މެޑްރިޑް (ޖޫން 12) - ކޮވިޑް-19 ޖެހިގެން ސްޕެއިންގެ ދެ ކުޅުންތެރިން އައިސޮލޭޓް ކޮށްފައިވާއިރު، ކުޅުންތެރިން ވެކްސިން ޖެހުން ލަސްވުމުން ސްޕެއިނުގެ ކޯޗު ލުއިސް އެންރީކޭ ހިތްހަމަނުޖެހުން ފާޅުކޮށްފި އެވެ.
މިދިޔަ ހަފްތާގެ ހަތަރު ދުވަހުގެ ތެރޭގައި ސްޕެއިންގެ ކެޕްޓަން ސާޖިއޯ ބުސްކެޓްސް އާއި ޑިފެންޑަރު ޑިއޭގޯ ލޮރެންޓޭ ކޮވިޑް-19 އަށް ޕޮޒިޓިވްވުމުން އެ ޓީމުގެ ގްރޫޕް ފަރިތަކުރުންތައް ވަގުތީ ގޮތުން ހުއްޓާލި އެވެ. އަލުން ޕްރެކްޓިސްތައް ފެށީ އިއްޔެ ވެކްސިންގެ ފުރަތަމަ ޑޯޒް ޖެހުމަށް ފަހު އެވެ. ސްޕެއިން ޔޫރޯގައި ކުޅޭ ފުރަތަމަ މެޗު އޮންނާނީ ހޯމަ ދުވަހުގެރޭ ސްވިޑެންއާ ދެކޮޅަށެވެ.
ސްޕެއިން ކުޅުންތެރިންނަށް ދިނީ ފައިޒާ ވެކްސިނެވެ. ސްޕެއިނުގެ ހެލްތު މިނިސްޓްރީގެ ފަރާތުން ހާއްސަ އުސޫލެއްގެ ދަށުން އޮލިމްޕިކްސްގައި ވާދަކުރާ އެތުލީޓުންނާއި ޔޫރޯގައި ކުޅޭ ކުޅުންތެރިންގެ ވެކްސިން ޖެހުމުގެ ކަންކަން ފެށުނީ މިިދިޔަ ބުދަ ދުވަހު އެވެ. ސްޕެއިނުގެ ސަރުކާރާ ވާހަކަ ދައްކައިގެން ބުރާސްފަތި ދުވަހު ގައުމީ ޓީމަށް ވެކްސިން ދޭން ކުރި މަސައްކަތް އެ ދުވަހު ކާމިޔާބެއްނުވި އެވެ. ވެކްސިން ޖެހޭގޮތްވީ އިއްޔެ އެވެ.
އެންރީކޭ ބުނީ އޭނާ ދެކޭ ގޮތުގައި ވެކްސިންގެ ކަންތައްތަކަކީ އެންމެ ފުރަތަމަ ސްކޮޑު ފައިނަލް ކުރާ ހިސާބުން ނިމިފައި ހުންނަން ޖެހޭނެ ކަމެއް ކަމަށެވެ.
"ސްޕެއިން ފުޓްބޯޅަ ފެޑެރޭޝަންގެ ރައީސް ރުބިއާލެސް ވަނީ ސަރުކާރާ އެކު މަޝްވަރާކޮށްފައި މީގެ އެއް މަސް ނޫނީ ދެ މަސް ކުރިން ސްކޮޑު ފައިނަލް ކުރެވޭ ހިސާބުން ވެކްސިން ޖަހަން. އެކަމަކު އެހެނެއް ނޫން މިވީ. އަހަރެން ޝަކުވާ ކުރާކަން ނެތިން. އެކަމަކު މިހާރު މިވީ ގޮތުން މުބާރާތަށް ވެސް އަސަރުކުރާނެ ކަންކަން އެބަހުރި،" އެންރީކޭ ބުންޏެވެ.
ސްޕެއިންގެ ކުޅުންތެރިއަކު ގަޔަށް ވެކްސިން ޖަހަނީ.
އިއްޔެ ކުޅުންތެރިން ވެކްސިން ޖެހުމާ އެކު ފުރަތަމަ މެޗާ ހަމައަށް ބައެއް ކުޅުންތެރިންނަށް ސައިޑްއިފެކްޓްތައް ކުރިމަތިވުމުގެ ފުރުސަތު އެބައޮތެވެ. އަދި ދެ ވަނަ ޑޯޒް ޖަހަން ޖެހޭނީ ސްޕެއިން ކުއާޓާ ފައިނަލަށް ގޮސްފިނަމަ އެ މެޗުގެ ކުރިންނެވެ. އޭގެ މާނަ އަކީ ކުއާޓާ ފައިނަލުގެ ކުރިން ދެ ވަނަ ޑޯޒް ޖަހައިގެން އަސަރުކުރާ ކުޅުންތެރިންނަށް އޭގެ އުނދަގޫތަކެއް ކުރިމަތިވުމެވެ. އަދި ދެ ޑޯޒްގެ ފުރިހަމަ ފައިދާ ކުޅުންތެރިންނަށް ކުރާނެ ކަމަށް ސްޕެއިނުގެ މެޑިކަލް ޓީމުން ބުނަނީ ސެމީ ފައިނަލުގެ ފަހުން ކަމަށް ސްޕެއިނުގެ މީޑިއާ ރިޕޯޓްތައް ބުނެ އެވެ.
