މެންޗެސްޓާ (އޮގަސްޓް 7) - އިނގިރޭސި ޕްރިމިއާ ލީގުގެ ކުރިއަށް އޮތް ސީޒަނުގެ ފޭވަރިޓަކީ މެންޗެސްޓާ ސިޓީ ކަމަށާއި ލީގު ހޯދުމުގެ ރޭހުގައި މެންޗެސްޓާ ޔުނައިޓެޑް ވެސް ވާދަކުރާނެ ކަމަށް އެ ޓީމުގެ ކޯޗު އޮލެ ގުނަ ސޯލްޝެއާ ބުނެފި އެވެ.
ސިޓީން މިދިޔަ ސީޒަނުގައި ލީގު ޗެމްޕިއަންކަން ހޯދިއިރު، ދެ ވަނައިގައި ނިންމާލީ ޔުނައިޓެޑް އެވެ. ސިޓީ ތަށި ހޯދީ ޔުނައިޓެޑަށް ވުރެ 12 ޕޮއިންޓް ކުރީގައި އޮވެގެންނެވެ. މިއީ ސިޓީން އެންމެ ފަހުން ހަތަރު ސީޒަނުގެ ތެރޭގައި ލީގު ކާމިޔާބުކުރި ތިން ވަނަ ފަހަރެވެ.
އާ ސީޒަނުގެ ކުރިން އިނގިރޭސި ކްލަބްތަކުން ޓީމު ވަރުގަދަ ކުރުމުގެ މަސައްކަތް ކުރަމުން އަންނައިރު، އެންމެ ރަނގަޅު ޓްރާންސްފާތަކެއް މިހާތަނަށް ކުރީ ޔުނައިޓެޑުންނެވެ. އެ ޓީމުން ވަނީ އިނގިރޭސި ތަރި ޖޭޑަން ސަންޗޯ އާއި ފްރާންސްގެ ޑިފެންޑަރު ރަފައެލް ވަރާންގެ ޓްރާންސްފާ ނިންމައިފަ އެވެ. މީގެ އިތުރުން ބާންލީގެ ގޯލްކީޕަރު ޓޮމް ހީޓަން ވެސް ވަނީ އަލުން ޔުނައިޓެޑާ ގުޅިފަ އެވެ.
ވާދަވެރި އެހެން ޓީމުތަކުގެ ޓްރާންސްފާ އަށް ބަލާއިރު ސިޓީން ވަނީ ޖެކް ގްރީލިޝް ގަނެފަ އެވެ. އަދި ސިޓީން ހެރީ ކޭންގެ ސޮއި ހޯދުމަށް ވެސް މަސައްކަތް ކުރެ އެވެ. މަޝްވަރާތައް ރަނގަޅަށް ގޮސްފިނަަމަ ޗެލްސީން އަލުން ރޮމެލޫ ލުކާކޫ ގެންނާނެ އެވެ. ލުކާކޫ ގަންނަން ޗެލްސީން ފުރަތަމަ ކުރި ދެ ބިޑް އިންޓަ އިން ވަނީ އަނބުރާ ފޮނުވާލައިފަ އެވެ.
ޔުނައިޓެޑްގެ ކޯޗު ސޯލްޝެއާ މީޑިއާ އަށް އިންޓަވިއުއެއް ދެނީ.-- ފޮޓޯ: އޭއެފްޕީ
ސޯލްޝެއާ ބުނީ ކުރިއަށް އޮތް ސީޒަނަކީ ލީގުގެ ތާރީހުގައި އެންމެ އުނދަގޫ އެއް ސީޒަނަށް ވާނެ ކަމަށެވެ.
