖަރުމަނު ދެ ވަނަ ޑިވިޝަނުގައި ކުޅުނު ކުޅުންތެރިއެކެވެ. އޭނާ ވަނީ ޔުނައިޓެޑްގެ ކޯޗު ރަންގްނިކާ އެކީ ޝާލްކާ އާއި އާރްބީ ލައިޕްޒިގުގައި މަސައްކަތް ކޮށްފަ އެވެ. ޔުނައިޓެޑްގެ ކޯޗު ރަންގްނިކް ބުނީ ލެންސް ގެނައުމުގެ ފައިދާ ޔުނައިޓެޑުން ފެންނާނެ ކަމުގެ ފުރިހަމަ ޔަގީންކަން އެބައޮތް ކަމަށެވެ.
"މިއީ ލޮޖިކަލީ ވިސްނިޔަސް ކުރަން ރަނގަޅު ކަމެއް. މިއީ އެ މީހުން (ސްޕޯޓްސް ސައިކޮލޮޖިސްޓުން) ރަތް ސޯފާއެއްގައި ކުޅުންތެރިން އަތުގައި ހިފައިގެން ތިބެގެން މަސައްކަތް ކުރަން ކުރާ ކަމެއް ނޫން،" ރަންގްނިކް ބުންޏެވެ.
"ގޯލްކީޕަރުންނާއި ފިޒިކަލް އެޑިއުކޭޝަން، ސްޓްރައިކަރުން، ފިޓްނަސް. މީގެ އިން ކޮންމެ ކަމަކަށް ކޯޗުން ތިބޭ ގޮތަށް ސިކުނޑިއަށް ނޫނީ ވިސްނުމުގެ ކަންކަން ރަނގަޅުކުރަން ވެސް ކޯޗެއް ހުންނަން ޖެހޭ. އެއީ ސްޕޯޓްސް ސައިކޮލޮޖިސްޓުންގެ ބޭނުމަކީ،"
ރަންގްނިކް ބުނީ ޖަރުމަނު ފުޓްބޯޅަ ކުރިއަށް ދިއުމުގައި އެންމެ އިސް ރޯލެއް އަދާކުރާ އެއް ބަޔަަކީ ސްޕޯޓްސް ސައިކޮލޮޖިސްޓުން ކަމަށެވެ. އެ ގޮތުން ރަންގްނިކް 1998 ވަނަ އަހަރު އުލްމްގެ ކޯޗަކަށް ހުރިއިރު، ސްޕޯޓްސް ސައިކޮލޮޖިސްޓެއްގެ ރޯލު އަދާކުރީ މިހާރު ޖަރުމަނު ޓީމުގައި ހުރި ހަންޒް-ޑިއެޓާ ހާމާން އެވެ.
"ފުޓްބޯޅަ އަކީ ފައިން ކުޅޭ ކުޅިވަރެއް ވިޔަސް މީގެ ހުރިހާ ނިންމުމެއް މި އަންނަނީ ވަރަށް ވިސްނުންތެރިކަމާ އެކު ސިކުނޑި މަސައްކަތް ކޮށްގެން. ޔުނައިޓެޑްގައި މިއީ ހަމައެކަނި ކުޅުންތެރިންނަށް ހަމަޖެއްސި ސްޕޯޓްސް ސައިކޮލޮޖިސްޓެއް ނޫން. ސްޓާފުން ވެސް ހިމެނޭހެން އެންމެންގެ ވިސްނުން ރަނގަޅު އެއް މިސްރާބަކަށް ބަހައްޓަން ޖެހޭ،" ރަންގްނިކް ބުންޏެވެ.
ހަ މަސް ދުވަހުގެ ކޮންޓްރެކްޓެއްގައި ޔުނައިޓެޑްގެ ކޯޗުކަމާ ހަވާލުވި ރަންގްނިކް އެ މުއްދަތު ފުރިހަމަ ވުމުން ދެން ހަވާލުވާނީ އެ ކްލަބްގެ ކޮންސަލްޓަންޓެއްގެ މަގާމާ އެވެ.
ރަންގްނިކް ބުނީ ސާޝާ ގެނައީ ދުރު މުސްތަގުބަލަކަށް ވިސްނައިގެން ކަމަށާއި އޭނާ އަކީ ހަމައެކަނި ތިއަރީ ބައިގައި މަސައްކަތް ކުރުމުގެ ބަދަލުގައި ޓްރެއިނިންތަކުގައި ވެސް ހަރަކާތްތެރިވާނެ ޓީމުގެ މުހިއްމު މެމްބަރެއް ކަމަށެވެ.
ޖަރުމަނުގެ ކޯޗެއް ކަމަށްވާ ޔާގެން ކްލޮޕް، 2015 ވަނަ އަހަރު ލިވަޕޫލާ ހަވާލުވުމަށް ފަހު އެ ޓީމުގެ ކޯޗިން ސްޓާފުން ކަނޑައެޅުމުގައި ކޯޗުން ހޯދީ ސްޕޯޓްސް ސައިކޮލޮޖީ ވެސް ކިޔަވާފައިވާ ފަރާތްތަކަށް އިސްކަން ދީގެންނެވެ. ކްލޮޕް ލިވަޕޫލްގައި ހޭދަ މިވީ މުއްދަތުގައި އެ ޓީމުގެ އެޑްމިނިސްޓްރޭޝަނުގެ މަސައްކަތް ކުރާ މަގާމުތަކަށް ވެސް މީހުން ގެނައުމުގައި އިސް ރޯލެއް ކުޅުނެވެ. ޗެލްސީގެ ކޯޗުކަމާ ހަވާލުވެ ހުރި ޖަރުމަނުގެ ތޯމަސް ޓުޗެލް ވެސް ހާއްސަ ސްޕޯޓްސް ސައިކޮލޮޖިސްޓެއް ގެންގުޅެ އެވެ.
