ބަކޫ، އަޒަރުބައިޖާން (ޖޫން 12) - މީގެ ހަތަރު އަހަރު ކުރިން ޔޫރޯގައި ފުރަތަމަ ފަހަރަށް ކުޅެ ހޯދި ކާމިޔާބީ އަށް ވުރެ ރަނގަޅު ކަންތައްތަކެއް މި ފަހަރު ހާސިލްކުރަން ބޭނުންވާ ކަމަށް ވޭލްސްގެ ކެޕްޓަން ގެރެތު ބޭލް ބުނެފި އެވެ.
ހަތަރު ފަަހަރަށް ޗެމްޕިއަންސް ލީގުގެ ތަށި އުފުލާލާފައިވާ ބޭލް އަކީ މި ފަހަރު ވޭލްސްގެ ކެޕްޓަން އެވެ. މީގެ ހަތަރު އަހަރު ކުރިން ބޭލްގެ ގޯލުތަކާ އެކު ވޭލްސް ވަނީ ޔޫރޯގެ ސެމީން ފުރުސަތު ހޯދައިފަ އެވެ. ސެމީގައި ބަލިވީ މުބާރާުތުގެ ޗެމްޕިއަންކަން ހޯދި ޕޯޗުގަލް އަތުންނެވެ.
"ގައުމީ ޓީމުގެ ކެޕްޓަންކަން ކުރެވުމަކީ ވަރަށް ބޮޑު ފަހުރެއް. މިކަން ވާނެ އަހަރެންގެ ކެރިއަރުގެ ވެސް އުސްއައްޔަކަށް. ބޭނުންވަނީ އެންމެ ފަހުން މުބާރާތަށް ވުރެ އެއް ހަރުފަތް މައްޗަށް ޖައްސާލަން،" މި ފަހަރުގެ ޔޫރޯގައި ވޭލްސް ކުޅޭ ފުރަތަމަ މެޗުގައި މިއަދު ސްވިޒަލެންޑާ ދެކޮޅަށް ނުކުތުމުގެ ކުރިން ބޭއްވި ނޫސްވެރިންގެ ބައްދަލުވުމުގައި ބޭލް ބުންޏެވެ.
ވޭލްސް އެންމެ ފަހުން ކުޅުނު 11 މެޗުގައި ބޭލް އަށް ގޯލެއް ޖެހިފައިނުވި ނަމަވެސް އޭނާ އަކީ އެ ގައުމުގެ ތާރީހުގައި ގައުމީ ޓީމަށް އެންމެ ގިނަ ގޯލު ޖަހައިދިން ކުޅުންތެރިޔާ އެވެ. އޭނާ ވަނީ ގައުމީ ޓީމަށް ކުޅުނު 92 މެޗުން 33 ގޯލު ޖަހައިފަ އެވެ. އޭގެ ތެރެއިން ތިން ގޯލަކީ 2016 ވަނަ އަހަރުގެ ޔޫރޯގެ ގްރޫޕް ސްޓޭޖު ތިން މެޗުގައި ޖެހި ގޯލުތަކެވެ.
"ޓީމަށް އެހީވެދޭން ކުރެވޭ ކޮންމެ ކަމެއް ކުރަން މި ހުރީ ތައްޔާރަށް،" ބޭލް ބުންޏެވެ.
ވޭލްސް އަކީ 1992 ވަނަ އަހަރު ސްވިޑަން އަށް ފަހު ފުރަތަމަ މުބާރާތުގައި ވާދަކޮށް ސެމީން ފުރުސަތު ހޯދި ފުރަތަމަ ޓީމެވެ. ބޭލް ވަނީ ސްވިޒަލެންޑާ ދެކޮޅަށް އެންމެ ފަހުން ވޭލްސް ކުޅުނު ދެ މެޗުގައި ވެސް ގޯލު ޖަހައިފަ އެވެ.
ވޭލްސް - ސްވިޒަލެންޑް: ކޯޗުންގެ ބަސް
މިއަދުގެ މެޗަކީ ބައިނަލްއަގުވާމީ މުބާރާތެއްގައި ވޭލްސް އާއި ސްވިޒަލެންޑްގެ ފުރަތަަމަ ކުރިމަތިލުމެވެ. މީގެ ކުރިން އެކުވެރިކަމުގެ ހަތް މެޗު ކުޅެފައިވާއިރު، ސްވިޒަލެންޑް ފަސް މެޗުން މޮޅުވި އެވެ. ވޭލްސް މޮޅުވީ ދެ މެޗުންނެވެ. އޭގެ ތެރޭގައި އެންމެ ފަހުން 2011 ވަަނަ އަހަރު މި ދެ ޓީމު ކުޅުނު މެޗު ހިމެނެ އެެވެ.
ވޭލްސްގެ ކޯޗުގެ ޒިންމާ މި މުބާރާތުގައި ވެސް އަދާކުރާނީ ކުރިން އެ ޓީމުގެ އެސިސްޓަންޓް ކޯޗަކަށް ހުރި އަދި ޒުވާން ޓީމުގެ ކޯޗު ރޮބާޓް ޕޭޖް އެވެ. އޭނާ އެ ޓީމާ ހަވާލުވާން ޖެހުނީ ގެވެށި އަނިޔާގެ މައްސަލައެއްގައި ވޭލްސްގެ ކޯޗު ރަޔާން ގިގްސް ހައްޔަރުކޮށް އެ މައްސަލައިގައި އޭނާގެ މައްޗަށް ދައުވާކުރުމުންނެވެ.