"އަހަރެންގެ ނަޒަރުގައި ފޭވަރިޓަކީ ސިޓީ. މިދިޔަ އަހަރުތަކުގައި ސިޓީ އާއި ލިވަޕޫލުން ރޭހުގެ ކުރީގައި އޮތީ. އެކަމަކު މި ފަހުން ޗެލްސީ ވެސް ވަރުގަދަވެއްޖެ. ލީގަށް ވާދަކުރާނެ ފެންވަރު ހުރި އެ ރޭހުގައި އޮންނާނެ ޓީމެއް އަހަރެމެންނަކީ ވެސް. ލީގަށް ވާދަކޮށް ތަށި ހޯދޭނެ ފެންވަރު ހުރި ކްލަބެއް އަބަދުވެސް އަހަރެމެންނަކީ،" ސޯލްޝެއާ ބުންޏެވެ.
"އެންމެ ފަހުގެ ޗެމްޕިއަން (ސިޓީ) ފަހަތަށް ޖައްސާލާފައި ކުރި ހޯދާ ޓީމެއް މި ފަހަރުގެ ޗެމްޕިއަނަކަށް ވާނީ. އެހެންވީމަ ޗެލެންޖްކުރަން ޖެހޭނީ ސިޓީއާ،"
ޔުނައިޓެޑުން މިދިޔަ ސީޒަނުގައި ގޯލްކީޕަރުން ބޭނުންކުރީ ބަހާލައިގެންނެވެ. ބޮޑެތި މެޗުތަކުގައި ޑީން ހެންޑަސަން އާއި ޑޭވިޑް ޑެހެއާ ކުޅެފައިވެ އެވެ. މި ފަހަރު ޔުނައިޓެޑުން ތިން ވަނަ ކީޕަރަކަށް ހީޓަން ގެނައިއިރު، ސޯލްޝެއާ ދެކޭގޮތުގައި ހީޓަން އަކީ ވެސް އެއް ވަނަ މަގާމަށް ވާދަކުރެވޭނެ ފެންވަރު ހުރި މޮޅު ކީޕަރެކެވެ.
މި ފަހަރުގެ ޓްރާންސްފާ މާކެޓްގައި ޔުނައިޓެޑުން ދެން އިތުރު ކުޅުންތެރިއަކު ގެންނާނީ ކްލަބް ދޫކޮށްލާ ކުޅުންތެރިންނަށް ބެލުމަށް ފަހު އެވެ. ސޯލްޝެއާ ބުނީ ދެން ޓްރާންސްފާއެއް ފުރިހަމަކުރެވިއްޖެނަމަ އެއީ ބޯނަހެއް ކަމަށެވެ.
ސޯލްޝެއާ ޔުނައިޓެޑާ ހަވާލުވި ފަހުން އެ ޓީމަށް އަދި ތަށްޓެއް ނުލިބެ އެވެ. އެކަަމަކު، ޖެހިޖެހިގެން ދެ ސީޒަނުގައި ލީގުގެ ގަދަ ހަތަރަކުން ފުރުސަތު ހޯދައިދީ މިދިޔަ ސީޒަނުގައި ލީގުގެ ދެ ވަަނަ ހޯދައި ޔޫރޮޕާ ލީގުގެ ފައިނަލަށް ދަތުރުކުރުމުން ޔުނައިޓެޑްގެ ސީނިއާ މެނޭޖްމަންޓުން ނިންމީ ސޯލްޝެއާ އަށް އިތުރު ތިން އަހަރުގެ ކޮންޓްރެކްޓެއް ދޭށެވެ.
އިނގިރޭސި މީޑިއާ ރިޕޯޓްތައް ބުނާގޮތުގައި ސޯލްޝެއާ އަށް މި ސީޒަނުގައި ޔުނައިޓެޑް ގޮވައިގެން ތަށްޓެއް ނުހޯދިއްޖެނަމަ މަގާމު ގެއްލުމުގެ ފުރުސަތު ވަރަށް ބޮޑެވެ. އިނގިރޭސި ޕްރިމިއާ ލީގުގެ އާ ސީޒަނުގައި ޔުނައިޓެޑް ކުޅޭ ފުރަތަމަ މެޗުގައި މި މަހު 14 ވަނަ ދުވަހު ބައްދަލުކުރާނީ ލީޑްސް ޔުނައިޓެޑާ އެވެ.
