ލަންޑަން (މެއި 2) - އިނގިރޭސި ޕްރިމިއާ ލީގުގައި މިރޭ ރެލިގޭޓްވެފައި އޮތް ޝެފީލްޑް ޔުނައިޓެޑް އަތުން 4-0 އިން ޓޮޓެންހަމް ހޮޓްސްޕާސް މޮޅުވި މެޗުގައި އެ ޓީމުގެ ތަރި ގަރެތު ބޭލް ހެޓްރިކެއް ހަަދައިފި އެވެ.
މިއީ ކުރިން ޓޮޓެންހަމަށް ކުޅެމުން 2012 ވަނަ އަހަރު އެސްޓަން ވިލާ ކޮޅަށް ހެޓްރިކެއް ހެދި ފަހުން ބޭލް ޕްރިމިއާ ލީގުގައި ހެދި ފުރަތަމަ ހެޓްރިކް އެވެ. ޕްރިމިއާ ލީގުގެ މޮޅު ކުޅުންތެރިޔާގެ މަގާމު ހޯދުމަށް ފަހު ބޭލް ރެއާލް މެޑްރިޑާ 2013 ވަނަ އަހަރު ގުޅުނީ ދުނިޔޭގެ ރެކޯޑް ފީ އަކަށެވެ. ރެއާލްގެ ލޯން އެއްބަސްވުމެއްގެ ދަށުން މި ސީޒަނުގައި ޓޮޓެންހަމަށް ކުޅެމުން އަންނަ ބޭލް ވަނީ މި ސީޒަނުގެ މިހާތަނަށް ޓޮޓެންހަމަށް 12 ގޯލު ޖަހައިދީފަ އެވެ.
"ތެދެއް އަހަރެން ހެޓްރިކެއް މި ހެދީ ވަރަށް ދުވަސް ފަހުން މި ލީގުގައި. އެކަމަކު މި މެޗުގައި އަހަންނަށް މުހިއްމީ އެ ވާހަކަ އަށް ވުރެ ޓީމަށް މި ލިބުނު ތިން ޕޮއިންޓް. އަހަރެން ތިން ގޯލު ޖެހިއިރު އޯރިއޭ މި ވަނީ ދެ އެސިސްޓްކޮށްފައި. އޯރިއޭ އިތުރު އެސިސްޓެއް ކުރިނަމަ އަހަރެން ނިންމައިގެން ހުރީ އޭނަ އަށް މެޗު ބޯޅަ ދޭން. އެއީ ލަނޑު ޖެހުމާ އެއްވަރަށް އެސިސްޓް ވެސް މުހިއްމު،" ބޭލް ބުންޏެވެ.
މި މޮޅާ އެކު ޓޮޓެންހަމް ވަނީ ލީގުގެ ފަސް ވަނަ އަށް ޖެހިލައިފަ އެވެ. އެއީ 34 މެޗުން 56 ޕޮއިންޓް ހޯދައިގެންނެވެ. ކުރިން ފަސް ވަނައިގައި އޮތް ވެސްޓް ހޭމް ޔުނައިޓެޑް ހަ ވަނައިގައި އޮތީ 33 މެޗުން 55 ޕޮއިންޓް ހޯދައިގެންނެވެ. ލިވަޕޫލް ހަތް ވަނައިގައި އޮތީ 33 މެޗުން 54 ޕޮއިންޓް ހޯދައިގެންނެވެ. މިރޭ މެންޗެސްޓާ ޔުނައިޓެޑާއި ލިވަޕޫލް ކުޅެން އޮތް މެޗު ސަޕޯޓަރުންގެ ހަޅުތާލުތަކާ ހެދި ޖެހުނީ ފަސްކުރާށެވެ.
ޓޮޓެންހަމް ދަނޑުގައި މިރޭ ކުޅުނު މެޗުގައި ބޭލް ފުރަތަމަ ގޯލު ޖެހީ މެޗުގެ 36 ވަނަ މިނިޓްގައި ސާޖް އޯރިއޭ ދިން ބޯޅައަކުންނެވެ. ފުރަތަމަ ހާފުގައި ޓޮޓެންހަމްގެ ސޮން ހެއުން މިން ގޯލެއް ޖެހި ނަމަވެސް ރެފްރީ ނިންމީ އޮފްސައިޑް ކަމަށެވެ. އެއީ ވީޑިއޯ އެސިސްޓަންޓް ރެފްރީ (ވީއޭއާރް) އިން ބެލުމަށް ފަހު އެވެ.
ބޭލް އޭނާގެ ހެޓްރިކް ފުރިހަމަކުރީ ދެ ވަނަ ހާފްގައި ދެ ގޯލު ޖަހައިގެންނެވެ. އޭގެތެރެއިން އެއް ގޯލު ޖަހަން އޯރިއޭ ފުރުސަތު ތަނަވަސްކޮށްދިންއިރު، އަނެއް ގޯލު ކާމިޔާބުކުރީ ސޮން ދިން ބޯޅައަކުންނެވެ. ސްޓީވަން ބާގްވެއިން ދިން ބޯޅައަކުން ޓޮޓެންހަމްގެ ފަހު ގޯލު ޖެހީ ސޮން އެވެ.
