މެންޗެސްޓާ (ނޮވެމްބަރު 21) - މެންޗެސްޓާ ޔުނައިޓެޑްގެ ކޯޗުކަމުން އޮލެ ގުނަ ސޯލްޝެއާ ވަކިކުރަން ނިންމާފައިވާ ކަމަށް ރިޕޯޓްތައް ބުނެފި އެވެ.
ލީގުގައި ރޭ ވަޓްފޯޑް އަތުން 4-1 އިން ޔުނައިޓެޑް ބަލިވި މެޗަށް ފަހު ދަނޑުގައި ތިބި ޔުނައިޓެޑްގެ ސަޕޯޓަރުން ވަނީ ސޯލްޝެއާ މަގާމުން ދުރުކުރަން ޖެހޭ ކަމަށް ބުނެ އަޑުއުފުލައިފަ އެވެ.
ރޭގެ މެޗަކީ އެންމެ ފަހުން ޕްރިމިއާ ލީގުގައި ޔުނައިޓެޑް ކުޅުނު ހަތް މެޗުގެ ތެރެއިން ބަލިވި ފަސް ވަނަ މެޗެެވެ. ޔުނައިޓެޑް އެންމެ ފަހުން ހަތް މެޗުން މޮޅުވީ އެންމެ ފަހަރަކު އެވެ. ބަލިވި މެޗުތަކުގެ ތެރޭގައި އަމިއްލަ ދަނޑުގައި ލިވަޕޫލް އަތުން 5-0 އިންނާއި މެންޗެސްޓާ ސިޓީ އަތުން 2-0 އިން ބަލިވި މެޗު ވެސް ހިމެނެ އެވެ.
ރޭ ވަޓްފޯޑް އަތުން ޔުނައިޓެޑް ބަލިވި މެޗަށް ފަހު އެ ކްލަބްގެ ބޯޑު މެމްބަރުންގެ އިމަޖެންސީ ބައްދަލުވުމެއް ފަސް ގަޑިއިރު ކުރިއަށް ދިޔަ ކަމަށް މެންޗެސްޓާ އިވްނިން ނިއުސް އިން ރިޕޯޓްކޮށްފައިވެ އެވެ. އަދި އެ ބައްދަލުވުމުގައި ބޯޑް މެމްބަރުންގެ އިއްތިފާގުން ނިންމީ ސޯލްޝެއާ އަށް ދެން ޔުނައިޓެޑްގެ ކޯޗުގެ މަގާމުގައި ދެމި ނުހުރެވޭނެ ކަމަށެވެ. އެ ގޮތުން ބޯޑުން ނިންމީ ސޯލްޝެއާ ވަކިކޮށް އާ ކޯޗަކާ އެކު ކުރިއަށް ދިއުމަށެވެ. ސޯލްޝެއާ ވަކިކުރިކަން ރަސްމީކޮށް އިއުލާނުކުރާނީ ޔުނައިޓެޑްގެ ވެރިޔާ ޖޮއެލް ގްލޭޒާ، ބޯޑް މެމްބަރުންގެ އެ ނިންމުން ފާސްކުރުމުންނެވެ.
މިދިޔަ ޖުލައި މަހު ސޯލްޝެއާ، ޔުނައިޓެޑްގެ ކޮންޓްރެކްޓް އިތުރު ތިން އަހަރަށް އާ ކުރި އެވެ. އެކަމަކު، އެންމެ ފަހުން ޓްރާންސްފާ މާކެޓްގައި ޔުނައިޓެޑުން ކުރި ހަރަދުތަކާ އަޅާބަލާއިރު، އެކަށީގެންވާ ކުރިއެރުމެއް ނުފެނުނެވެ. ޔުނައިޓެޑުން ސޯލްޝެއާ ވަކިކޮށްފިނަމަ ބަދަލެއްގެ ގޮތުގައި ނުވަ މިލިއަން ޑޮލަރު ދޭން ޖެހޭނެ އެވެ.
މީގެ ކުރިން ދެ ފަހަރެއްގެ މަތިން ސޯލްޝެއާ މަގާމުން ވަކިކުރާނެ ކަމަށް ބެލެވުނު ނަމަވެސް އެ ފަހަރުތަކުގައި އޭނާ ސަލާމަތްކުރީ ޔުނައިޓެޑްގެ ކުރީގެ ކޯޗު އަލެކްސް ފާގަސަންގެ ނުފޫޒުންނެވެ. އެކަމަކު، މި ފަހަރު ފޯމު ގެއްލި އެއްވެސް އަލިމަގެއް ނުފެންނާތީ ބޯޑުން ބޭނުންވީ ސޯލްޝެއާ މަގާމުން ދުރުކުރާށެވެ.
ކުރިން ޕްރިމިއާ ލީގުގައި ކާޑިފް ސިޓީ އަށް ކޯޗުކޮށްދިން ސޯލްޝެއާ ޔުނައިޓެޑްގެ ކޯޗުކަމާ ހަވާލުވީ 2018 ވަނަ އަހަރުގެ ޑިސެމްބަރު މަހު މޮރީނިއޯ ވަކިކޮށް ވަގުތީ އެއްބަސްވުމެއްގެ ދަށުންނެވެ. ވަގުތީ ކޮންޓްރެކްޓެއްގައި ތިން މަސް ދުވަސް ހޭދަކުރިއިރު، ސޯލްޝެއާގެ މަސައްކަތް ޔުނައިޓެޑަށް ރަނގަޅުވުމުން އެ ޓީމުން އޭނާ އަށް ދާއިމީ އެއްބަސްވުމެއް ދިނެވެ. އެ ފަހަރު އޭނާ ސޮއިކުރީ ތިން އަހަރުގެ އެއްބަސްވުމެއްގަ އެވެ. ޔުނައިޓެޑްގައި ސޯލްޝެއާ އަށް ތަށްޓެއް ނުލިބުނަސް ނެރުނު ނަތީޖާތަކާއި ހޯދި ކުރިއެރުން ބަަލައި އޭނާ އަށް މި ސީޒަން ފެށުމުގެ ކުރިން ކޮންޓްރެކްޓެއް ދިނީ އެވެ.
ސޯލްޝެއާ ވަކިކޮށް ޔުނައިޓެޑުން ހޯދަން މަސައްކަތްކުރާ ކޯޗުންގެ ތެރޭގައި ޕީއެސްޖީގެ މައުރީސިއޯ ޕޮޗެޓީނޯ، ލެސްޓާ ސިޓީގެ ބްރެންޑަން ރޮޖާސް އަދި މިދިޔަ ސީޒަނަށް ފަހު ރެއާލް މެޑްރިޑް ދޫކޮށްލި ފަހުން ޓީމަކާ ހަވާލުނުވެ ހުރި ޒިނެދިން ޒިދާން ހިމެނެ އެވެ.
