މެންޗެސްޓާ (އޮކްޓޫބަރު 25) - އިނގިރޭސި ޕްރިމިއާ ލީގުގައި ރޭ ވާދަވެރި ލިވަޕޫލް އަތުން އަމިއްލަ ދަނޑުގައި ލަދުވެތި ގޮތަކަށް މެންޗެސްޓާ ޔުނައިޓެޑް ބަލިވެފައިވާއިރު، އެ ޓީމުގެ ކޯޗުގެ މަގާމުގައި ހުރި އޮލެ ގުނަ ސޯލްޝެއާ ވަކިކުރުމާ މެދު ކްލަބުން ވަރަށް އަވަހަށް ގޮތެއް ނިންމާނެ ކަމަށް މީޑިއާ ރިޕޯޓްތައް ބުނެފި އެވެ.
ރޭ ޔުނައިޓެޑްގެ ދަނޑުގައި އެ ޓީމު އަތުން ލިވަޕޫލް މޮޅުވީ 5-0 އިންނެވެ. މިއީ ޔުނައިޓެޑްގެ ތާރީހުގައި މިދިޔަ ބައި ގަރުނުގެ ތެރޭގައި އަމިއްލަ ދަނޑުގައި ލަނޑެއް ނުޖެހި މިހާ ތަފާތުކޮށް ބަލިވި ފުރަތަމަ މެޗެވެ.
ލިވަޕޫލް މެޗުގެ ދަށް ނަތީޖާތަކަށް ފަހު ސޯޝަލް މީޑިއާގައި ޔުނައިޓެޑްގެ ސަޕޯޓަރުން އަންނަނީ ސޯލްޝެއާ ވަކިކުރަންޖެހޭ ކަމަށް ބުނެ ޝުއޫރު ފާޅުކުރަމުންނެވެ. މެންޗެސްޓާ އިވްނިންނިއުސް އިން ރިޕޯޓްކުރާގޮތުގައި އުމުރުން 48 އަހަރުގެ ސޯލްޝެއާ ޔުނައިޓެޑްގެ ކޯޗުގެ މަގާމުން ވަކިކުރުމާ މެދު ކްލަބްގެ ބޯޑުން ވަރަށް އަވަހަށް ގޮތެއް ނިންމާނެ އެވެ.
ކްލަބްގެ ބައެއް އޮފިޝަލުންނާ ހަވާލާދީ އިނގިރޭސި ބައެއް މީޑިއާތަކުން ރިޕޯޓް ކުރާގޮތުގައި އަންނަ ހޮނިހިރު ދުވަހު ޓޮޓެންހަމް ހޮޓްސްޕާސްއާ ކުޅުމުގެ ކުރިން ސޯލްޝެއާ މަގާމުން ވަކިކުރުމުގެ ފުރުސަތު ބޮޑެވެ.
ސޯލްޝެއާ ހަވާލުވުމުގެ ކުރިން އެންމެ ފަހުން ޔުނައިޓެޑްގެ ކޯޗަކަށް ހުރި ހޯސޭ މޮރީނިއޯ، 2018 ވަނަ އަހަރުގެ ޑިސެމްބަރު މަހު ޔުނައިޓެޑްގެ ކޯޗުކަމުން ވަކިކުރީ ލިވަޕޫލް އަތުން 3-1 އިން ބަލިވުމުންނެވެ. މި ފަހަރު ސޯލްޝެއާ ވަކިކުރަން ޔުނައިޓެޑުން ނިންމައިފިނަމަ އެ ކްލަބްގެ އެންމެ ފަހު ދެ ކޯޗުންނަށް ވެސް ވަޒީފާ ގެއްލުނީ ލިވަޕޫލް މެޗަށް ފަހު އެވެ.
ސޯލްޝެއާ ވަކިކުރަން ޖެހޭތަ؟
އެންމެ ފަހުން ޔުނައިޓެޑުން ކުޅުނު ނުވަ މެޗުގެ ތެރެއިން ފަސް މެޗުން ވަނީ ބަލިވެފަ އެވެ. ލީގުގައި އެންމެ ފަހުން ކުޅުނު ހަތަރު މެޗުން ވެސް ޔުނައިޓެޑަށް މޮޅެއް ނުލިބެ އެވެ. ޔުނައިޓެޑުުން މީގެ ކުރިން ސޯލްޝެއާ އަށް އިތުބާރު އޮތް ކަމަށް ބުނެފައިވީ ނަަމަވެސް ނަތީޖާތައް ނުކުންނަ ގޮތުން މިހާރު އެ ވިސްނުން އަންނަނީ ބަދަލުވަމުންނެވެ.
ސޯލްޝެއާ ޔުނައިޓެޑްގެ ކޯޗުކަމާ ހަވާލުވީ 2018 ވަނަ އަހަރުގެ ޑިސެމްބަރު މަހު މޮރީނިއޯ ވަކިކޮށް ވަގުތީ އެއްބަސްވުމެއްގެ ދަށުންނެވެ.
ވަގުތީ ކޮންޓްރެކްޓެއްގައި ތިން މަސް ދުވަސް ހޭދަކުރިއިރު، ސޯލްޝެއާގެ މަސައްކަތް ޔުނައިޓެޑަށް ރަނގަޅުވުމުން އެ ޓީމުން އޭނާ އަށް ދާއިމީ އެއްބަސްވުމެއް ދިނެވެ. އެ ފަހަރު އޭނާ ސޮއިކުރީ ތިން އަހަރުގެ އެއްބަސްވުމެއްގަ އެވެ.
ޔުނައިޓެޑްގައި ސޯލްޝެއާ އަށް ތަށްޓެއް ނުލިބުނަސް ނެރުނު ނަތީޖާތަކާއި ހޯދި ކުރިއެރުން ބަަލައި އޭނާ އަށް މި ފަހަރު ކޮންޓްރެކްޓެއް ދިނީ އެވެ. ޔުނައިޓެޑުން މި ސީޒަނުގައި ސޯލްޝެއާއާ އެކު ސޮއިކުރި އެއްބަސްވުން ހަަމަވާނީ 2024 ވަަނަ އަހަރު އެވެ. ސޯލްޝެއާ ހަވާލުވި ފަހުން ޔުނައިޓެޑުން ވަނީ ކުޅުންތެރިން ގަންނަން 600 މިލިއަން ޑޮލަރު ހަރަދުކޮށްފަ އެވެ.