ފުރަތަމަ މެޗަށް ނުކުންނައިރު ޕޭޖަށް އޮތް ހިތްހަމަ ޖެހުމަކީ އަނިޔާގެ އެއްވެސް މައްސަލައެއް ނެތުމެވެ.
"މީގެ އެންމެ ބޮޑު ކްރެޑިޓެއް ދެން މެޑިކަލް ޓީމަށް. އުނދަގޫ ސީޒަނަކަށް ފަހު މުބާރާތެއްގެ ފުރަތަމަ މެޗަށް ހުރިހާ ކުޅުންތެރިން ފިޓްކޮށް ބަހައްޓައިދިނީމަ. ސްވިޒަލެންޑާ ދެކޮޅަށް ނެރޭނެ ފުރަތަމަ އެގާރަ އަހަރެން ވަރަށް ކުރިން ނިންމައިފިން. ސްވިޒަލެންޑަކީ މުބާރާތްތަކުގައި ނަތީޖާ ނެރެފައިވާ ޓީމެއްކަން ގަބޫލުކުރަން ޖެހޭ،" ޕޭޖް ބުންޏެވެ.
ސްވިޒަލެންޑްގެ ކޯޗު ޕެޓްކޮވިޗް: ވޭލްސްއާ މެދު ސަމާލުވާން ޖެހޭ ކަމަށް ވަނީ ބުނެފައި.
ޔޫރޯގެ ތާރީހުގައި ސްވިޒަލެންޑަށް ގްރޫޕް ސްޓޭޖު ފަހަނައަޅައި ދެވުނީ އެންމެ ފަހަރަކު އެވެ. އެއީ 2016 ވަނަ އަހަރުގެ މުބާރާތުގަ އެވެ. އެ ޓީމުގެ ކޯޗުކަމާ 2014 ވަނަ އަހަރު ހަވާލުވި ވްލަޑިމީރް ޕެޓްކޮވިޗަކީ ޖެހިޖެހިގެން ބޮޑު ތިން މުބާރާތުގައި ސްވިޒަލެންޑަށް ކޯޗުކޮށްދޭ ދެ ވަަނަ ކޯޗެވެ. އެއީ 2016 ގެ ޔޫރޯ އާއި 2018ގެ ވޯލްޑް ކަޕާއި މި ފަހަރުގެ ޔޫރޯ އެވެ.
"ފުރަތަމަ މެޗަށް ނުކުންނައިރު ހާލަތެއް އިދިކޮޅު ޓީމާ މެދު ބުނާނެ އެއްޗެއް އެހާ ރަނގަޅަކަށް ނޭނގޭނެ. އެއީ ފުރަަތަަމަ މެޗަކީ މުބާރާތުގެ ޕްރެޝަރު ތެރެއަށް ނުކުންނަ މެޗު. އެހެންވެ ދެ ޓީމަށް ވެސް ޕްރެޝަރު އޮންނާނެ. އަހަރެން ބެލި ބެލުމުގައި 2016 ވަަނަ އަހަރު ވޭލްސް ދެއްކި ކުޅުމަށް ބަލާއިރު މި ފަަހަރު ވެސް ޓީމު ފަސޭހައެއްނުވާނެ. ރަނގަޅު ސްކޮޑެއް އެބައޮތް،" ޕެޓްކޮވިޗް ބުންޏެވެ.
"އަނެއްކޮޅުން އެ ޓީމުގެ ގިނަ ކުޅުންތެރިންނަކީ ކްލަބް ލެވަލްގައި ވަރުގަދަ މެޗުތަކެއް ކުޅޭނެ ކުޅުންތެރިން،"
ވޭލްސް އަށް ބޭލްގެ އިތުރުން 2016 ވަނަ އަހަރުގެ މުބާރާތުގައި ތަފާތު ދެއްކި ކުޅުންތެރިއަކީ އާރޮން ރަމްސޭ އެވެ. އޭނާ ވަނީ މުހިއްމު ގޯލުތަކެއް ޖަހައިފަ އެވެ.
ބައިނަލްއަގުވާމީ މުބާރާތްތަކުގައި ސްވިޒަލެންޑްގެ ފޯވާޑް ޒެރްޑަން ޝަގީރީގެ ވިދުން ގަދަ އެވެ. އެ ގޮތުން 2014 ގެ ފަހުން ބޮޑެތި މުބާރާތްތަކުގައި ސްވިޒަލެންޑްގެ 47 ޕަސެންޓް އެޓޭކްތަކުގައި (ގޯލާއި އެސިސްޓްގައި) ޝަގީރީގެ ހިއްސާ އެބައޮތެވެ.
ސްވިޒަލެންޑާއި ވޭލްސް ކުޅޭ މެޗު ފަށާނީ ރާއްޖެ ގަޑިން 18:00 ގަ އެވެ.
