ޕެރިސް (ޖުލައި 15) - މި ފަހަރުގެ ޔޫރޯ ފުޓްބޯޅަ މުބާރާތުގެ މޮޅު ކުޅުންތެރިޔާގެ މަގާމު ހޯދި އިޓަލީގެ ގޯލްކީޕަރު ޖިއަންލުއީޖީ ޑޮންނަރުންމާ ފްރާންސްގެ ގަދަބާރު ޕީއެސްޖީ އަށް ސޮއިކޮށްފި އެވެ.
ހިލޭ ޓްރާންސްފާއެއްގެ ދަށުން އުމުރުން 22 އަހަރުގެ ޑޮންނަރުންމާ ޕީއެސްޖީ އަށް ސޮއިކުރީ ފަސް އަހަރުގެ އެއްބަަސްވުމެއްގަ އެވެ. އޭނާ މިހާތަނަށް ކުޅެމުން އައީ އިޓަލީގެ އޭސީ މިލާން އަށެވެ. ޕީއެސްޖީއާ ގުޅުނީ މިލާނުން އެއްބަސްވުން އާ ކުރަން ހުށަހެޅި ނަމަވެސް އެހެން ޗެލެންޖެއް ނެގުމާއި ބޮޑު މުސާރައެއް ހޯދުމަށެވެ.
"މި ކްލަބާ (ޕީއެސްޖީ)އާ ގުޅުމަކީ ލިބުނު ވަރަށް ބޮޑު ހިތްހަމަ ޖެހުމެއް. ގިނަ ކާމިޔާބީތަކެއް ހޯދައި ކުޅުންތެރިއެއްގެ ގޮތުގައި ކުރިއަރަން ވަރަށް މަސައްކަތް ކުރަން ބޭނުން. ޕީއެސްޖީއާ ގުޅުމަކީ ރަނގަޅު ނިންމުމެއްކަން ސާބިތުކޮށްދޭން ވެސް ބޭނުން،" ޑޮންނަރުންމާ ބުންޏެވެ.
އިޓަލީގެ ކޯޗުކަމާ 2018 ވަނަ އަހަރު ރޮބާޓޯ މަންޗިނީ ހަވާލުވި ފަހުން ޑޮންނަރުންމާ އަކީ އެ ޓީމުގެ އެއް ވަނަ ގޯޯލްކީޕަރެވެ. މި ފަހަރުގެ ޔޫރޯގައި އިޓަލީ ޗެމްޕިއަންކަން ހޯދިއިރު، ޑޮންނަރުންމާ ވަނީ މޮޅު ކުޅުމެއް ދައްކައިފަ އެވެ. ހާއްސަކޮށް ސެމީ ފައިނަލާއި ފައިނަލުގައި ޕެނަލްޓީ ޖަހައިގެން އިޓަލީ މޮޅުވިއިރު، ޑޮންނަރުންމާ ތަފާތު ދެއްކި އެވެ.
އިޓަލީގެ މެޗެއްގެ ތެރެއިން ޑޮންނަރުންމާ.-- ފޮޓޯ: އޭއެފްޕީ
ޑޮންނަރުންމާގެ ފުޓްބޯޅަ ކެރިއަރުގައި ކުރިއަށް ދާން މަގު ކޮށައިދިނީ އޭނާ އަށް ހުރިހާ ފުރުސަތެއް ހުޅުވާލައިދިން ކްލަބް އޭސީ މިލާނުންނެވެ. މިލާންގެ އެކެޑަމީ އަށް ޒުވާން އުމުރުގައި ގަނެ، ޑޮންރުންމާ އަށް ސީނިއާ ޓީމުގައި ހިމެނެން މެޗެއްގައި ފުރުސަތު ދިނީ 2015 ވަަނަ އަހަރުގެ ފެބްރުއަރީ މަހު އޭނާގެ 16 ވަނަ އުފަން ދުވަހުގެ ތިން ދުވަސް ކުރިންނެވެ. އެ ދުވަހުގެ މެޗުގައި ނުކުޅުނު ނަމަވެސް ޑޮންނަރުންމާ ބެންޗަށް ގެނެވުނީ ވެސް ހާއްސަ ހުއްދައެއް ނަގައިގެންނެވެ. އެއީ އޭނާ ޕްރޮފެޝަނަލް މެޗަކަށް ނުކުންނަ ވަރަށް ވުރެ ޅަ ކުޅުންތެރިއަކަށް ވުމުންނެވެ.
އޭގެ ހަ ވަރަކަށް މަސް ފަހުން ޑޮންނަރުންމާ ވަނީ އިޓާލިއަން ލީގުގެ މެޗެއްގައި މިލާންގެ ގޯލު ބަލަހައްޓައިފަ އެވެ. މިލާން ގޯލުގައި 25 އޮކްޓޫބަރު 2015، ވަނަ ދުވަހު ކުޅުނު މެޗާ އެކު ޑޮންނަރުންމާ ވެފައިވަނީ އިޓަލީގެ ފުޓްބޯޅަ ތާރީހުގައި ލީގުގެ މެޗެއްގައި ކުޅުނު ދެ ވަނަ އަށް އެންމެ ޒުވާން ގޯލްކީޕަރަށެވެ. އެ މެޗުގައި ކުޅުނުއިރު، ޑޮންނަރުންމާގެ އުމުރަކީ 16 އަހަރާއި 242 ދުވަހެވެ. އެންމެ ޒުވާން އުމުރުގައި ކުޅުނު ގޯލްކީޕަަރު ޖިއުސިޕޭ ސާޗީ އާއި ޑޮންނަރުންމާގެ ދެމެދު ފުރަތަމަ މެޗު ކުޅުނުއިރު އުޅެނީ 13 ދުވަހުގެ ފަރަގެކެވެ. ފުރަތަމަ ފުރުސަތު ދިންތާ މާގިނަ ދުވަހެއް ނުވެ ޑޮންނަރުންމާ ވަނީ މިލާންގެ އެއް ވަނަ ކީޕަރަކަށް ޕްރޮމޯޓްކޮށްފަ އެވެ.
ޑޮންނަރުންމާ ވަނީ ފަހަކަށް އައިސް މިލާން ކެޕްޓަން ބޭންޑް އަޅައިގެން ވެސް ގިނަ މެޗުތަކެއް ކުޅެފަ އެވެ.
މި ފަހަރުގެ ޓްރާންސްފާ މާކެޓްގެ ތެރޭގައި ޑޮންނަރުންމާގެ އިތުރުން ލިވަޕޫލްގެ ޖިއޮޖީނިއޯ ވައިނަލްޑަމް އާއި ރެއާލް މެޑްރިޑްގެ ސާޖިއޯ ރާމޯސް ވެސް ވަނީ ހިލޭ ޓްރާންސްފާއެއްގައި ޕީއެސްޖީ އަށް ސޮއިކޮށްފަ އެވެ. މީގެ އިތުރުން އިންޓަ މިލާނަށް ކުޅެމުން އަންނަ މޮރޮކޯގެ ފުލްބެކް އަޝްރަފް ހަކީމީ ވަނީ 70 މިލިއަން ޑޮލަރުގެ ފީ އަކަށް ޕީއެސްޖީ އަށް ސޮއިކޮށްފަ އެވެ.
