ލަންޑަން (ޖޫން 22) - ސްކޮޓްލެންޑްގެ ބިލީ ގިލްމޯ ކޮވިޑަށް ޕޮޒިޓިވްވުމުން އޭނާއާ މިދިޔަ ހުކުރު ދުވަހުގެރޭގެ މެޗަށް ފަހު ކޮންޓެކްޓްވި އިންގްލެންޑްގެ ދެ ކުޅުންތެރިން ކަމަށްވާ ބެން ޗިލްވެލް އާއި މޭސަން މައުންޓް ސެލްފް އައިސޮލޭޝަނަކަށް ގޮސްފައިވާއިރު، މިރޭ އެ ދެ ކުޅުންތެރިންނަށް ޗެކް ރިޕަބްލިކާ ދެކޮޅަށް ކުޅެވިދާނެކަމާ މެދު ސުވާލު އުފެދިފައިވާ ކަމަށް އިނގިރޭސި ކޯޗު ގަރެތު ސައުތުގޭޓް ބުނެފި އެވެ.
ގިލްމޯ ވަނީ އެންމެ ފަހުން ސްކޮޓްލެންޑުން މިދިޔަ ހުކުރު ދުވަހުގެރޭ އިންގްލެންޑާ އެއްވަރުކުރި މެޗުގެ މޮޅު ކުޅުންތެރިޔާގެ މަގާމު ހޯދައިފަ އެވެ. ޗެލްސީ އަށް ކުޅޭ އުމުރުން 20 އަހަރުގެ ގިލްމޯ އަށް އެ ކާމިޔާބީ ލިބުމުން އެ މެޗަށް ފަހު އޭނާ އަށް މަރުހަބާ ކިޔަން މައުންޓާއި ޗިލްވެލް ވަނީ އޭނާ ކައިރިއަށް ގޮސް ވަގުތު ހޭދަކޮށްފަ އެވެ. ގިލްމޯ އާއި މައުންޓް އަދި ޗިލްވެލް އަކީ ޗެލްސީ އަށް ކުޅޭ ތިން ކުޅުންތެރިންނެވެ.
ޕޮޒިޓިވްވުމާ އެކު ގިލްމޯ ވަނީ 10 ދުވަހުގެ އައިސޮލޭޝަނަކަށް ގޮސްފަ އެވެ. ގިލްމޯއާ ކޮންޓެކްޓް ވެފައިވާތީ މައުންޓާއި ޗިލްވެލް ހުރީ ސެލްފް އައިސޮލޭޝަނެއްގަ (އަމިއްލަ އަށް އެކަހެރިވެގެން) އެވެ. ރިޕޯޓްތައް ބުނާގޮތުން މެޗު ފެށުމުގެ 12 ގަޑިއިރެއްހާއިރު ކުރިން އެ ދެ ކުޅުންތެރިންގެ ޓެސްޓްތަކެއް ކުރުމަށް ފަހު އޭގެއިން ފާސް ވެއްޖެނަމަ މެޗުގައި ބައިވެރިވެވޭނެ އެވެ. އެކަމަކު ކޮވިޑަށް ޕޮޒިޓިވްވެއްޖެނަމަ ދެން މި ފަހަރުގެ ޔޫރޯގައި ނުކުޅެވުމުގެ ފުރުސަތު ބޮޑެވެ.
އިންގްލެންޑާއި ސްކޮޓްލެންޑް މެޗަށް ފަހު: ގިލްމޯ އާއި މައުންޓް އަދި ޗިލްވެލް.
ސައުތުގޭޓް ބުނީ އޭނާ އެދެނީ ހާލަތު ގޯސްނުވެ، އެ ދެ ކުޅުންތެރިންނަށް އަވަހަށް ޓީމާ ގުޅެވުން ކަމަށެވެ.