"މީގެ ވިސްނަން ޖެހޭ ކަންކަން ބައިވަރު. އަހަރެންނަށް ކުރެވޭނެ ކަމެއްނަމަ ވެކްސިން ޖެހުން ވަރަށް ކުރިން ނިންމާނަން. އެކަމަކު މިއީ އެ ވާހަކަ ދެއްކުން އެންމެ ރަނގަޅު ވަގުތެއް ނޫން،" އެންރީކޭ ބުންޏެވެ.
މިދިޔަ ހަފްތާގެ އާދިއްތަ ދުވަހު އެންމެ ފުރަތަމަ ކޮވިޑަށް ޕޮޒިޓިވްވީ ބުސްކެޓްސް އެވެ. އޭގެ ފަހުން ކުރި ޓެސްޓްތަކުން ހުރިހާ ކުޅުންތެރިންނާއި އޮފިޝަލުން ވީ ކޮވިޑަށް ނެގެޓިވް އެވެ. އެކަމަކު ބުދަ ދުވަހު ޑިފެންޑަރު ލޮރެންޓޭ ކޮވިޑަށް ޕޮޒިޓިވްވި އެވެ. އެންމެ ފަހުން ކުރި ޓެސްޓްތަކުން ލޮރެންޓޭ ނެގެޓިވް ވެފައިވާއިރު، އިތުރު ޓެސްޓެއް ހެދުމަށް ފަހު އޭނާ އަނެއްކާ ވެސް ނެގެޓިވް ވެއްޖެނަމަ ޓީމާ ގުޅުމުގެ ފުރުސަތު ޕްރޮޓޮކޯލްގެ ތެރެއިން ލިބޭނެ އެވެ.
ފުރަތަމަ ބުސްކެޓްސް ޕޮޒިޓިވްވުމުން ސްޕެއިނުން ވަނީ އެ ޓީމުގެ ހާލަތު ގޯސްވެދާނެ ކަމަށް ބަލައި ސްކޮޑަށް ހަ ކުޅުންތެރިން އިތުރުކޮށްފަ އެވެ. އަދި ފަހުން ލޮރެންޓޭ ޕޮޒިޓިވްވުމުން ސްކޮޑަށް އިތުރުކުރި ކުޅުންތެރިންނާ އެކު ޖުމްލަ ކުޅުންތެރިންގެ އަދަދު ވަނީ 17 އަށް އަރައިފަ އެވެ. މިއަދުގެ ނިޔަލަށް 26 ކުޅުންތެރިންނަށް ސްކޮޑު ފައިނަލް ކުރަން ޖެހޭނެ އެވެ.
ކޮވިޑް ޖެހިގެން ގިނަ ޓީމުތަކެއްގެ ކުޅުންތެރިން ވަނީ އެކަހެރިވާން ޖެހިފަ އެވެ. އެ ގޮތުން ސްވިޑެންގެ ޑޭޔާން ކުސުލެވްސްކީ އާއި މަޓިއަސް ސްވެންބާގް ދާދި ފަހުން ކޮވިޑަށް ޕޮޒިޓިވްވި އެވެ. އަދި ސްކޮޓްލެންޑާއި ރަޝިއާ ޓީމުން ވެސް ޕޮޒިޓިވް ކޭހެއް ވަނީ ފެނިފަ އެވެ.
ޔުއެފާ އިން ކަނޑައަޅާފައިވާ ގަވާއިދުގައިވާ ގޮތުން މިއަދުގެ ނިޔަލަށް ކޮންމެ ޓީމަކަށް ވެސް ޔޫރޯ ސްކޮޑަށް ބަދަލު ގެނެވޭނީ ހާއްސަ ހާލަތެއްގަ އެވެ. އެއީ އަނިޔާގެ މައްސަލަތަކާއި ކޮވިޑް-19ގެ ކޭސްތައް ޓީމުތަކަށް ކުރިމަތިވާ ގޮތް ބެލުމަށް ފަހު އެވެ. ކޮންމެ ޓީމެއް 26 ކުޅުންތެރިންނަށް ވުރެ ގިނަ ނުވާ ގޮތަށް ސްކޮޑު ހުށަހަޅަން ފުރަތަމަ ދިން މުހުލަތު ހަމަވީ މި މަހުގެ އެއް ވަނަ ދުވަހު އެވެ.
