ލަންޑަން (އޮކްޓޫބަރު 30) - އިނގިރޭސި ޕްރިމިއާ ލީގުގައި މިރޭ ރަށުންބޭރުގައި ޓޮޓެންހަމް ހޮޓްސްޕާސް 3-0 އިން ބަލިކޮށް މެންޗެސްޓާ ޔުނައިޓެޑްގެ ކޯޗު އޮލެ ގުނަ ސޯލްޝެއާ އަށް އޮތް ޕްރެޝަރަށް ލުޔެއް ލިބިއްޖެ އެވެ.
މިދިޔަ ހަފްތާގައި އަމިއްލަ ދަނޑުގައި ޔުނައިޓެޑް ލަދުވެދި ގޮތަކަށް ވާދަވެރި ލިވަޕޫލް އަތުން 5-0 އިން ބަލިވުމުން ސޯލްޝެއާ ވަކިކުރާނެ ކަމަށް ބެލެވުނެވެ. އެކަމަކު، ޔުނައޮޓެޑުން ނިންމީ ސޯލްޝެއާ އަށް އިތުރު ފުރުސަތެއް ދޭށެެވެ. އެކަމަކު، މިރޭގެ މެޗުން ޓޮޓެންހަމް އަތުން ޔުނައިޓެޑް ބަލިވެއްޖެނަމަ ސޯލްޝެއާ އަށް ޔުނައިޓެޑްގެ ވަޒީފާ ގެއްލޭނެ ކަމަށް ވެސް މީޑިއާތަކުން އޮތީ ރިޕޯޓްކޮށްފަ އެވެ. އެ ފަދަ ނުތަނަވަސްކަމެއްގެ ތެރޭގައި ނުކުމެ، ޓޮޓެންހަމް ދަނޑުގައި ޔުނައިޓެޑުން މި ވަނީ ފުރިހަމަ މޮޅެއް ހޯދައިފަ އެވެ.
މިރޭގެ މެޗުގައި ޓޮޓެންހަމްގެ ކްރިސްޓިއަން ރޮމޭރޯ އެ ޓީމަށް ގޯލެއް ޖަހައިދިން ނަމަވެސް ވީޑިއޯ އެސިސްޓަންޓް ރެފްރީ (ވީއޭއާރް) އިން ބެލުމަށް ފަހު އެ ގޯލު ވަނީ އޮފްސައިޑް ކަމަށް ނިންމައިފަ އެވެ. ޔުނައިޓެޑަށް ލީޑުނަގައިދިނީ މެޗުގެ 39 ވަނަ މިނިޓްގައި ކްރިސްޓިއާނޯ ރޮނާލްޑޯ ޖެހި ގޯލުންނެވެ. ބްރޫނޯ ފެނާންޑޭސް މަތިން އޭރިއާތެރެއަށް ހުރަސްކޮށްލި ބޯޅަ ރޮނާލްޑޯ ވަނީ ވޮލީއަކުން ގޯލުގެ ދުރުކަނަށް އަމާޒުކޮށްލައިފަ އެވެ.
ލަނޑު ޖެހުމަށް ފަހު ރޮނާލްޑޯ އުފާފާޅުކުރަނީ.-- ފޮޓޯ: އޭއެފްޕީ
ދެ ވަނަ ހާފުގެ ކުރީކޮޅުގައި ރޮނާލްޑޯ ޖެހި ގޯލެއް ވަނީ އޮފްސައިޑް ކަމަށް ނިންމައިފަ އެވެ. އެ ގޮތަށް ނިންމީ ވީއޭއާރް އިން ބަލައި ޔަގީންކުރުމަށް ފަހު އެވެ. ލީޑުފުޅާކުރަން ޔުނައިޓެޑުން ކުރި މަސައްކަތް ކާމިޔާބުވީ މެޗުގެ 64 ވަނަ މިނިޓްގަ އެވެ. ޓޮޓެންހަމްގެ އޮލިވާ ސްކިޕް އަތުން ހާފުގެ މެދުތެރެއިން ގެއްލުނު ބޯޅައެއް ހޯދައި ފެނާންޑޭސް ދިނީ ރޮނާލްޑޯ އަށެވެ. ރޮނާލްޑޯ ހުސްކޮށްލުމަށް ފަހު އޭރިއާތެރެއިން އެޑިންސަން ކަވާނީ އަށް ދިން ބޯޅަ އޭނާ ވަނީ ގޯލުގެ ތެރެއަށް ފޮނުވާލައިފަ އެވެ.
އަނިޔާ އަށް ފަހު އެނބުރި އައި ރަފައެލް ވަރާންގެ އިތުރުން ހެރީ މެގުއާ އަދި ވިކްޓަ ލިންޑެލޯފް އެކުގައި ޔުނައިޓެޑްގެ ޑިފެންސްގައި ކުޅުނު މި މެޗުގައި ޓޮޓެންހަމް އަށް މާ ނުރައްކާތެރި ހަމަލާތަކެއް ފޮނުވައިނުލެވުނެވެ.
ޔުނައިޓެޑްގެ ތިން ވަނަ ގޯލު ޖެހީ ބަދަލު ކުޅުންތެރިންގެ ގޮތުގައި އެރި ދެ ކުޅުންތެރިން ގުޅިގެން ކުރި މަސައްކަތުން އުފެއްދި އެޓޭކެއްގަ އެވެ. މެޗުގެ 86 ވަނަ މިނިޓްގައި ނަމަންޏާ މަޓިޗް ދިން ބޯޅަ މާކަސް ރެޝްފޯޑް ވަނީ ގޯލުގެ ދުރު ކަނަށް ފޮނުވާލައިފަ އެވެ.
މި ނަތީޖާއާ އެކު ޔުނައިޓެޑް އޮތީ ކުޅުނު 10 މެޗުން 17 ޕޮއިންޓް ހޯދައި ލީގުގެ ފަސް ވަނައިގަ އެވެ. ޓޮޓެންހަމަށް 10 މެޗުން 15 ޕޮއިިންޓް ލިބިފައިވާއިރު، އެ ޓީމު އޮތީ ލީގުގެ އަށް ވަނައިގަ އެވެ.
ފަަހަކަށް އައިސް ޓޮޓެންހަމްގެ ރެކޯޑް ދަށްވެފައިވާއިރު، މި ސީޒަނުގައި މިހާތަނަށް ފަސް މެޗުން މި ވަނީ ބަލިވެފަ އެވެ. މިއީ މިދިޔަ 13 އަހަރު ތެރޭ ޓޮޓެންހަމްގެ ލީގު ފޯމަށް ބަލާއިރު އެންމެ ދަށް ރެކޯޑެވެ. މިރޭގެ މެޗަށް ފަހު ޓޮޓެންހަމްގެ ސަޕޯޓަރުން ވަނީ ދަނޑުގައި ތިބެ، އެ ޓީމުގެ ޗެއާމަން ޑެނިއަލް ލިވީގެ އިސްތިއުފާ އަށް ގޮވައި އަޑުއުފުލައިފަ އެވެ.