"ސީދާވާނެ ގޮތެއް ބުނަން ނޭނގޭ. ވަރަށް ބޮޑަށް ޝައްކު ކުރެވޭ މި މެޗުގައި (ޗެކް ރިޕަބްލިކް މެޗު) ކުޅެވިދާނެތޯ. އެކަމަކު ވަރަށް ބައިވަރު ކަންތައްތައް އެބަކުރެވޭ ފަރުދާގެ ފުރަގަހުގައި. މަޝްވަރާތަކާއި މެޑިކަލް ތަހުލީލުތަކާ ކަންކަން ކުރެވިގެން މީގެ ގޮތެއް ނިންމާނީ. އަހަރެން މި ހުރީ އުއްމީދުގައި،" މިރޭގެ މެޗުގެ ކުރިން ސައުތުގޭޓް ބުންޏެވެ.
ސައުތުގޭޓް އެދެނީ މި މެޗުގައި ޗެކް ރިޕަބްލިކާ ދެކޮޅަށް ނުކުޅެވުނު ކަމުގައި ވިޔަސް މައުންޓާއި ޗިލްވެލް ޕޮޒިޓިވް ނުވުމެވެ. އެއީ ޕޮޒިޓިވްވެއްޖެނަމަ 10 ދުވަހުގެ އައިސޮލޭޝަނަކަށް ދާން ޖެހިގެން މި ފަަހަރު ޔުރޯގައި ނުކުޅެވިދާނެ ފަދަ ހާލަތެއް ކުރިމަތިވެދާނެތީ އެެވެ.
ފުރަތަމަ ތިން ގްރޫޕްގެ ނަތީޖާ ނުކުތްގޮތަކުން އިންްގްލެންޑާއި ޗެކް ރިޕަބްލިކަށް ވަނީ މިހާރު އަނެއް ބުރުގެ ޖާގަ ޔަގީންވެފަ އެވެ. އެއީ ގްރޫޕްގެ އެއް ވަަނައިގައި އޮތް ޗެކް ރިޕަބްލިކާއި ދެ ވަނައިގައި އޮތް އިންގްލެންޑަށް ދެ މެޗުން ހަތަރު ޕޮއިންޓް ލިބިފައި އޮތްއިރު، މި ގްރޫޕުން ގަދަ ދެ ޓީމުގެ ތެރޭގައި އެ ދެ ޓީމުގެ ތެރެއިން ޓީމެއް ނުހިމެނުނު ނަމަވެސް އެ ދެ ޓީމަށް އަނެއް ބުރުން ފުރުސަތު ޔަގީންވީ އެންމެ ރަނގަޅު ނަތީޖާ ނެރޭ ތިން ވަަނަ އަށް ދާ ޓީމުތަކުގެ ތެރެއިން ޖާގަ ލިބޭނެތީ އެވެ.
އިންގްލެންޑްގެ އަމާޒު ހުރީ ގްރޫޕްގެ އެއް ވަނަ ޓީމުގެ ގޮތުގައި ރަނގަޅު ކޮންފިޑެންސަކާ އެކު އަނެއް ބުރަށް ދިއުމަށެވެ. އެކަން ހާސިލްކުރަން މިރޭ ޗެކް ރިޕަބްލިކް ބަލިކުރަން ޖެހެ އެވެ. ސައުތުގޭޓް ވަނީ މިރޭގެ މެޗުގައި އެ ޓީމުގެ ދެ ކުޅުންތެރިން ކަމަށްވާ ޖޯޑަން ހެންޑަސަން އާއި ހެރީ މެގުއާ ބޭނުން ކުރާނެ ކަމަށް ބުނެފަ އެވެ.
ލިވަޕޫލްގެ ކެޕްޓަން ހެންޑަސަން އާއި މެންޗެސްޓާ ޔުނައިޓެޑްގެ ކެޕްޓަން މެގުއާ މި ފަހަރުގެ ޔޫރޯ ސްކޮޑަށް ނެގި އަނިޔާއިން ރިކަވާވަމުން އަންނަނިކޮށެވެ. މި ދެ ކުޅުންތެރިން މި ފަހަރުގެ ޔޫރޯގައި އަދި ކުޅެފައެއް ނުވެ އެވެ. ސައުތުގޭޓް ބުނީ ދެ ކުޅުންތެރިންގެ ފިޓްނަސް މިހާރު ހުރީ ރަނގަޅު ލެވަލެއްގައި ކަމަށާއި މެޗުގައި ވެސް ބޭނުންކުރެވޭނެ ކަމަށެެވެ.
