ގައުމީ ނެޓްބޯޅަ މުބާރާތުގެ ފިރިހެން ޑިވިޝަންގެ ޗެމްޕިއަންކަން ކުޅުދުއްފުށީ ޔޫތު އެންޑް ރެކްރިއޭޝަން ކްލަބް (ކޭވައިއާރްސީ) އިން ހޯދިއިރު، އަންހެން ޑިވިޝަންގެ ތަށި ކްލަބް ގްރީން ސްްޓްރީޓްސް އިން އުފުލާލައިފި އެވެ.
ކޭވައިއާރްސީން ޗެމްޕިއަންކަން ހޯދީ ކްލަބް މެޓްރިކްސްގެ މައްޗަށް ފައިނަލުގައި ކުރިހޯދައިގެންނެވެ. ހޮނިހިރު ދުވަހުގެރޭ ކުޅުނު ފައިނަލް މެޗު ފޯރިގަދަ ކުުޅުމަކަށް ފަހު ނިމުނީ، ކޭވައިއާރްސީ 30-27 އިން މެޓްރިކްސްގެ މައްޗަށް ކުރިހޯދައިގެންނެވެ. ފައިނަލް މެޗުގެ މޮޅު ކުޅުންތެރިއަކީ ކޭވައިއާރްސީ އަށް ކުޅޭ މުހައްމަދު އަރާޝް އައްސަދު އެވެ.
މުބާރާތުގެ އެންމެ މޮޅު ކުޅުންތެރިއަކީ ކޭވައިއާރްސީގެ ހުސެއިން ސަވީލް އެވެ. އެންމެ މޮޅު ހަތް ކުޅުންތެރިންގެ ތެރޭގައި ހިމެނެނީ ކޭވައިއާރްސީގެ ސަވީލް، އަރާޝް، ހުސެއިން ހަލީމް، އަހުމަދު ހުޝާމްގެ އިތުރުން މެޓްރިކްސްގެ އިސްމާއިލް ފަރުހާން، އިބްރާހިމް އިޔާޒް އަދި އަހުމަދު އަފްޝަން ރަޝާދު އެވެ.
ފިރިހެން ޑިވިޝަނުގެ ތަށި ހޯދި ކޭވައިއާރްސީ ކުޅުންތެރިން.
ގައުމީ މުބާރާތުގެ ފިރިހެން ޑިވިޝަންގައި ވާދަކުރީ ކޭވައިއާރްސީ އާއި މެޓްރިކްސްގެ އިތުރުން ސްކައިލާކް އެވެ.
ޒުވާނުންގެ މަރުކަޒު އެތެރެ ކޯޓުގައި ރޭ ކުޅުނު އަންހެން ޑިވިޝަންގެ ފައިނަލް މެޗުގައި ގްރީން ސްޓްރީޓްސް އިން ނުކުތީ އެސޯސިއޭޝަން ކަޕްގެ ޗެމްޕިއަން ކޭވައިއާރްސީއާ ދެކޮޅަށެވެ.
ފަސްޓް ލޭޑީ ފަޒްނާ އަހުމަދު ޝަރަފްވެރިކޮށްދެއްވި ރޭގެ ފައިނަލް މެޗުގައި ކޭވައިއާރްސީއާ ބައްދަލުކޮށް ގްރީން ސްޓްރީޓްސް މޮޅުވީ 52-32 އިންނެވެ. މެޗުގެ މޮޅު ކުޅުންތެރިއަކަށް ހޮވުނީ ކްލަބް ގްރީން ސްޓްރީޓްސްގެ އައިޝަތު ނާޒިމާ އެވެ.
އަންހެން ޑިވިޝަނުގައި ވާދަކުރީ ގްރީން އާއި ކޭވައިއާރްސީގެ އިތުރުން މަހިބަދޫ ސްޕޯޓްސް ކްލަބާއި ކްލަބް ޝައިނިން ސްޓާ އެެވެ. އެންމެ މޮޅު ހަތް ކުޅުންތެރިންނަކީ ގްރީންގެ އައިމިނަތު ރީމް ޝާމް، ދިސަނަޔަކޭ، މަރިޔަމް ޝިނާއަތު، ޝައިނިންސްޓާ ޓީމުގެ އައިމިނަތު އައިނީ އާއި އައިޝަތު ޒީކް ޝިޔާމް އަދި ކޭވައިއާރްސީގެ އީމާ އަބްދުލް ސައްތާރު އެވެ.
އެންމެ އުއްމީދީ ކުޅުންތެރިއަކަށް ހޮވުނީ ޝައިނިންސްޓާ ޓީމުގެ އައިން އަލީ ރަޝީދު އެވެ.
ދޮޅު އަހަރެއްހާ ދުވަހުގެ މެދުކެނޑުމަށް ފަހު ނެޓްބޯޅަ ހަރަކާތްތައް ފެށިއިރު، ފުރަަތަމަ ކުޅުނީ އެސޯސިއޭޝަން ކަޕް އެވެ، އެ އަށް ފަހު ގައުމީ މުބާރާތް ބޭއްވިއިރު، ކޮވިޑް-19ގެ ރައްކާތެރިކަމުގެ ފިޔަވަޅު އެސޯސިއޭޝަނުން ވަނީ އަޅައިފަ އެވެ.