މި ފަހަރުގެ ޔޫރޯ ކޮލިފައިންގައި ޗެކް ރިޕަބްލިކާއި އިންގްލެންޑް އޮތީ އެއް ގްރޫޕެއްގަ އެވެ. އިންގްލެންޑުން ވަނީ އަމިއްލަ ދަނޑުގައި ކުޅުނު މެޗުން 5-0 އިން މޮޅުވެފަ އެވެ. ޗެކް ރިޕަބްލިކް ދަނޑުގައި ކުޅުނު މެޗުން އެ ޓީމު މޮޅުވީ 2-1 އިންނެވެ. މިރޭގެ މެޗަކީ ވާދަވެރި މުބާރާތެއްގައި މި ދެ ޓީމުގެ ފުރަތަމަ ކުރިމަތިލުމެވެ.
ޗެކް ރިޕަބްލިކްގެ ޓްރެއިނިންގެ ތެރެއިން ސިލްހަވީ.
ޗެކް ރިޕަބްލިކްގެ ކޯޗު ޔަރޮސްލާވް ސިލްހަވީ ބުނީ ފުރަތަމަ ދެ މެޗުގައި އިންގްލެންޑަަށް ރަނގަޅަށް ނުކުޅެވުމުން އެ އަމާޒުވަމުން އަންނަ ފާޑުކިޔުންތަކަށް ޖަވާބުދޭން އެ ޓީމުން ބޭނުންހިފާނީ މިރޭ ޗެކް ރިޕަބްލިކާ ދެކޮޅަށް ކުޅޭ މެޗު ކަމަށެވެ.
"ކޮންމެ ގޮތެއް ވިޔަސް ފުރަތަމަ ދެ މެޗުން އިންގްލެންޑްގެ ފެންވަރަކީ އެންމެ ގޯލެއް ޖެހުމެއް ނޫން. އެ މީހުން މި މެޗަށް ނުކުންނާނީ ގޯލުތަކެއް ޖަހައިގެން މޮޅުވެ އެ އަމާޒުވަމުން އަންނަ ފާޑުކިޔުންތައް ހުއްޓޭނެ ގޮތެއް ހޯދަން،" ސިލްހަވީ ބުންޏެވެ.
އޭނާ ބުނީ މެޗަށް ނުކުންނައިރު ބޮޑަށް ޕްރެޝަރު އޮތީ ވެސް އިންގްލެންޑަށް ކަމަށެވެ. އެއީ އިންގްލެންޑްގެ ރައްޔިތުން އެދެނީ އެ ޓީމުން މި ފަަހަރުގެ ޔޫރޯގައި ބޮޑު ކާމިޔާބެއް ހޯދަން ކަމަށާއި އަދި މެޗުތައް އެ ގައުމުގައި އިންގްލެންޑުން ކުޅޭއިރު، ދަނޑުގައި ތިބޭ ސަޕޯޓަރުންނާ އެކު އޮތް ޕްރެޝަރު ދެ ގުނަ ވާނެ ކަމަށެެވެ.
ސިލްހަވީ ބުނީ ކޮލިފައިން ބުރުގައި ކުޅުނު ދެ މެޗާއި މުބާރާތުގައި ކުޅޭ މެޗު މުޅިން ތަފާތުވާނެ ކަމަށާއި ޗެކް ރިޕަބްލިކުން ނުކުންނާނީ ރަނގަޅު ނަތީޖާއެއް ނެރެ ގްރޫޕްގެ އެއް ވަނަ ހޯދުމަށް ކަމަށެެވެ.
އިންގްލެންޑާއި ޗެކް ރިޕަބްލިކް ކުޅޭ މެޗު ފަށާނީ މިރޭ ރާއްޖެ ގަޑިން 00:00 ގަ އެވެ. ހަަމަ އެ ވަގުތު މި ގްރޫޕްގެ އަނެއް މެޗުގައި ސްކޮޓްލެންޑުން އަމިއްލަ ދަނޑުގައި ކްރޮއޭޝިއާއާ ބައްދަލުކުރާނެ އެވެ. އެ މެޗުން މޮޅުވާ ޓީމަކަށް ދެ ވަަނަ ބުރުން ފުރުސަތު ލިބޭނެ އެވެ.
